Innuttaasunut

Kommuneqarfik Sermersuup Tusassillu Tasiilap atuarfiani internetersinnaaneq pitsaanerulersippaat

Tusassip Kommuneqarfik Sermersuullu suleqatigiillutik Tasiilami atuarfiup attaveqarfianik Attammik atuisinnaaneq pitsaanerulersippaat. Attavimmik 20 mbit-imiit 100 mbit-imut qaffaaneq meeqqanut inuusuttunullu atuartunut iluaqutaassaaq. Kommuneqarfik Sermersuup borgmesteriata Avaaraq Olsenip tamanna nuannaarutigaa imalu oqarluni: 

“Ullutsinni internet atuartitsinermut ilaasorujussuuvoq. Tasiilami atuartut maanna sukkanersumik internetersinnaalernerat siuariarneruvoq annertooq. Tamatuma kingunerissavaa atuartut iPaditik atorlugit atuartut allat assigalugit paasissutissanik internetikkut ujaasisinnaalernerinik. Kommuneqarfik Sermersuup taamatut Tusassimik suleqateqarluni periarfissaqalersitsinera nuannaarutigeqaara.”

Suleqatigiinnikkut angusaq 20 mbit-imiit 100 mbit-imut

Tamanna angusaq piviusunngortinneqarsinnaalersimavoq Kommuneqarfik Sermersuup Tusassimut pisiarisartakkami ilaa atunngisani 40 mbit atuarfimmut tunniussinnaagamiuk, taamaaqataalu, tassa 40 mbit, Tusassip aamma tunniussinnaasimallugu. Atuarfiup nammineerluni 20 mbit pigereerpaa, maannalu atuartut kisitsinermik ilinniartartut naatsorsorsinnaassavaat 40+40+20 katikkaanni tassaasut 100-t, taamaattumik atuarfiup maanna attavik 100 mbit-iusoq atorsinnaalerpaa. 

Tamanna immaqa kabeli aqqutigalugu attaveqaatilinnut naleqqiullugu annertugisassaarpalunngikkaluarpoq, kisianni tassa nunarsuup avannaarsuani piterartartumi pinngortitamilu peqqarniissinnaasumi pitsanngoriaat tamanna annertoorujussuuvoq. Tusassimi siulersuisuni siulittaasoq Ulrik Blidorf ima erseqqissaateqarpoq: 

“Tusassimiit Kommuneqarfik Sermersuumik suleqateqarluarnerput nuannaarutigisorujussuuarput.  Naak nalunaarasuartaateqarnikkut attaveqaasersuutinik aningaasarpassuarnik nalilinnik pinngortitami imaannaanngitsumi inukitsumilu sanaartoraluarluta uagutsinnut isumaqangaarpoq suleqatigiinnikkut pitsaanerusunik periarfissaqalersitsisinnaagatta. Tamanna maanna Tasiilamut atuuppoq. Nuannaarutigaarput ataatsimoorluta periarfissanik pitsaanerusunik kinguaariinnut tullernut pilersitseqatigiikkatta nunarsuarmillu qaninnerulersitsilluta, tamannami Tusassimi periusissiatsinni ersarissumik anguniagaraarput.  “

Borgmesteri Tusassimilu siulersuisuni siulittaasoq inuussutissarsiorneq pillugu ataatsimeersuarnermut Tasiilami sisamanngornermi marsip 23-anniit 24-ata tungaanut ingerlanneqartumut peqataapput.