Services

Ineqarneq: Ineqarnermi ajornartoorneq ataatsimut ajornartorsiutaavoq

Nakkutilliisoqarfiup aalajangiinerata kingunerisaanik inatsit allanngortinneqartariaqalerpoq, taamaalillunilu siunissami kommunit qanoq iliorlutik inissianut aningaasalersuisinnaanissaannut maleruagassanik ersarissunik peqalissaaq, Kommuneqarfik Sermersuumi borgmesteri oqarpoq.

Kommuneqarfik Sermersuup inissianik namminersortunut attartorlutik pisortat inissiaataattut kommunimi innuttaasunut attartortitseqqittarnera kommunimut piginnaatitsissuteqarnermut uniuuttoq Nakkutilliisoqarfimmit aalajangerneqarpoq. Aalajangiineq tamanna borgmester Charlotte Ludvigsenimut annilaartitsivoq.

”Tusagassiorfinnut nalunaarummi allassimasoq kisiat ilisimavara, taamaattumillu Nakkutilliisoqarfiup taamatut aalajangiinerminut tunngavigisaata tusarnissaa pissanngatigisorujussuuara. Aaqqissuussineq taanna atorlugu inuppassuit pitsaasunik ineqalernissaanut iluaqutigaarput. Taamaattumik aalajangiineq paasisinnaanngilluinnarpara. Inatsisit malippagut, aammalu aningaasaqarnikkut akisussaassusilimmik iliuuseqarnissarput, tamatumalu peqatigisaanik innuttaasunut amerlanerpaanut inissaqartitsinissarput qulakkeerniarlugu iliuusissat tamaasa iliuuserisimavagut”, Charlotte Ludvigsen oqarpoq.

Ukiuni arfinilinni, Kommuneqarfik Sermersuup aaqqissuussineq taanna atorlugu inissianik attartortitsivigisarsimasaanni ilaqutariit 416-it inissaqartinneqarsinnaasimapput. Kommunip nammineerluni inissiat taakku akilersimasuuppagit, ukiumut aningaasartuutit 150 millioner koruuniusarsimassagaluarput, taakkulu kommunip sanaartornermut missingersuutaasa affaat sinnerlugit amerlassuseqarput. Taamaattumik ineqarnermi ajornartoorneq qaangerniarlugu inissianik naammattunik sanaartorneqarnissaa piviusorsiunngilaq. Tamanna pissutigalugu Charlotte Ludvigsenip nammineerluni suliaq nunatsinni politikerinut qaqippaa.

”Arlaleriarluta ineqarnermi ajornartorsiutit qaangerniarlugit qanoq iliorsinnaanerput pillugu Naalakkersuisut oqaloqatiginiartarsimagaluarpagut. Kim Kielsen pingasoriarlunga qaaqqusissutinik nassiussivigisimagaluarpara, iliuuseqartarsimanngilarli. Maanna Naalakkersuisut nutaat misileqqissavakka. Iserit kisiat eqqarsaatigalugu inuit 2000-it sinnerlugit inissiamut utaqqisut allattorsimaffianni allatsissimapput. Taamaattumik Naalakkersuisut iliuuseqartariaqarput. Inatsit allanngortittariaqarpoq, taamaalillunilu kommuni innuttaasut inissianik pilersornissaannut periarfissinneqassaaq, imaluunniit Namminersorlutik Oqartussat namminneerlutik inissianik sanaartortariaqarput. Inissaaleqineq nunatsinni ajornartorsiutit annersaraat, aammalu annertusiartornerani isiginnaaginnarsinnaanngilagut.”

Kommuneqarfik Sermersuup namminersortut inissiaataannik attartortittakkanik attartortitsisarnini 2015-imi aallartippaa, tamannalu sioqqullugu aaqqissuussineq pillugu inatsisitigut aningaasaqarnikkullu naliliisitsisimavoq, borgmesterillu ullumikkut aaqqissuussinerup inerneri nuannaarutitai.

”2015-imili namminneerluta inissialiortiternitta saniatigut aaqqissuussineq taanna atorlugu ilaqutariit 416-it inissianik pissarsissussinnaasimagatsigit peqqissiminngilanga”, Charlotte Ludvigsen oqarpoq.