Pisut equngasut annertunngikkaluarpataluuniit tatigineqarnermut isigineqarnermullu pitsaanngitsumik kinguneqartitsisinnaapput takutitsisutut ileqqulunnermik, kammalaatersortuunermik, pissaanermik atornerluinermik, anngiortumik eqqunngitsuliornermik peqquserlunnermilluunniit.
Tallimanngormat Transparency International Greenland Tasiilami aqutsisunut pikkorissaapput. Naak peqataasut amerlagisassaanngikkaluartut, peqataasut soqutiginnilluarput apeqquteqallattaasarlutillu.
Illortaat atorfinitsinneqarsinnaava? Aningaasaqarnermut pisortaqarfimmi suligaanni paasigaannilu suleqat “sort arbejde-mik” atuisuusoq, taava qanoq iliortoqassava? Pisiortorfimminngaanniit tunineqarutta, qanoq iliussaagut?
Ilaatigut assersuutit akunnattoorfiusinnaasut eqqartorneqarput.
Peqquserluttarneq nunarsuaq tamakkerlugu takussaavoq, naallu Kalaallit Nunaanni peqquserluttarnerup annertussusia allanut sanilliullugu annikitsumiikkaluartoq, tamatumunnga tunngasunik ilisimasagut siammasissumik aammalu kommuninut tunngaveqartut eqqarsaatigalugit, annikitsuararsuupput. Kisiannilu nunanut naliginnaasumik sanilliussuuffigisartakkatsitulli, naatsorsuutigisariaqarpoq, pineqartup annertussusiata naatsorsuutigineqartumit qaffasinnerusumiinnissaa.
Paamiuni pisortat aamma pikkorissareernikuupput tullinnguuppullu Nuummi pisortat pikkorissarnissaat.
Transparency International tassaavoq nunarsuaq tamakkerlugu inuinnaat suliniaqatigiiffiat peqquserlunniartarnermik akiuiniarluni suliniarnermi siuttuusoq Kommuneqarfik Sermersoorlu nunatsinni kommunini kisiartaalluni Transparency Greenlandimut ilaasortaavoq.