Ilaqutariinni amerlasuuni ullut tamaasa akisussaaffik, ernumassutit neriuullu nammatarineqartarput. Ilaatigut kisimiilluni tamakkua oqimaallisinnaasarput. Meeqqat, aappariinneq imaluunniit angerlarsimaffimmi ulluinnat pillugit ernumassutit annertusiartuleraangata, ikorfartorneqarniarluni, siunnersorneqarniarluni aamma tusarnaarneqarniarluni saaffissaqarnerup ilisimanissaa pingaaruteqarpoq.
Suliniut taanna Siunnersuinermut Ilaqutariinnillu Katsorsaanermut Sullissivimmit (CRF) ingerlanneqartarpoq, aamma ingammik CRF-ip pinaveersaartitsinermi suliniutai ilaqutariinnut, angajoqqaanut, meeqqanut aamma inuusuttunut pinaveersaartitsilluni siunnerfilimmik suliniuteqarnermik suliaqarfiusut aqqutigalugit. Tassani siusissukkut ikorfartuisoqarsinnaavoq aqqutissiuunneqarlunilu unammilligassat annertusinnginnerini.
Amerlasuut Meeqqanut Ilaqutariinnullu Sullissivittut (BFC) CRF ilisimavaat. Aqqata allanngornerata erseqqissassavaa, ullumikkut CRF-imi siunnersuineq aamma ilaqutariinnik sullissinermi saaffissaq ataasiinnanngorpoq ilaqutariillu tamarmiusut ukkatarineqalermata aamma eqqortumik ikorfartorneqarnissamut tunngavissiaq isaaffillu ataaseq tunngavigalugit.
CRF sisamanik allaffeqarpoq, tamarmillu assigiinngitsunik neqerooruteqarput suliniuteqarlutillu. Pinaveersaartitsilluni suliniutit aamma Siunnersuisarfik ilaatigut Hans Egedesvej 7a-miippoq, tassani ilaqutariit ulluinnaat ilungersunarsineranni pinaveersaartitsinertalimmik siunnersorneqarnissamut ikorfartorneqarnissamullu saaffiginnissinnaapput. Ulluinnaat tamaasa ammasarput ataasinngornermit pingasunngornermut 10:00 – 15:00, sisamanngorneq 12:00 – 17:00 aamma tallimanngorneq 10:00 – 12:00.
Tikilluaqqusaalluinnarpusi.
Isaaffik ataaseq – ataatsimut tamanik takunnissinnaaneq
CRF-imi ilaqutariit systemimi ajornakusoortumi ikiortissarsiorniarsarissanngillat. Allaffimmut ataatsimut saaffiginniffigissaatit, aamma sulisuniit ikorfartuineq ilinnut naleqquttoq pillugu ikiorneqassaatit. CRF attuumassutilinnik katersuivoq, taamaalilluni ilaqutariit ataqatigiissumik, ingerlaavartumik aamma toqqissisimanermik nammineerlutik ikiorneqarnertik ataqatigiisinniarsarinagu misigissallutik.
“Ikiorneqarnissaq ajornaatsunngortinniarparput aamma toqqissisimanartunngortinniarparput. Ikiorneqarnerup ataqatigiinnera naniuminarneralu misigissavaat. Ilutigalugu siunnersorneqarneq kinaassutsimik isertuussiffiuvoq pituttorsimananilu. Ilaqutariit kissaatigippassuk ateq, inuup normua imaluunniit najugaa nalunaarsorneqassanngillat”
Maliina Junge Jørgensen, fagchefi oqarpoq.
Ulluinnarni pisut pillugit ikorfartorneqarneq
CRF ilinnuuvoq:
- meeqqavit ineriartornerat ernumassutigigukku
- aappariinnermi unammilligassaqaruit
- meeqqat inuusuttuaqqalluunniit pillugit aaqqiagiinnginnerit qanoq iliuuseqarfiginissaat nalorniguit
- perorsaaneq pillugu aappallu isumaqatigiinngikkussi
- imaluunniit ilungersunartut pillugit oqaloqateqarnissamik pisariaqartitsiguit
Tassani siunnersortit, katsorsaasut aamma sullissisut tusarnaarsinnaasut, ikorfartuisinnaasut aamma illit nammineq nukissatit nassaareqqinniarlugit ikorfartuisinnaasut naapissavatit.
“Kissaatiginerpaasarput tassaavoq, ilaqutariit ikorfartorneqarneq pisariaqartitartik piaartumik toqqissisimanartumillu nassaarissagaat. Piffissaagallartillugu ikorfartuineq aallartikkutsigu ernumassutit annikitsut annertusinissaat pinaveersaartissavarput. Tamanna meeqqanut aamma angajoqqaanut pitsaanerusumik atugaqartitsisinnaavoq,”
Maliina Junge Jørgensen, fagchefi oqarpoq.
Siusissukkut ikorfartorneqarpoq – assigiinngissutsit annertuut
Ilaqutariittut inuuneq nuannersunik unammillernartunillu imaqarpoq. Taamaattumik Kommuneqarfik Sermersooq siusissukkut ikorfartuineq, toqqissisimaneq aamma ataatsimoorneq ukkataralugit meeqqanut ilaqutariinnullu politikkeqarpoq.
Meeqqanut Ilaqutariinnullu politikki nutaaq pinaveersaartitsinermik aamma tamakkiisumik ikorfartuinermik immikkut qitiutitsivoq. Ilaqutariit ajornartorsiutit annertusivallaannginneranni ikorfartorneqartarnissaat anguniagaavoq, aamma ilaqutariit ataatsimut inissisimaffiat tunngavigalugu.
CRF siunnersuinikkut katsorsaanikkullu neqeroorutaavoq, ilaqutariinnik, angajoqqaanik, meeqqanik inuusuttunillu aamma ataatsimut ulluinnaannik tunngaveqartoq. Taamaattumik neqeroorut unammilligassanut ilaqutariinnut attuumassutilinnut siunnerfeqarpoq, aamma ataasiakkaat ajornartorsiutaannut ilaqutariit najoqqutassaata avataaniittunut tunnganani.
Annertunerusunik paasisaqarusukkuit attaveqarfissat
Paasisaqarnerugit aamma CRF attaveqarfigiuk, uani:
https://sermersooq.gl/kl/siunnersuinermut-ilaqutariinnermullu-katsorsaanermut-sullissivik/
Kommunip meeqqanut ilaqutariinnullu politikkia pillugu paasisaqarnerugit, uani:
https://sermersooq.gl/kl/2024/12/12/meeqqanut-ilaqutariinnullu-politikki-nutaaq-siusissukkut-iliuuseqarneq-ilaqutariinnullu-ataatsimoorussamik-isigisumik-tapersersuinissaq-qitiutillugit/