Pineqartoq: Eqqartuussissuserisunut aningaasartuutit

Aningaasaqarnermut Inuussutissarsiornermullu Ataatsimiititami ilaasortap Dorthe-Marie Mogensen- Fontain-ip (S) suliami pappialanik takunninnissamut qinnuteqarneranut akissummut atatillugu pappialatigut paasivara kommune inissianut tunngatillugu inatsisitigut ikiorteqarnermut atatillugu aamma atorfeqartitsinermut tunngatillugu aningaasartuuterpassuaqartoq apeqqutigisimagaa. Tassunga atatillugu paaserusuppara Kommuneqarfik Sermersooq illumi inatsisilerituumik peqarnersoq, taakkulu immikkoortoqarfimmi sorlermiinnersut qanorlu amerlatiginersut, taakkulu suliassaqarfiat suunersoq kiisalu inatsisilerituumut ataatsimut akissarsiatigut qanoq aningaasartuuteqartoqartarnersoq. Allaffeqarfiup Aningaasaqarnermut Inuussutissarsiornermullu Ataatsimiititap ulloq 17. marsi 2022-mi ataatsimiinneranut atatillugu aaqqissuussaanerup iluarsartuunneqarnera pillugu ilisimatitsineranut atatillugu ersersinneqarpoq Malitsitsineq Inatsiseqarnerlu pillugit immikkoortoqarfik Periusissiaqarluni pilersaarusiornermut Misissueqqissaarinermullu Immikkoortortaqarfimmut nuunneqarsimasoq. Suliassamilli saqqummiussinermi erseqqissumik immikkoortoqarfiup suminngaanniit nuunneqarsimanera ersersinneqanngilaq. Taamaattumik tulliuttut akissuteqarfigineqarnissai kissaatigivara: sulisut qassit immikkoortoqarfimmut nuuppat aamma Malitsitsineq Inatsiseqarnerlu sumik siunertaqarpat? First Agendami immikkoortoqarfik taanna pillugu paasissutissat, taanna ujaasitikkaangakku, annikitsuinnaapput, taannalu pillugu paasissutissatuat saqqummertartut tassaapput ulloq 17. juuni 2021-mi Kommunalbestyrelsip ataatsimiinneranit matoqqasumi immikkoortumut tunngasoq kiisalu AIA-p ulloq 17. marsi 2022-mi ataatsimiinneraneersoq.
Siunertaq:
Aningaasaqarnermut Inuussutissarsiornermullu Ataatsimiititamut ilaasortatut akisussaaffiga malinniarlugu kommunip iluani suliassaqarfinni tamani aningaasaqarnikkut allaffissornikkullu ingerlatsinermi nakkutilliisuuneq suliarissavara, soorlu akissarsianut sulisoqarnermullu tunngasuni suliassanik tamakkiisumik isumaginninneq, tassunga ilaallutik kommunimi sulisorisanik atorfinitsitsisarneq soraarsitsisarnerlu”.

Asasara Inga Dóra G. Markussen,
Eqqartuussissuserisunut aningaasartuutit pillugu apeqquteqaatinnut qujanaq. Kommuneqarfik Sermersooq marlunnik inatsisileritooqarpoq – Suliffeqarnermut Isumaginninnermullu Ingerlatsivimmi ataaseq aamma Suliffeqarfimmut Kiffartuussivimmi ataaseq. Suliffeqarnermut Isumaginninnermullu Ingerlatsivimmi inatsisilerituup ingerlatsiviup suliassaqarfiani suliassat pingaarnerit suliarisarpai. Akissarsianut aningaasartuutit: qaammammut 59.884,97 kr.

Suliffeqarfimmut Kiffartuussivimmi inatsisilerituup inatsiseqarnermut aamma suliassat allat takkussuuttut suliarisarpai. Akissarsianut aningaasartuutit: qaammammut 59.401,73 kr. Inatsiseqarnermut Malitsitsinermullu Immikkoortortaq immikkoortortatut immikkoortutut kommunaldirektørip suliassaqarfianiittussatut 2019-imi ukiakkut pilersinneqarpoq. Immikkoortortami sulisoq ataasiinnaavoq. 2019-imi aggustip qaammataani pisortaqatigiinnut saqqummiunneqartoq naapertorlugu allaqqavoq inatsisit malittarisassallu kommunimut attuumassuteqartut tamaasa malinneqarnissaat atuutsinneqarnissaallu immikkoortortap suliassarigaa.

Inussiarnersumik
Ole Jakobsen
Kommunaldirektøri