”Ulloq ataaseq qatserisartuugit” ulikkaarlugu

Marlunngormat Nuummi meeqqat qatserisartutut sulilluni inuuneq misilippaat.

Meeqqat atuartut 20t missaanniittut ukiaanerani atuanngiffimmi ”Ulloq ataaseq qatserisartuunissamut” atorluarpaat.

Ullaap tungaa meeqqanik ikiueqqaarnermut atorneqarpoq. Meeqqat paasitinneqarput ajoqusersimasunik qanoq passussisoqartarnersoq, aammalu pisoqartillugu qanoq iliortoqassanersoq.

Ullup qeqqata kingorna meeqqat misilippaat ikuallattumik qamisaaneq, qatserisartut biiliinit slangemik qamisaallutik.

”Meerarpassuarnut ulloq nuannersuuvoq ilikkagaqarnarlunilu. Soqutigineqarluarnera nuannaarutigisorujussuuarput, inissallu tamarmik ulikkaariikatapput. Neriuppugut tassunga assingusunik arlalinnik meeqqanut workshoppertitsisinnaassalluta,” oqarpoq Arnanguak Lyberth, Kommuneqarfik Sermersuumi perorsaanikkut siunnersorti.

”Ulloq ataaseq qatserisartoq” aaqqissuunneqarpoq Kommuneqarfik Sermersuumi Peqqinnermut immikkoortumit Qatserisartoqarfimmillu.