Destination Paamiut maanna toqqavimmik siullermik piariigaqarpoq, tamanna isumaqarpoq puttasup illoqarfimmi angallassisartunit tikeraanillu atorneqarsinnaalerneranik.
Toqqavittaaq alla sapaatit-akunnerisa tulliuttut ingerlaneranni piariissasoq Inuussutissarsiornermut Immikkoortortaqarfiup naatsorsuutigaa. Sulineq naammasseriarpat toqqaviit marluk puttasutallit atorneqarsinnaalissapput.
Takornariaqarnermut ineriartorfiulluartumut atatillugu puttasut pilersinneqarput. Sumiiffimmi ukioq manna angallassisartut tallimaassasut naatsorsuutigineqarpoq, atugassarititaasullu pitsaanerunissaat illoqarfimmi takornariaqarnermik suliallit kissaatigisimavaat.
Aningaasaliinertaaq umiarsuarnut takornariartaatinut Paamiunut tikittartorpassuarnut immikkut pingaaruteqassaaq. Takornariat angallassisartullu misigisassaasa pitsaasuunissaannik qulakkeerinninniarnermi sumiiffimmi attaveqaasersuutit ajunngitsuunissaat ullutsinnullu naleqqunnissaat pingaaruteqarpoq.
Taamaammat sumiiffimmi ineriartortitsinissaq eqqarsaatigalugu suliniut Inuussutissarsiornermut Immikkoortortaqarfiup umiarsuarnut takornariartaatinut akitsuusersuinermi akiliutitigut aningaasalersussallugu pingaarnerutissimavaa.