2025 – 2035-mut Meeqqanut Ilaqutariinnullu politikki nutaaq Kommuneqarfik Sermersuumit saqqummiunneqaqqammerpoq, matumani meeqqanut, inuusuttunut ilaqutariinnullu toqqissisimanartumik atugassaqartitsinissaq pingaarnertut ukkatarineqarluni. Politikki naleqartitanik soorlu siusissukkut iliuuseqarnissamik, innuttaasunik akuutitsinermik suliassaqarfiillu akornanni suleqatigiinnernik tunngaveqarpoq.
Meeqqanut Ilaqutariinnullu politikkimi suliniutissat aalajangersimasut ukiuni qulini tulliuttuni kommunimi tamarmi atugarissaarnissamut ineriartornissamullu qulakkeerinnissapput.
Kommunimi tamarmi meeqqanut ilaqutariinnullu pitsaanerpaanik atugassaqarnissaq qulakkeerniarlugit Kommuneqarfik Sermersuumi ilungersuullugit sivisuumik ingerlanneqarnissaannut Kommunalbestyrelse Meeqqanut Ilaqutariinnullu politikki nutaaq atorlugu pisussaaffiliivoq.
“Meeqqanut ilaqutariinnullu tunngasunut inatsit nutaaq atorlugu kommunimi tamarmi meeqqat inuusuttullu toqqissisimasumik alliartornissaannut pitsaanerpaamik tunngavissiuussissaagut. Upperaarput pitsaanerpaamik suliniuteqarneq innuttaasut qanimut suleqatigalugit pisartoq, taamaalilluta peqatigiilluta ilaqutariit ataasiakkaat pisariaqartitaannut naleqquttunik aaqqiissuteqarniassagatta” borgmesteri Avaaraq Olsen oqarpoq.
Ikiorneqarnissamut iserfissaq ataaseq
Meeqqanut Ilaqutariinnullu politikki nutaaq qitiusumik naleqartitanik sisamanik tunngaveqarpoq; siusissukkut iliuuseqarneq, aalajangiinerni ilaqutariinnik meeqqanillu akuutitsisarneq, oqartussat ilaqutariillu akornanni suleqatigiinneq kiisalu innuttaasunut pisariaqartitarpiaannut suliniutinik naleqqussaaneq.
Saniatigut Meeqqanut Ilaqutariinnullu politikki nutaaq atorlugu One Door-princip (isaaffiup ataasiinnaanissaanut tunngavik) atuutilersinneqarnissaa pingaartinneqartorujussuussaaq. Ima isumaqarpoq, ilaqutariinnut tamanut kommuniminngaanniit ikiorsiinissamut isaariaq ataasiinnaassasoq, peqatigitillugulu neqeroorutit illumut ataatsimut ataatsimoortinneqarnissaannut Kommuneqarfik Sermersuumit anguniarneqarpoq.
Pinaveersaartitsineq qitiusutut immikkuualuttoq
Meeqqanut Ilaqutariinnullu politikkimi nutaami qitiulluinnartumik anguniagaasuni ilagaat pinaveersaartitsinermut suliniuteqarneq, meeqqanik atugarliortunik angerlarsimaffiup avataanut inissiinissamut pisariaqartitsinermi minnerpaaffimmiititsinissamik siunertalik.
Taamatut Meeqqanut Ilaqutariinnullu politikkeqarneq Kommuneqarfik Sermersuumit iliuusissatut periarfissat patajaallisarnissaat annertusarnissaallu kissaatigineqarpoq, taamaalillutik ilaqutariit aamma meeqqat nalerisimannginnerat takuneqarsinnaaliinnartoq piaartumik naleqquttumillu ikorfartorneqartassammata. Iliuusissat innuttaasut najugaqarfiini aamma pisariaqartitsinerpaaffiini tunniunneqassapput, tamannalu inissiinissamik, meeqqanut angajoqqaavinullu sakkortuumik misigineqakkajuttartuusumik, pisariaqartitsigaluarnermik annertuumik pinaveersaartitsisinnaasoq naatsorsuutigineqarpoq.
