Kommuneqarfik Sermersuumi Inuussutissarsiornermut immikkoortortaq Paamiuni innuttaasunut marloriarluni ataatsimiititseqqammerpoq, Paamiunut takornariaqarnermut inerisaanissamut isumassarsiorfigineqarluni. Innuttaasut amerlasuut peqataapput Paamiullu takorniarfittut siuarsarnissaanut tunniusimalluarlutik.
Innuttaasut 75-it missaaniittut katersortarfimmi Taqqissuummi peqataapput, Inuussutissarsiornermut immikkoortortami sulisut marluk innuttaasunik takornariaqarneq pillugu ataatsimiititsimmata. Paamiut takornariarfittut pilerinartutut, asimi misigisassarsiornissat pitsaalluinnartut inerisarnissaat anguniarlugit innuttaasunik ataatsimiititsinermi siunnersuuterpassuit oqaatigineqarput.
”Paamiut immikkuullarissorsuuvoq, pinngortitaq kulturilu immikkuullarissut takornarissanik nunarsuarmi tamaneersunit tikinneqartalernissaanut orniginarsarnissaa periarfissaqarluarpoq. Nuannaaqaagut innuttaasunik ataatsimiititsinerni tunniussimasumik peqataaffigineqarmat siunnersuutillu pitsaasut tunniunneqarmata, Paamiut takornariarfissatut pitsaasutut periarfissaqarnera piviusunngortinnissaanut Paamiormiut suleqatiginissaat qilanaaraarput,” Kommuneqarfik Sermersuumi takornariaqarneq pillugu siunnersorti Trine Mogensen oqarpoq.
Takornariaqarnerup ineriartornissaanut zonet
Paamiuni innuttaasunik ataatsimiititsinermi sammineqartunut ilaavoq Kalaallit Nunaanni takornariaqarnermut inatsit nutaaq Inatsisartunit akuerineqaqqammersoq. Takornariaqarnermut inatsisip ilaatigut imaraa qalipaatit atorlugit nuna immikkoortiterneqarnera. Qorsuk, sungaartoq aappaluttumillu immikkoortiterisoqarpoq. Zonet qorsunni takornariartitsinermut inerisaanissamut periarfissiisoqarpoq aappaluttunillu qalipaasersorneqarsimasuni takornariaqarnissamut inerteqquteqartoqarpoq pinngortitat paarilluarumallugu.
”Takornariaqarnermut inatsisissami erseqqarissumik sinaakkusiisoqarpoq, Paamiuni attanneqarsinnaasumik zone-nut agguaanissaq pillugu sulinissatsinnut. Zonet qorsummik qalipaasersorneqartut ineriartorluarnissamut – takornarissanik tikinneqarnissamut Paamiunillu inerisaalluarnissamut periarfissiipput, aappaluttunili qulakkeerniarneqarpoq nunap immikkoortui mianernarnerit illersornissaat qulakkeerneqarlutik. Innuttaasunik ataatsimiititsinerit takutippaat Paamiormiut piumassuseqarluartut aammalu ineriartorneq allanngutsaaliuinerlu oqimaaqatigiinnissaannut aaqqiisoqarusuttoq,” Trine Mogensen oqarpoq.
Kommuneqafik Sermersuumi Inuussutissarsiornermut immikkoortortap Paamiuni takornariaqarnermut ineriartornissamut periarfissaq annertooq takusinnaavaa aammalu innuttaasut siunnersuutaat amerlasuut suleriaqqinnermi atorneqartussat qujarullugit.