Suliffeqarfimmi Kiffartuussineq

Tasiilami nunaqarfiinilu utoqqarnik kiffartuussineq

Lund Kuko

Asasara Kommunalbestyrelsimut ilaasortaq, Lund Kuko.

Siullermik apeqqutigisannut qujanarujussuaq.

2019-imi oktobarip 18-ianni ”Utoqqaat pisinnaanerusut angerlarsimaffianni kiffartuussinerup pitsaassusaa pillugu atuisut qanimut isumasiorneqartarnerat” pillugu allaffeqarfimmut apeqquteqaateqarputit. Suliffeqarnermut Isumaginninnermullu Ingerlatsiviup apeqqutit tulliuttut imaattut pissarsiarai:

  1. Utoqqaat kiffartuunneqarnermikkut naammagisimaarinninngikkunik sumut kimullu maalaaruteqassappat?
  2. Qaqugukkut utoqqaat pisinnaanerusut aqutsisunit pulaarneqarlutillu isumasiorneqartarpat?
  3. Peqqinnissaq eqqarsaatigalugu maangaannaq ineqarfiisa silataani qisertarnerit kia/kikkut akisussaappat ineqartut qaammarsaavigissallugit?
  4. Qanoq iliorunik pitsaasumik kiffartuunneqarnissaat angujumallugu Kommuneqarfik Sermersooq immikkoortortaqarfinni utoqqaat saaffigisarsinnaasaannik pilersitsisinnaappat?
  5. Peqareersimappat sooq sullissineq taamak eqartigiva? Suullu peqqutaasinnaappat?

Apeqqutigisannut tunngavilersuutitit tassaapput, Tasiilami nunaqarfiinilu utoqqaat pisinnaanerusuni najugallit utoqqaat illuanniit sulisunit eqqiaanikkut allatigullu kiffartuunneqarnikkullu ikiorneqartarput, taamaattoq utoqqaat anngussivissaaleqillutik arlaleriaq politikkerinut ataasiakkaanut saaffiginnittarnerat nutaarsiassaajunnaarsimavoq. Sullinneqarnikkut naammaginngisatik pillugit maalaarfissaaleqisarput. Allaallumi utoqqaat illuannut sianersimagaluaraangamik maalaaruteqarumallutik iliuusissamillu aaqqiissutaasinnaasumik siunnersuuteqarumallutik soqutigineqartarsimanngillat. Tamanna utoqqarnut ataqqinninnginneruvoq kusanaalluinnartoq, naak utoqqarnut politikki allakkatigut kusanaraluaqisoq taamaattoq pissutsit piviusut akuersaarnanngeqisut utoqqaat annguttarpaat.

Eqqiluisaarneq peqqinnissarlu eqqarsaatigalugu kiffartuussineq utoqqaat illuanniit aamma eqqumaffigineqartussaagaluarpoq, tamatuminngali sullissisut soqutigisaqannginnerat peqqutaalluni narrutsannartumik oqaloqatigeeriaraluarneq kipiinnartarsimavoq. Utoqqaat pisinnaanerusut najugaat Kommunep susassaqarfigaat, taamaattumik nakkutiginninneq peqqissaartumillu sullissineq eqaannerusoq qanimullu naaperiaaffiusoq ingerlasussaagaluarpoq.

SK

The administration's answer

Asasarput Lund,

Saaffiginnissutinnut qujanaq.

  1. Utoqqaat kiffartuunneqarnermikkut naammagisimaarinninngikkunik sumut kimullu maalaaruteqassappat?

Utoqqaat kiffartuunneqarnerminnut naammaginninngittut Tasiilami angerlarsimaffimmi ikiortit aqutsisuannut maalaaruteqarsinnaatitaapput, taamatuttaarlu nunaqarfinni angerlarsimaffimmi ikiortillit aqutsisuannut Nuummiittumut maalaaruteqarsinnaallutik. Aamma Isumaginninnermi Maalaaruteqartarfimmut naammagittaalliuteqarsinnaavutit.

  1. Qaqugukkut utoqqaat pisinnaanerusut aqutsisunit pulaarneqarlutillu isumasiorneqartarpat?

Innuttaasut, Tasiilami angerlarsimaffimmi ikiorteqartartut, angerlarsimaffimmi ikiortit aqutsisuannit qaammatit pingasukkaarlugit pulaarneqartarput. Aqutsisoq pulaartarpoq paasiniarlugu, innuttaasup ikiorneqartarnera ikorfartorneqartarneralu allannguuteqassanersoq paasiniarlugu.

Tasiilap nunaqarfiini allatut ingerlatsisoqartarpoq. Tasiilap nunaqarfiini angerlarsimaffimmi ikiortit aqutsisuat Nuummiippoq. Nuummi aqutsisup Tasiilap nunaqarfiini angerlarsimaffinni ikiortit suleqatigilluarpai, taamaalilluni aqutsisoq ulluinnarni pisunut malinnaatinneqartarpoq. Tasiilap nunaqarfiini angerlarsimaffinni ikiorneqartartut Tasiilamisulli pulaarneqarnissaminnut periarfissaqanngillat, pissutigalugu aqutsisoq Nuummi immikkoortortami allaffeqarmat.

  1. Peqqinnissaq eqqarsaatigalugu maangaannaq ineqarfiisa silataani qisertarnerit kia/kikkut akisussaappat ineqartut qaammarsaavigissallugit?

Angerlarsimaffimmi ikiorneqartartut pisariaqartitaat aallaavigalugit ikiorneqartarput. Inuit angerlarsimaffiup silataanut qisertartut kiap akisussaaffiginerai pillugu apeqqut ingerlatsiviup akisussaaffeqarfiata avataaniippoq. Ingerlatsiviup apeqqummut tunngatillugu Peqqinnissaqarfik Pinaveersaartitsisoqarfillu innersuukkusuppai. Innuttaasut ataasiakkaat soorunami aamma apeqqummut tassunga akisussaaqataapput.

  1. Qanoq iliorunik pitsaasumik kiffartuunneqarnissaat angujumallugu Kommuneqarfik Sermersooq immikkoortortaqarfinni utoqqaat saaffigisarsinnaasaannik pilersitsisinnaappat?

Atuisut kikkulluunnit Ingerlatsivimmut saaffiginnissaapput sullinneqarnissamut pitsannguutissanik siunnersuutissaqarunik. Apeqqut soqutiginartuuvoq, Ingerlatsivimmilu siunissami misissoqqitassatut soqutiginartipparput.

  1. Peqareersimappat sooq sullissineq taamak eqartigiva? Suullu peqqutaasinnaappat?

Kommuneqarfik Sermersuumi ingerlatsiviit utoqqarnut attuumassuteqartut saaffigineqarsinnaajuaannarput. Sullissinerup sumiiffinni ilaatigut eqarsinnaaneranut tunngaviit arlaqarsinnaapput, soorlu ilinniarsimasunik sulisussaaleqineq, sulisunik najumminninniarneq ilaatigut utoqqarnut sullissinermi unamminarsinnaasarmata.

Inussiarnersumik inuulluaqqusillunga

Isak Nielsen-Kleist

Suliffeqarnermut Isumaginninnermullu Pisortaq

Kommuneqarfik Sermersooq