Tasiilami utoqqaat pisinnaanerusut ineqarfianni aqquserngup tungaanut tummeralersuineq

Ukiuni arlaqalersuni Tasiilami utoqqaat pisinnaanerusut angerlarsimaffianni ilaatigut pitsorlulersimasuni oqaasiinnartigut anngussivigineqartarsimapput aqquserngup tungaanut tummeralersuisoqarnissaanik. Tamanna naammassineqanngisaannarlunilu oqaasiinnaajuaannarsimavoq. Najugaqartullu pitsorlulersimasut ilaatigut aqquserngup tungaanut aqqut nangiarisalersimavaat pingaartumik ukiukkut quatserfiitigut.

Utoqqarnut sullissinerup pitsaanngissusia arlalitsigut takutinneqartarpoq. Tamanna uggornarpoq ajuusaarnarlunilu. Taamaattumik utoqqarnut sullissineq pitsaanerusoq ujartorniarlugu oqaasiinnarnik isumalluarsaarineq tassunga killittariaqaraluarpoq.

1. Utoqqaat pisinnaanerusut najugaqarfiini aqquserngup tungaanut tummeraliornissaq qangalili

pilersaarutaasimappat, qaqugu tamatuma naammassineqarnissaa naatsorsuutigineqassava?

2. Pilersaarutit iluatsinngisaannarsimappata suna aporfiua? Qanorlu aaqqiivineqassava?

Asasara Kommunalbestyrelsimut ilaasortaq, Laura Táunâjik Uitsatikitseq (S)

Siullermik apeqqutigisannut qujanarujussuaq.

Ulloq 18. januaari 2022 “Tasiilami utoqqaat pisinnaanerusut ineqarfianni aqquserngup tungaanut tummeralersuineq” pillugu allaffeqarfimmut apeqquteqaateqarputit.

Sanarfinermut Avatangiisinullu Ingerlatsivik ima akivoq:

Asasara Laura Táunâjik Uitsatikitseq

Sanarfinermut Avatangiisinullu Ingerlatsiviup Tasiilami ineqarfiit eqqaanni tummeralersuinissamut

neriorsuisoqarsimanera ilisimasaqarfiginngilaa. Taamatuttaaq Tasiilami tummeralersuinissamut kommunip

sanaartugassanut missingersuutaani immikkut aningaasaliisoqarsimanngilaq.

Illut nammineq pigineqartut eqqaani tummeralersuinissaq pineqarsimappat, Kommuneqarfik Sermersuumit

pigineqanngitsut, Illuliortiternernut aningaasalersuineq pillugu Inatsisartut inatsisaat nr. 39, 23. november

2017-imeersoq maluginiaqquneqarpoq, tassani periarfissat pingasuupput.

§ 13 naapertorlugu taarsigassarsineq imaluunniit §19 naapertorlugu taarsigassarsineq imaluunniit

tapiiffigineqarnissaq §24a naapertorlugu (tamarmik allannerit issusuunik nalunaaqutsersorneqarput).

§ 13-imi illu BSU-mit illuutigineqarsimanissaa piumasaqaataanngilaq.

§ 19-imi illu soraarnermusiliammit pigineqarnissaa, najugaqarfigineqarnissaalu piumasaqaataavoq.

§ 24a-mi illut pineqartut tapersiissutitalimmik inissialiornermut taarsigassarsititsissutigineqarsimanissaat

aamma illunik piginnittut tapersiissutitalimmik inissialiornermut taarsigassarsisuusimanissaat

piumasaqaataavoq.

Tulliuttut Illuliortiternernut aningaasalersuineq pillugu Inatsisartut inatsisaat nr. 39, 23. november 2017-

imeersumit tigulaagaapput:

§ 13. Kommunalbestyrelsi inissiat pioreersut iluarsaannerinut, pitsanngorsarnerinut allilerneqarnerinullu

tassani aningaasartuutit tamarmiusut 40 %-ii tikillugit taarsigassarsisitsisinnaavoq taamaattorli

annerpaamik 300.000 kr.-inik.

Imm. 2. Inissiamut ataatsimut iluarsaassinernut, pitsanngorsaanernut imaluunniit allilerinernut

ataasiaannarluni taarsigassarsisitsisoqarsinnaavoq.

Imm. 3. Allilerinerup kingorna 110 m2-imik annertunerusumik angissuseqartunut inissianut allilerinermut

taarsigassarsisitsisoqarsinnaanngilaq.

§ 14. § 13 naapertorlugu taarsigassarsisitsinermut piumasarineqarpoq:

1) Inissiaq inissiamik piginnittumut, taassuma aappaanut imaluunniit meeqqanut inersimanngitsunut

inissiatut atorneqassasoq, inersimanngitsunut inissiatut atorneqassasoq.

2) Inissiaq piffissami qinnuteqarfiusumi ukiunik 20-inik pisoqaanerussasoq.

3) Inissiaq ikuallattoornissamut illullu ajoqusersinnaaneranut sillimmaserneqarsimassaaq aamma

sillimmasiinermi akiliutissatigut kinguaattoortoqarsimanani.

Imm. 2. Iluarsaassinermut, pitsanngorsaanermut allilerinermullu aningaasartuutit tamarmiusut sinnerinut

taarsigassarsisoq nammineq aningaasalersuissappat taamaallaat taarsigassarsisitsisoqarsinnaavoq.

Imm. 3. Aappaasumut sanilliunneqarpoq nalunaarsorsimalluni aapparisaq, imaluunniit ukiuni 2-ini

kingullerni inooqatigiissimappata, katissimanermut assingusumik inooqatigiinneq.

