Nuummi teriannissanik pisaqarnermi saniatigut naleqqussaaneq

Asasara kommunalbestyrelsimut ilaasortaq, Lone Rosengreen Pedersen (IA).

Siullermik apeqqutigisannut qujanarujussuaq.

Ulloq 31. aggusti 2023 “Nuummi teriannissanik pisaqarnermi saniatigut naleqqussaaneq” pillugu allaffeqarfitsinnut apeqquteqaateqarputit. Sanarfinermut Avatangiisinullu Ingerlatsiviup apeqqutit tiguaa, imaattoq:

”Misissuititsilaarusuppunga, eqqarsarlunga missingersuutit pillugit isumaqatiginninniarnissamut ilanngussinnaasannik.

Ulluni makkunani tuttut neqaat qumallit aammalu terianniat perlerornermik nappaateqartut allaaserineqartarput. Inuit, piniartut aalisartullu terianniarpassuaqarneranik oqaluttuartarput.

Pinngortitaleriffiup nittartagaaniittoq una tigulaariffigaara:

”Tuttoq miluuttumik Sarcocystis-imik timimioqalersimaguni neqaani qaqortut nimeruaartutut isikkoqartarput, qaqorteqqasutut isikkoqarsinnaasarlutik (2-3 mm miss. takissuseqarsinnaasarlutik 0,2-0,3 mm silissuseqalersinnaallutik, Takutitassiaq 6). Sarcocystis Milutut taama uumasut neqaanni soorlu, naavisa nuki sakiannilu ersiinnartarput, aammali quttoraaniissinnaallutik. Miluuttoq maggusimaffimminiittarpoq qaquguunersoq tuttup kiisortumit nerineqarnissaata tungaanut. Inerilluareeraangamik maniisarsuit kiisortup uninngaarfigisap nerisarisartagaasa aqqutanut pigaangamik inerilluarsinnaalersarput. Inerilluaraangamik uumasup uninngaffigisamik anassaanut akuleruttarput,. Manniisarsui nunaannarmi ukiorpaalussuarni uninngasinnaasarput. aatsaallu tuttunit nerineqareeraangamik tuttup nerisarfiata aqqutaanut magguttarput, manniligaangamillu taanna ineriartornerit arlallit aqqusaaqqaarlugit aatsaat nerisarfiata aqqutaaniit anillaattarpoq neqaanullu pigaangamik qaqortuaqqatut nimeruaartutut isikkoqartarlutik”. Kilde: https://natur.gl/rapporter-til-os/parasitter-hos-landpattedyr/

Tuttut qumanissimasut terianniarpassuaqarneranut attuumassuteqarput.

Apeqqutigerusuppara teriannianik pisaqarnermi saniatigut naleqqussaasoqarsinnaanersoq, ukiualuit matuma siornatigut soorlu taamaaliortoqarnikuusoq. Teriannianik pisaqarnermi saniatigut naleqqussaaniaraanni inatsisitigut qanoq iliuuseqartoqassava? Missiliuussamik pissarsisoqarsinnaanerluni akiliutinut allaffissornermullu aningaasartuutinut, assersuutigalugu terianniamik ataatsimik pisaqaraanni 300 kr.-nik akiliisoqassappat. Teriannissat qassit toqunneqassappat, pisaqarnermi saniatigut naleqqussaaneq ilumut iluaqutaanersoq paasiniarlugu?”

Lone Rosengreen Pedersen,

Nuummi teriannissanik pisaqarnermi saniatigut naleqqussaanissaq pillugu apeqqutinnut qujanarujussuaq.

Teriannissanik illersuineq piniarnerlu pillugit Namminersorlutik Oqartussat nalunaarutaat nr. 14, 18. oktober 2019-imeersoq. Nalunaarummi § 3 naapertorlugu piffissami 15. septemberimiit 15. maajip tungaanut teriannissanik piniartoqarsinnaavoq. Tamatuma saniatigut nalunaarummi § 8-mi allassimavoq, Kommunalbestyrelsi kommunimi ileqqoreqqusatigut malittarisassanik aalajangersaasinnaavoq kiisalu kommunip iluani sumiiffinni aalajangersimasuni teriannianik piniarnermut najoqqutassaliorluni. Kommunip ileqqoreqqusaa Aalisarnermut Piniarnermullu Naalakkersuisumit atuutilersinneqassaaq. Nalunaarummi §12-mi aamma allassimavoq, Aalisarnermut Piniarnermut Nunalerinermullu Naalakkersuisoqarfik ilisimatusarnermut, terianniaqatigiit naleqqussarnissaannut atatillugu nalunaarummi malittarisassat atuutsinneqannginnissaannik immikkut akuersissuteqarsinnaavoq. Ingerlatsiviup nalilerpaa, inatsisini pioreersuni sinaakkusiussani, annertusisamik teriannissanik naleqqussaasoqarnissaanik peqareersoq, tamanna kommunalbestyrelsip kissaatigissappagu. Teriannissanik pisaqarnermi saniatigut naleqqussaaneq  pisinnaagunarpoq kommunimi ileqqoreqqusaliornikkut imaluunniit nalunaarummit immikkut ittumik akuersissuteqartoqarneratigut. Kisianni taakku marluk pitillugit Alisarnermut Piniarnermullu Naalakkersuisoqarfik oqaloqatigineqartariaqarpoq, akulerutsitsisoqarluni aammalu ataqatigiissaarisoqarluni.

Akissuteqaateqarnissamut piffissaliussap iluani, pisaqarnermi saniatigut naleqqussaasoqassappat piviusorsiortumik missiliuussisoqarsinnaanera ingerlatsivimmit periarfissaqarfigineqarsimanngilaq. Taamaakkaluartoq ingerlatsiviup nalilerpaa, naleqqussaanissamut aaqqissuussisoqarnissaanut missingersuutitigut aningaasaliissutini aalisarnermut piniarnermullu ingerlatsinermut tunngasuni nassaarineqarsinnaassasut.  Taamaattoqassappalli apeqqutaalluinnassaaq, teriannissat qassit pisarinerini saniatigut naleqqussaasoqassanersoq aammalu qanorpiaq naleqqussaasoqarnissaanik kissaateqartoqarnersoq. Taamaakkaluartoq ingerlatsiviup nalilerpaa, naleqqussaanissamut aaqqissuussinissamik aallartitsinissaq naleqquttuunngitsoq, Pinngortitaleriffimmik aammalu Alisarnermut Piniarnermullu Naalakkersuisoqarfiup sukumiisumik oqaloqatigineqarnissaat aqqutissiuunneqarnissaq siunnersorneqarnissarlu sioqqullugit. Tamanna pineqarpoq sinaakkutissanik aammalu teriannissanik pisaqarnermi saniatigut naleqqussaanissamik pisariaqartitsineq tamassumalu kingunerisaanik tuttut neqaannik qumaqalersitsisinnaanerisa annikillisarnissaanut kingunerisinnaasai erseqqissaateqarfigineqarniassammata.

Inussiarnersumik inuulluaqqusillunga
Søren Sohn Krog Pedersen
Sanarfinermut Avatangiisinullu Ingerlatsivimmi pisortaq