Paamiut qannittuanni piffissami killilikkami qassusersorluni qaleralinniarnissamut periarfissiinissaq pillugu siunnersuut

Asasara Kommunalbestyrelsimut ilaasortaq, Dorthe-Marie Mogensen-Fontain (S).

Siullermik apeqqutigisannut qujanarujussuaq.

2022-mi novembarip ulluisa 28-anni allaffeqarfimmut apeqquteqaateqarputit una pillugu ”Paamiut qannittuanni piffissami killilikkami qassusersorluni qaleralinniarnissamut periarfissiinissaq pillugu siunnersuut”.

Apeqqutit imaattoq Suliffeqarfimmut Kiffartuussivimmit tiguneqarpoq:

“Kommunalbestyrelsemi Ataatsimiinnermi ulloq 05/10-2021 aalajangiiffigisassatut siunnersuutigisanni qulequtaqartumi: Paamiut qannittuanni piffissami killilikkami qassusersorluni qaleralinniarnissamut periarfissiinissaq pillugu siunnersuut. Aalajangiineq imaappoq

“Kommunalbestyrelsip aalajangerpaa siunnersuut ataatsimiititamut paasissutissat sukumiinerusut misissorneqarnissaat siunertaralugu ingerlateqqinneqassasut”

Siunnersuut ataatsimiisitamut paasissutissat sukumiinerusut misissorneqarnissaat siunertaralugu ingerlateqqinneqassasoq.

Siullertut uani erseqqissumik allanneqarsimanngilaq ataatsimiisitamut sorlermut ingerlateqqinneqassanersoq. Taamaattumillu suliassap uninngasinnaanera pinaveersaartinniarlugu erseqqinnerusumik uani aalajangiunneqarsimasoq pisariaqartippara ataatsimiisitaq sorlermut ingerlateqqinneqassanersoq allaqqassasoq, naak ilisimareeraluaripput sanarfinermut avatangiisinut ataatsimiisitaliap ataani aalisarnermut ataatsimiisitaliap ataaniittussaasoq. Taamaattumik imaqarniliani taakku allanneqarnissaat pingaaruteqarluinnarmat eqqaasitsissutigerusuppara.

Aappaattut suliaq sumut killippa? Maannami ukioq ataaseq qaangiussimalerpoq aalajangiunneqarmalli, suliallu killiffianik paasisaqarusuppunga.”

Suliffeqarfimmut Kiffartuussiviup aamma Sanarfinermut Avatangiisinullu Ingerlatsiviup apeqqutitit tiguai, imatullu akissuteqassallutik:

Suliffeqarfimmut Kiffartuussiviup akissutaa:

Ataatsimiinnermit imaqarniliami 5. oktobari 2021-mi ersarinnerusumik ataatsimiititamut sorlermut ingerlateqqinneqassasoq allanneqarsimannginneranut apeqquteqaatinnut qujanaq.

Imaqarniliaq atsiorneqarsimasoq allanngortinneqassasoq inatsisitigut tunngavissaqanngilaq. Kommunit aqunneqarnerat pillugu Inatsisartut inatsisaat nr. 29 17 november 2017-imeersumi § 16-imi ima allaqqavoq

Kommunalbestyrelsip aalajangiineri allanneqassapput aalajangiinernut imaqarniliami ataatsimiinnerit kingornatigut ilaasortanit ataatsimiinnermi najuuttunit atsiorneqartussami. Ilaasortani taakkunani kinaluunniit piumasaqarsinnaavoq isummani allaasoq naatsumik imaqarniliami allanneqaqqullugu, sulianilu pisortatut oqartussaasunut allanut ingerlateqqitassani piumasarisinnaallugu taassuma aamma imaqarniliap imaanik ilisimatinneqarnissaat. Ilaasortap taassuma suliap nassiunneqarnerani suliaq ilaqartissinnaavaa nammineq isummaminut tunngavilersuutigisaminik.

