Nuuk City Development

Maajip 28-ani-2019 borgmesteriusimasumut saaffiginnippunga NCD pillugu (mailikkut allakkat ilanngussat takukkit) taakkunanilu apeqqutigisakka akissuteqarfigineqarsimanngitsut sulilu akineqarnissaannik kissaateqarfigisakka pillugit. Takusinnaasassituut paasitinneqarpunga, illoqarfiup qeqqani atuarfittaassap neqeroorutigitinnera uteqqinneqassaaq, tassunga atatillugu suna peqqutaanersoq paaserusuppara, paasisakka naapertorlugit imaassimavoq, neqerooruteqartitsinermi atortut pitsaasuusimanngitsut, tamassumalu  soorunami eqqornersoq eqqunnginnersorluunniit paaserusuppara.

Ilanngullugu paaserusuppara ullumikkut kommunitsinni illoqarfimmik inerisaanissamut taama annertutigisumut aallartereersumut sulisut aqutsinermi atorneqartut naammannersut – soorlu mailinni takusinnaareerissi, apeqqut tamannarpiaq apeqqutigisimagiga.

NCD pillugu ukiumoortumik nalunaarusiat atuaraanni (https://ncd.gl/da/Om/Aarsrapporter) – takusinnaavarput, sulisunut tassa aningaasarsianut 8,2 mio ataatilaarlugit aningaasartuutaasimasut!!   sulisunut 5-nut tamakkiisumik sulisorineqartunut, qaammatini 15-ini, tassunga atatillugu paaserusuppara assersuutigalugu pisortaq qanoq akissarsiaqarnersoq, aningaasartuutit uatsinnut naleqarnersut naatsorsorsinnaaniassagatsigit.

Saaffiginissut tunngaviatigut NCD-mut tunngavoq (https://ncd.gl/da/), tamannalu qujanartumik kommunalbestyrelsimit tapersersorneqarpoq. Demokraatinut aamma pingaaruteqarsimavoq illoqarfitta ineriartortinneqarnissaa ulluinnarni kommunip ingerlanneqarneranit immikkoortinneqassasoq, taamaasilluni ineriartorneq ulluinnarni suliassanut akimmisaartinneqannginniassammat. Kisianni imaanngilaq uanga qinikkatut susoqarneranik isiginngitsuusaarniartunga. Ingerlatseqatigiiffik kommunalbestyrelsip aqutarinngikkaluaraa, taamaattoq suli akisussaaffeqarpugut, innuttaasut akileraarutaat matumani pineqartuartillugit.

Paasisinnaasara naapertorlugu, atuarfiliornissamut neqerooruteqartitsinerit uteqqinneqassapput, tamatumalu suliassaq kinguartissavaa, minnerunngitsumik isumaga naapertorlugu tamassuma kingunerissavaa, qaavatigut aningaasartuuteqaqqissasugut. Taamaattumik kissaatigaara tamatumunnga suna peqqutaanersoq paasissallugu.

Ilanngullugu apeqqutigerusuppara NCD-mi sulisut eqqortut sulisorineqarnersut – uanga isinnit isigalugu suliassami tamatumani pisariaqartinneqartut tassaapput, misilittagaqarneq, ilinniarsimasat aqutsinermullu piginnaasat. Anguniagassat angussagutsigit, una siunniuppara angusassarput angutserlugu sapinngisamik pitsaasunik siuttoqarnissarput. Oqaatigeriikkattuut kommunalbestyrelsimi NCD nuannariinnarlugu pilersinngilarput.

Ukiumoortumik nalunaarusiaq innersuussutigalugu uanga isinni aningaasarsiat maluginiarneruakka, aamma sulisunut aningaasartuutitut allassimasut. Isumaqarpunga aningaasarsiaqartitsineq ingasattajaarneruallaartoq. Tunniussisoqarpat, takusinnaalerutsigulu pitsaasunik angusaqartoqartoq inuit qanoq aningaasarsiaqartinneqaraluarpata ajoriffissaqartinngilarput. Kisianni takoruppara, innuttaasut akiligaannik pissarsissanersugut, imaappoq aningaasartuutaasut naleqarnerpat? Nalunngilara Namminersorlutik Oqartussat pitsaasumik ingerlatseqatigiiffinnik aqutsinissamut malittarisassaliornikuusut, ilaatigut taakkunatigut qulakkeerneqassalluni, ingerlatseqatigiiffinni ataasiakkaani ammanerusumik aqutseriaaseqarnissaq, taamaasilluni inuiaqatigiinni taamaalilluni tusatsiakkat naapertorlugit oqallittarnerit sapinngisamik annertunerpaamik pinngitsoortinneqarsinnaaqqullugit, soorunalimi tamanna uanga annertuumik soqutigaara kommunitsinni malissagipput, ammalu ingerlatseqatigiiffinni uagut aktietigut piginneqataaffigisatsinni ammanerunissamik isertuaatsuunginnissamillu oqallinnermi salliusariaqaratta. Oqaatigeriikkattut, akulerunnaveersaarnissaq paasisinnaalluarpara, kisianni akisussaaffik suli uatsinniippoq, akiliutivullu naapertorlugit pissarsinerluta paasisariaqarparput.