Siusinaartumik iliuuseqarnissaq pingaartuuvoq
Meeqqanut mikisunut atugarliortunut siusinnerusukkut suliniutini assersuutaasut ilaat tassaavoq Kuserneq. Suliniut Nuummi ingerlanneqareerpoq maannalu Meeqqanut Ilaqutariinnullu politikkimi nutaami ingerlateqqinneqarsinnaalluni. Kuserneq katsorsaaviutigaluni angerlarsimaffiuvoq, naartusunut aamma ilaqutariinnut 0-2-nik ukiulinnik mikisunik meeralinnut mianernartunut katsorsaanermik, ikiuinermik ikorfartuinermillu tunisisartoq.
“Kuserneqartillugu takutipparput siusinaartumik iliuuseqarneq qanoq meeqqanut angajoqqaavinullu annertuumik allannguisinnaatiginersoq. Naartunermiit meeqqallu inuunerani ukiumi siullermi ilaqutariinnik tapersersuinikkut toqqissisimasumik alliartornissamut ilaqutariittut inuunermik nukittunerutitsinissamut toqqammavissiissaagut. Suliniut maannamuinnaanngitsumik siunissamulli kinguaariinnut pitsaasumik allannguuteqarsinnaasumik iluaqutaassaaq,” borgmesteri Avaaraq Olsen oqarpoq.
Ilaqutariit angajoqqaatut pisussaaffimminnik tapersersorneqalaarnissamik pisariaqartitsisut tapersersorneqartarput. Kusernerup angajoqqaat naartusullu angajoqqaatut pisussaaffimminnik isumaginninnissaannut katsorsaanikkut, ilaqutariinnut siunnersuinikkut, ataasiakkaanik oqaloqatiginninnikkut, aappariinnik oqaloqatiginninnikkut, naalungiarsunnik katsorsaariaatsip atorneratigut, ilinniartitsinikkut gruppikkuutaartunik oqaloqatiginninnikkut piareersartarpai.
Angerlarsimaffiup avataanut inissinneqarnermiit pitsaaneruvoq angajoqqaarsiaasartuniinnissaq
Misissuinerit takutippaat meeqqat meeqqanut ulloq unnuarlu angerlarsimaffinnut inissinneqarsimasuniit sanilliullugit angajoqqaarsianut inissinneqarsimasut ajornartorsiuteqanngitsumik inersimasunngornissamut pitsaanerusunik atugassaqartut. Taamaattumik kommunip tungaaniit siumut sammisumik angajoqqaarsianik amerlanerusunik pissarsiniarnissamut anguniagaqarluni aaqqissuussaasumik sulisoqassaaq.
Taamaattorli ulloq unnuarlu angerlarsimaffimmut inissiineq meeqqanut ilaannut aaqqiissutitut pitsaanerpaasinnaavoq. Taamaattumik kommunimi ulloq unnuarlu angerlarsimaffimmik, Tupaarnatut ilusilimmik ingerlataasumik pilersitseqqinnissaq Kommuneqarfik Sermersuumit maanna aalajangerneqarpoq. Ukiup tullissaa illumik naleqquttumik siunertamut atorneqartussaasumik nassaarinninnissamut pisinissamullu atorneqassaaq, tamatumunngalu kommunip missingersuutaani 20 mio kr.-it immikkoortinneqassapput.
”Politikki nutaaq kommunimi tamarmi meeqqanut ilaqutariinnullu atugassarititaasut pitsaanerulersinnissaannut suliarput killiffiuvoq pingaarutilik. Meeqqat tamarmik toqqissisimanartumik alliartornissaannut periarfissinneqarnissaat inuunermillu nukittuumik aallartinnissaq aamma ilaqutariit tapersersorneqarnissaminnut pisariaqartitsigaangata pisariaqartitaminnik pisarnissaat qulakkeerusuppagut. Tamanna iliuuseq – maanna siunissamilu – allannguutaasussaasoq ataatsimoorussassaraarput, ” borgmesteri Avaaraq Olsen naggasiivoq.