Icelandairip Kulusummut timmisartuussisarnerminik annikillisitseqqinnissamik aalajangiussaqarnera Kommuneqarfik Sermersuup isumaaluutigeqaa. Tunumi attaveqaasersugaanerup suli qanoq qajannartiginera aamma allanngujaatsunik attaveqaatinik peqarnissaanik qulakkeerinninniarluni sulinerup qanoq pingaartiginera taama aalajangernermi naqissuserneqarpoq.
Suliassaqarfik pillugu aamma attaveqaasersugaaneq pitsanngorsarniarlugu suliniuterpaaluit Namminersorlutik Oqartussanit ukkatarineqangaatsiareersut, borgmester Avaaraq Olsen oqarpoq.
“Timmisartuussiffiusartoq iluanaarutaajunnaartoq suliffeqarfiup namminersortup nalilerpagu uagut assuarinnissinnaanngilagut. Attaveqaasersuutilli nunatsinnik ataqatigiissitsisut eqqarsaatigalugit oqartussat akisussaaffimmik tigusinissaata qanoq pingaaruteqartiginera aamma takutinneqarpoq. Nalunngilara Namminersorlutik Oqartussat tassani oqartussaaffimmi suliaqartut aamma neriuutigaara una pisoq siunissami ungasinnerusumi aaqqiissutissamik pisariaqartitsinermut tunngavisseeqataasinnaassasoq.”
Tunumi innuttaasut nunap sinnerani allatulli innuttaasutut angalanissaminnut, sulinissaminnut, pisortanit kiffartuunneqarnissaminnut aamma ilaquttaminnut tikeraarnissaminnut periarfissaqassapput. Nunatsinni sumi najugaqarneq apeqqutaassanngilaq.
Timmisartuussinerit allanngorartut aamma periarfissat killeqarnerat innuttaasunut, inuussutissarsiornermik ingerlataqartunut aamma kommunimi kiffartuunneqarneqarnermut unammillernartoqarnera Kommuneqarfik Sermersuup ukiorpaalunni uparuartarpaa. Attaveqaatit ajorneruleraangata ineriartortitsinermut, sulisussarsiornermut aamma Tunumi inuuniarnermut ataqatigiisitiniarnermut qulakkeerinninnissamut ajornakusoornerulersitsisarpoq.
Kingunerisai kommunimi ingerlatsinerinnarmut sunniuteqanngillat.
Ilaqutariit qanigisaminnut tikeraarnissaat kinguartariaqalersinnaavoq imaluunniit periarfissaassanani. Napparsimasut nakorsiarnissaannut angallanneqarnissaq ajornakusoornerulersinnaavoq. Suliffeqarfiit nassiussuinerat aamma ineriartortitsinissamut periarfissaat ajornakusoornerulissaaq. Takornariaqarneq sunnerneqassaaq inuillu misigisassarsiortitsinermik inuuniuteqartut aamma sumiiffimmi suliffissat sunnerneqassallutik.
Taamatuttaaq kinguaattoornerit aamma taamaatitsiinnartarnerit timersortartut aamma timersoqatigiiffiit pissartanngorniunnernut naapinnissanullu imaluunniit aaqqissuussanut pilersaarutaareersunut peqataanissaannut ukiut tamaasa ajornakusoortitsisarpoq. Aallarfissat ikinnerulernerat suli kinguneqarnerlunnerulissaaq.
Timmisartuussisarnerup ukiut tamaasa ajornerulertarnerata Kalaallit Nunaata nunarsuullu sinneranut anngunniarneq ajornakusoornerulersissavaa.
Timmisartuutileqatigiit ingerlatsinerminni aningaasarsiornissamik tunngavissaqartariaqarnerat Kommuneqarfik Sermersuup paasisinnaavaa. Taamaammat inuiaqatigiit ineriartornissaannut attaveqaatit pisariaqartitat pillugit qulakkeerinninnissami pisortat pisussaaffeqarnerat pissusissamisoorpoq.
Avaaraq Olsen ima erseqqissaavoq: “Nunatsinni nukittuumik ataqatigiissumillu assigiimmik tamanut periarfissaqartitsinissaq kissaatigaarput. Taamaammat Tunumi attaveqaasersugaanerup pitsanngorsarniarnerani Namminersorlutik Oqartussat pingaarutilimmik suliaqarnerat suli ingerlassasoq neriuutigaara, taamaalilluni ineriartorneq unikkaallannani pitsaanerpaamik iluatsinnissaa anguniarlugu.”
Siunissaq ungasinnerusoq eqqarsaatigalugu Tunumi aalaakkaasumik tatiginartumillu timmisartuussisalernissamik qulakkeerinninniarluni aaqqiissutissarsiornermi kommuni Namminersorlutik Oqartussanik qanimut suleqateqaqqinissaminut qilanaarpoq. Angallassinerinnaq kisiat pineqanngilaq, kisiannili innuttaasut nunami sumiluunniit najugaqaraluartut inuussutissarsiornermillu ineriartortitsinermik ingerlataqartut periarfissagissaarnissaat aamma pineqarput.
Tunumi attaveqaasersuutit ataqatigiissumik ineriartortitsiffiunissaat aamma siunissamut upperinniffiunissaat pisariaqarpoq.