Ilanngullugu tupigusuutigaara, borgmesteriusimasumit nalunaarutigineqarsimaneratut sooq taanna ippassaq matoqqasumi ataatsimiinnitsinni ilaatinneqannginnersoq, taamaammallu kissaatigaara erseqqissaateqartoqassasoq, borgmesteriusimasup ernummatigisimasani sulilu ernumassutigisani uatsinnut avitseqatigiissutigerusunneraa tamattaalluta paasilluarniassagatsigu. Kommunitsinni ineriartortitsinissap kigaallassarnissaa KISSAATIGINNGILARA, sulialluunniit aallarteriikkat apeqquserusunngilakka, kisialli sulianik paasisaqarluarusuppunga, tassami kommunalbestyrelsimi ilaasortatut aamma tamatumani angorusutatsinnik annertuumik akisussaaffeqaratta.

Asasara Kommunalbestyrelsimut ilaasortaq, Randi Vestergaard Evaldsen (D) Siullermik apeqqutigisannut qujanarujussuaq.

Ulloq 12.juuni 2019-mi NCD pillugu allaffeqarfimmut apeqquteqaateqarputit.

Pisup ingerlarnganik Suliffeqarfimmut Kiffartuussivik matumuuna ima paasissutissiissutigineqassaaq:

Atuarfiup neqeroorutigineqarnera

Atuarfiup neqeroorutigineqarneranut atatillugu aallaqqaasiullugu tuniniaanermik ingerlatsisut sukumiisumik oqaloqatigineqarput neqeroorutinik pitsaasunik pissarsisinnaanermut periarfissat qulaajarniarlugit, kingorna suliffeqarfiit marluk neqerooruteqarnissamut piginnaaneqarsinnaanerarneqarput. Atuarfik Pisortat-Namminersortut suleqatigiinnerattut neqeroorutigineqarpoq illuutinik ukiuni 30-nik ingerlatsineq aserfallatsaaliinerlu ilanngullugit. Piffissap neqerooruteqartitsinerup nalaani neqerooruteqartup aappaata suliassamik ingerlatsisuni annaavaa tassungalu atatillugu neqerooruteqartitsinermit tunuarluni.

Taamaattumik ima pisoqarpoq neqerooruteqartitsinermut neqeroorummik saqqummiussisinnaasoq ataasiinnanngorluni. Tamanna tunuliaqutaralugu NCD-imi siulersuisut aalajangerput neqerooruteqartitsineq atorunnaarsinniarlugu neqerooruteqartitsinermi unammillersinnaaneq qulakkeerumallugu. Tamatuma kingorna siulersuisunit toqqarneqarpoq neqerooruteqartitsinermit siullermit misilittakkat aallaavigineqarnissaat, neqerooruteqartitsinermi atortussat ima aaqqissuullugit, neqeroorummi illuutinik ingerlatsineq aamma aserfallatsaaliineq periarfissanngorlutillugit.

Tassa avataani pissutitsit atorunnaartitsinermut pissutaapput aamma neqerooruteqartitsinermi atortussat pitsaassusiat pissutaanngilaq. Eqqaaneqassaarlu neqerooruteqartitsinermi atortussat pitsaassusiat naammaginartuummata.

Neqerooruteqartitseqqinnissaq neqeroorummik ullormut tunniussivissamut aamma atuarfiup atorneqalernissaanut sunniuteqarnavianngilaq tamanna pissutsinut nutaanut naleqqussarsimassagami.

Akissarsiat

Taamani kommunalbestyrelsimit NCD-mik pilersitsisoqassasoq aalajangerneqarmat, kissaatigineqarpoq sanaartugassatut pilersaarutinik ataqatigiissaarinermik ingerlatsivimmik aaqqissuussamik pitsaasumik mikisunnguamillu pilersitsoqassasoq. Inuttakitsunnguamik aaqqissuussinerup nassataanik aqitsusut sulisullu piginnaaneqarluartut pisariaqartinneqarput. Tamassuma aamma kinguneranik sulisunut ataasiakkaanut aningaasartuutit qaffasingaatsiarmata, paarlattuanik naliliisoqarluni tamanna tunuliaqutaralugu atorfillit amerlanngitsut pisariaqartinneqartut.

