Ukiup ingerlanerani qaammatit arfineq-marluk siulliit ingerlanneranni Kommuneqarfik Sermersuumi eqqagassalerisut innuttaasullu eqqakkat 10.508 tonsit ikuallatassatut suliarineqartussatullu tunniuppaat.
Una qaammat aallarnerfigalugu qaammatikkuutaartumik killiffik pillugu Eqqagassaleriffik kommuneqarfimmi innuttaasunut nalunaaruteqartassaaq. Tassani ilaatigut ukiup siuliinut sanilliullugu eqqakkat qanoq agguataarlugit annertussuseqarnersut kiisalu eqqakkat qanoq ittut Kommuneqarfik Sermersuumit tigoorarneqarnerpaasarnersut takusinnaassavatit.
Eqqakkat 10.508 tonsit ( imaluunniit eqqakkat 10.508.000 kilo) Nuummi Ikuallaavimmut aamma Ikuallaavimmi Eqqakkanik Tigooraavimmit suliarineqartussat tunniunneqarsimapput.
Nuummi eqqakkat katersorneqarsimasut kiisalu eqqakkat annertuut Ikuallaavimmit aamma Eqqakkanik Tigooraavimmit tigoorarneqartarput. Tamatuma saniatigut Kommuneqarfimmi illoqarfinniit nunaqarfinniillu Tunumiittunit kitaaniittunillu eqqakkat tigoorarneqartarput. Taamatuttaaq aasaanerani, sanaartornerup annertusiffiani, sanaartornermit eqqakkat annertuut tigoorarneqartarput.
Qaammatini tulliuttuni Kommuneqarfik Sermersuumi Eqqagassaleriffimmit qaammammut nalunaarutini qulequttat assigiinngitsut sammineqassapput. Ilaatigut eqqagassat assigiinngitsut kiisalu eqqakkat atorneqaqqittarnerinut tunngasut atuarsinnaassavatit.
Takussutissiami juuli qaammat ilanngullugu Tigooraavimmut eqqakkat tunniunneqartut annertussusaat 2017-imilu eqqakkat annertussusaannut sanilliunneqartut takuneqarsinnaapput. Pingaartumik ukioq kingullermut sanilliullugu juuli annertuumik qaffariaateqarpoq, tassa ukioq manna sanaartorneq nalinginnaasumit kingusinnerusukkut aallartimmat, maannali tassa sanaartorneq ingerlanneqaleruttorpoq.
Nalunngiliuk innuttaasut inuussutissarsiornermillu ingerlataqartut tamarmik eqqakkanik tigooraavimmut tunniussisinnaasut? Innuttaasutut eqqakkanik 50 kiilunik oqimaassusilinnik akeqanngitsumik tunniussisinnaavutit. Inuussutissarsiornermi ingerlataqartut eqqakkat suussusaat apeqqutaatillugu akiliuteqartarput.
Eqqakkat suussusaannut, eqqagassalerinermut, eqqakkanik suliaqartarnermut tunngasunik allanilluunniit apeqqutissaqaruit, Eqqagassaleriffik oqarasuaatikkut 36 74 11 attavigisinnaavatit, (pitsaanerpaavoq nal. 10-12 akornanni) imaluunniit e-mailikkut: affald@sermersooq.gl. Tassa innuttaasut aamma inuussutissarsiornermik ingerlataqartut tamarmik pineqarput.
Takussutissiami eqqakkat assigiinngitsut agguataarneri takuneqarsinnaapput. Eqqakkat amerlanerit ikuallanneqarsinnaapput, taakkulu Nuummi ikuallanneqartarput. Eqqakkat atoqqinneqarsinnaasut atoqqitassatut Danmarkimut nassiunneqartarput.