§ 15. Inuulluarniutitut taaneqarsinnaasunut iluarsaassinernut imaluunniit pitsanngorsaanernut

taarsigassarsisitsisoqarsinnaanngilaq.

§ 16. Inissiami qularnaveeqqusiussinikkut qulakkeerneqartumik taarsigassarsiatut

ernialersorneqanngitsutut akilersugassaanngitsutullu taarsigassarsisitsisoqassaaq. Inissiami

qularnaveeqqusiussinikkut taarsigassarsiaasinnaasut allat taarsigassarsinerup ataqqissavai. Inissiami

qularnaveeqqusiussinikkut taarsigassarsiaasinnaasut allat taarsigassarsinerup ataqqissavai.

§ 17. Kommunalbestyrelsip taarsigassarsisitsinera, tak. § 13 piginnittut nikinnerini

akiligassanngortinneqassaaq, aappariit akornanni piginnittut nikinneri eqqaassanngikkaanni aamma

averusernermut imaluunniit avinnermut atatillugu piginnittut nikinneri imaluunniit kommunalbestyrelse

allamik aalajangiisimanngippat.

§ 19. Soraarnermusialimmit inissiatut atorneqartunut aamma soraarnermusiaqartoq taassumalu

aappariunnagaa marluullutik inissiamik kisimiillutik pigineqartumut inissiamik pioreersumik

iluarsaassinermut kommunalbestyrelsi 300.000 kr.-it tikillugit taarsigassarsisitsisinnaavoq.

Imm. 2. Soraarnermusiaqartutut isigineqarput inuit utoqqalinersiuteqarnissamik, siusinaartumik

pensionisiaqarnissamik pisinnaatitaasut imaluunniit tjenestemand-itut pensionisiaqartut.

Imm. 3. Aappaasumut sanilliunneqarpoq nalunaarsorsimalluni aapparisaq, imaluunniit ukiuni 2-ini

kingullerni inooqatigiissimappata, katissimanermut assingusumik inooqatigiinneq.

Imm. 4. Peqatigisaanik kapitali 3 naapertorlugu taarsigassarsisitsisoqarsinnaanngilaq.

§ 24 a. Inissianut, inunnit ukiuni akileraarfiusuni kingullerni marlunni inunnit ukiumut 300.000 koruunit

inorlugit isertitaqarsimasunit pigineqartunut, imaluunniit inunnit, ulloq manna tikillugu isertitarisimasaat

apeqqutaatinnagit siunissami qanittumi inoqutigiinni ukiumut 300.000 koruunit inorlugit isertitaqartussatut

naatsorsuutigineqartunit pigineqartunut annerpaamik 150.000 koruuninik inissiamik iluarsaassinermut,

pitsanngorsaanermut imaluunniit alliliinermut kommunalbestyrelsi tapiissuteqarsinnaavoq.

Imm. 2. Taamaallaat inissiamut Namminersorlutik Oqartussanit taarsigassarsisoqarsimappat, imaluunniit

maanna piginnittuusut taarsigassarsisuullutik Namminersorlutik Oqartussanit taarsigassarsisoqarsimappat

kommunalbestyrelsi tapiissuteqarsinnaavoq.

Imm. 3. Meeqqanut suli angerlarsimaffimmi najugaqartunut, 18-it inorlugit ukioqartunut, najukkami inuit

nalunaarsorsimaffianni nalunaarsorsimasunut, taamaattorli amerlanerpaamik meeqqanut arfinilinnut,

isertitassanut killigititat meeqqamut ataatsimut 4.000 koruuninik qaffanneqartassapput.

§ 24 b. Piffissaq qinnuteqarfiusoq sioqqullugu qaammatit 60-it kingulliit ingerlanerini pisortat inissiamik

iluarsaassinissamut, pitsanngorsaanissamut alliliinissamulluunniit tapiissuteqarsimappata,

kommunalbestyrelsi tapiissuteqarsinnaanngilaq.

Imm. 2. Inissianut sumiiffinni, nalinginnaasumik inissiaq qularnaveeqqusiullugu aningaaserivimmit

imaluunniit realkreditimit taarsigassarsiviusinnaasuni inissisimasunut kommunalbestyrelsi

tapiissuteqarsinnaanngilaq.

Imm. 3. Kommunalbestyrelsip § 24 a naapertorlugu qinnuteqaammik naliliinermini uku eqqarsaatigissavai:

1) iluarsaassinissap kissaatigisap annertussusissaa,

2) alliliinerup pitsanngorsaanerulluunniit qinnuteqartup pigisaanut nalilinnut aammalu nammineerluni

suliaqarnissamut piginnaaneqarneranut sanilliunneqarnissaa, kiisalu

3) inissiap pisoqaassusia niuerutigineqarnermilu nalinga.

Imm. 4. Naalakkersuisut inissiamik iluarsaassinermut, pitsanngorsaanermut alliliinermulluunniit

maleruagassiorsinnaapput, taakkununngalu aqutsineq, aningasat tunniunneqarnerat suliassallu

tapiiffigineqarsinnaatitaasut ilaatinneqarput.

Qulaani allassimasut innuttaasunit qinnuteqarfigineqarusuppata, innuttaasut annertunerusumik

ilitsersuutsinnissamut Tasiilami kommunip allaffianut isumasiuinissaat innersuussutigineqarpoq.

Inussiarnersumik inuulluaqqusillunga

Hans Ulrik Skifte

Sanarfinermut Avatangiisinullu Ingerlatsivimmi pisortaq