Qaammatini 15-ini sulisoqarnermi aningaasartuutit 8,2 mio.kr.-usut aamma iluanniipput NCD-mi siornatigut teknikkeqarnermut pisortaasimasup soraarnermi ajunngitsorsiassai, aamma taamaattumik sulisoqarnermi aningaasartuuterpiaasunik eqqoqqissaartunik takutitsigatik. NCD ukiuni aggersuni 10-ni 4 mia.kr.-it missaannik akilinnik sanaartornernik ingerlatsissapput, tamanna eqqarsaatigalugu sulisoqarnermi aningaasartuutit akuersaarneqarsinnaapput.

Ilanngullugu ingerlatseqatigiiffimmi pisortaaneq imannak akissarsiaqartinneqarpoq:

• Akissarsiat 1.320.000
• Ukiumoortumik sulinngiffeqarnermi angalaneq
• Akeqanngitsumik biileqartitaaneq – biili ulluunerani suliffeqarfiup biiliatut atugaavoq soraarnerussutisiassat

Piginnaassutsit

Inuussutissarsiornermut aamma Aningaasaqarnermut Ataatsimiititap upernaap ingerlanerani NCD- mi siulersuisut katitigaanerannik aalajangersaavoq.

Tassunga atatillugu inuit tulliuttut toqqarneqarput:

• Kommuneqarfimmi pisortaq Lars Møller-Sørensen (siulittaasoq) (Qinigaaqittoq)
• Jess G. Berthelsen (Qinigaaqittoq)
• Peter Olsson (AP Pension) (Nutaatut qinigaasoq)
• Inaluk Brandt (Qinigaaqittoq)
• Christian Bjerg (Aalborg Kommune) (Nutaatut qinigaasoq)
• Sanarfinermut Avatangiisinullu pisortaq Hans Henrik Winther Johansen (Qinigaaqittoq)
• Ulla Lynge (Qinigaaqittoq)

NCD-mi siulersuisut akisussaaffigaat qullersaqarfimmi issiasut piginnaasanik piginnaassutsinillu eqqortunik peqarnerat qulakkiissallugit. Tamannarpiaq qulakkeerniarlugu qullersaqarfik ukiumut ataasiarluni nalilersorneqartarpoq. Naliliineq taamaattoq siulersuisut juunimi 2019 kingullermik ataatsimiinneranni pivoq, qullersaqarfiup sulinera siulersuisunit naammagisimaarneqarpoq.

Angusat

Siorarsiorfik – Nuuk City Development A/S, ingerlatseqatigiiffiup pilersinneqarneranit 11⁄2 år missaa qaangiummat arfinilinnik sulisoqarpoq.

Ingerlatseqatigiiffik siullermeerluni 2019-imi apriilip aallartinnerani ukiumut naatsorsuutinik saqqummiussivoq, angusat annikitsumik ajunaarfiupput imaluunniit ukiup naatsorsuuseriffiusup tallineqarnera tunngavigalugu angusat nul-imik inerneqarput, talliliineq ingerlatseqatigiiffiup pilersinneqarneranut kingumoortumik atuuppoq.

Illoqarfiup qeqqani atuarfik nutaaq – Ingerlatseqatigiiffiit marluk suliassamut siumungaaq piukkussatut inissisimapput neqerooruteqartitsinerlu ingerlavoq. Atuarfik 2023-mi atorneqarsinnaalissasoq naatsorsuutigineqarpoq. Atuarfimmi aamma AKO taamatullu ukioqatigiinngitsunut meeqqerivik ilaassapput. Piareersarnermi Meeqqanut Atuarfeqarfeqarnermullu Ingerlatsivik peqataatinneqarput, atuisoqatigiit ilinniartitsisunik perorsaasunillu inuttallit peqataatinneqarlutik. Tamassuma kinguneranik atuisunut piareersaatit pigineqalerput taamaaliornikkut atuarfik siunissamut piareersimasutut pilersaarutigineqarpoq.

Nuuk Centerip allilerneqarnera – ilanngullugu ukioqatigiinngitsunut ulluunerani paaqqinnittarfik, inissiat aamma init inuussutissarsiornermik ingerlatsiffiit. Sanaartorneq ukiup nikinnerata missaani aallartissaaq.