Taamaattoq oqaaseqaatitit Pisortaqatigiit Allatseqarfiannit tusaatissatut tiguneqarput maannamiillu aalajangiinerit matumasut ittut ersarinnerusumik imaqarniliamut allanneqartarnissaat isumagissallugit.

Sanarfinermut Avatangiisinullu Ingerlatsivik ima akissuteqarpoq:

Paamiut qanittuanni piffissami killilikkami qassusersorluni qaleralinniarnissamut periarfissinneqarnissaq pillugu suliamut apeqquteqaatinnut qujanaq.

Suliaq ingerlatsivimmit misissorneqarpoq. Kommunalbestyrelsip 5. oktobari 2021-mi ataatsimiinneranit imm. 14-imi aalajangiineq tunngavigalugu suliassamik saqqummiussassamik 2023-p ingerlanerani Sanarfinermut Avatangiisinullu Ataatsimiititamut kingornalu kommunalbestyrelsimut suliaqartoqarumaarpoq.

Aalisarneq pillugu inatsisartut inatsisaat nr. 18, 31. oktober 1996-imeersumi § 23 naapertorlugu Naalakkersuisut akuersissuteqarneratigut aalisarneq pillugu kommunit malittarisassaliorsinnaapput. Malitarisassat matumani Kommuneqarfik Sermersuumi inuussutissarsiuteqarnikkut qaleralinniarneq pillugu Ileqqoreqqusani qaleralinniarnermut ileqqoreqqusat 2014-imi Kommuneqarfik Sermersuumit akuersissutigineqarput.

Kommuneqarfik Sermersuumi inuussutissarsiuteqartut qassusersorlutik qaleralinniarneranni ileqqoreqqusami “qassusersorneq” ima paasineqassaaq: Ningittagarsorluni allatigullu qassusersorluni, taamaattoq bundgarnit pinnagit. Kommuneqarfik Sermersuumi inuussutissarsiuteqartut qassutit atorlugit qaleralinniarnerat inerteqqutaavoq. Kommunilli sineriaa kangianiittoq inerteqquteqarnermi tassani ilaatinneqanngilaq.

Ileqqoreqqusat uku aqqutigalugit immikkut akuersissuteqartoqarsinnaanngilaq.

Sinerissap qanittuani qaleralinniarneq pillugu Namminersorlutik Oqartussat nalunaarutaat nr. 46, 14. december 2020-meersumi § 8 naapertorlugu qassusersorluni trawlerinillu qaleralinniarneq inerteqqutigineqarput, taamaattoq sumiiffinni killilersukkani qassusersorluni qaleralinniarneq utaqqiisaasumik ileqqoreqqusaqarnikkut kommunit akuersissuteqartitsisinnaapput.

Sinerissap qanittuani qaleralinniarneq pillugu Namminersorlutik Oqartussat nalunaarutaat nr. 46, 14. december 2020-meersumi § 8 naapertorlugu piffissami killilikkami sumiiffimmi killilikkami kommunip ileqqoreqqusaani bundgarnersorluni immikkut aalisarsinnaaneq ingerlatsivimmit naliliineq malillugu imaanngilaq immikkut akuersissutissatut paasineqassasoq.

Misileraalluni aalisarnissamut akuersissuteqarniaraanni kommunip ileqqoreqqusai allanngortittariaqarput.

Paamiuni qaleralinnut tunngasut Nunatta Kujataanut attuumassuteqartinneqarput. 2022-mi biologit siunnersuinerat naapertorlugu pisassat 222 tons-iupput. 2020-mi pisat pillugit paasissutissat kingulliit pigineqartut naapertorlugit 391 tons-it pisarineqarsimapput. Taamaammat qaleralinniarneq biologinit naliliineq naapertorlugu piujuartitsinerunngilaq.

Malitseqartitsinerit ingerlatsivimmit qujassutigineqarpoq.

Inussiarnersumik inuulluaqqusilluta

Marie Fleischer
Kommunaldirektøriugallartoq

Hans Ulrik Skifte
Sanarfinermut Avatangiisinullu Ingerlatsivimmi pisortaq