Ukioqatigiinngitsunut meeqqerivik – meeqqeriviit pingasut ukiakkut neqerooruteqartitsinermik ingerlatsiffigineqassapput, imaalillugit illoqarfimmi sanaartornermik ingerlatsisut peqataatinneqarsinnaallutik. Aallaavigineqassaaq atuisunut pilersaarusiaq atuisooqatigiinnit suleqatigiilluni suliarineqarsimasoq aallaavigalugu, taakkua tassaasut Meeqqanut Atuarfeqarnermullu Ingerlatsiviup sinniisui aamma illoqarfimmi meeqqerivinnit perorsaasut suliamik ingerlatsisut.

Taakkua saniatigut naluttarfik Malik-p eqqaani ukioqatigiinngitsunut meeqqerivimmik sanaartortoqassaaq.

Inissiat – siorna NCD inissiat 1006-it pissarsiarai aningaasalersornissaat siunertaralugit. Inissianik sanaartornissaq pilersaarusiarineqarpoq Nuuk Centerip allilerneqarnissaanut atatillugu aamma ukiuni tulliuttuni inissiatut suliniutaavissunut atasumik.

Sanaartorfigissaaneq – suliniutit arlallit aallartinneqareerput aamma suliniutit allat ukiuni tulliuttuni 5 aallartittussatut pilersaarutaapput.

Sissaq atuarlugu aqqusineeraq – immikkoortoq siulleq 2019-imi naammassissaaq.

Siorarsiorfimmut sulluliaq imaluunniit aqqusineq – Misissuinertut suliaq sapaatip-akunnerini aggersuni naammassisussatut pilersaarutigineqarpoq, kingorna aaqqiissutissatut siunnersuut Kommuneqarfik Sermersuumi aalajangiiffigineqartussatut saqqummiunneqassaaq. Naatsorsuutigineqarpoq sanaartornermik suliaq aasakkut 2020 aallartinneqassasoq, aalajangiineq erniinnartuumik suliarineqassappat.

Suliniutinut siullernut aningaasaliissutissat Grønlandsbanken, Nykredit aamma BankNordik aqqutigalugit inissinneqareerput. Suliniutinut aggersunut aningaasassanik pissarsiniarneq Deloitte suleqatigalugu aallartinneqareerpoq, aamma ingerlatsiviup siulersuisuisa kiisalu Kommuneqarfik Sermersuup qanimut oqaloqatigiinnerat aqqutigalugu ingerlanneqarluni.

Toqqaanermik ingerlatsineq

Kommuneqarfik Sermersuumi ingerlatsivinnut pitsaasumik ingerlatseriaaseqarneq Namminersorlutik Oqartussanut atuuttumut assingusoq najoqqutarineqarpoq.

Taamatuttaaq Kommuneqarfik Sermersoq ilaatigut Transparency Greenlandimit annertuumik nersualaarneqarpoq piginneqatigiiffiit siulersuisuisa suliamik ingerlatsinerisa pitsanngorsarneqarnerannik qulakkeerinninnermik suliaqarneranut.

Siulersuisunut ilaasortanik innersuussisarneq periuseq tulliuttoq naapertorlugu ingerlanneqartarpoq.

Kommunimi CV-nik toqqorterivimmik pilersitsisoqarsimavoq siulersuisunut ilaasortassanik piukkunnarnerpaanik ujaasisarfissatut atugassamik. Piukkunnaatillit CV-nik toqqorterivimmi ilanngunneqartut allaffissornermit ilanngunneqarumallutik aggersarneqartarput, kiisalu nittarsaasinikkut aamma ulluinnarni nutaarsiassanit oqaluuserineqartut tunuliaqutaralugit. Toqqorterivimmi ilanngussat siunissami amerliartortinneqartuassapput ilaasortanngorsinnaasutut tunngavissat piukkunaateqarluartut pigiumallugit. CV-nik toqqorterivik kingullermik januaarimi 2019 nittarsaanneqarpoq. CV-nik toqqorterivimmut ilanngutsinneqarnermut atatillugu allaffissornermit piukkunnaatillit ataasiakkaat piginnaasaat nalilerneqartarput tunngaviatigut CV aallaavigalugu. Iserit A/S, Nuup Bussii A/S aamma Siorarsiorfik – Nuuk City Development A/S-imi siulersuisunut tunngatillugu piginnaasat assigiinngitsut katersorneqarnerannik nalunaarsuinermik suliaqartoqarpoq, ingerlatseqatigiiffiup piginnaasaannut ilisarnaatai aallaavigineqarlutik, tamannalu aallaavigalugu piginnaasanik pisariaqartitat aamma piukkunnaatillit pisariaqartitat naapeqatigiissinneqartassapput. Nuuk Imeq A/S pillugu piginnaasanik nalunaarsuineq suliarineqanngilaq kommuni ikinnerussuteqarluni piginneqataanera pissutigalugu.

Naliliinerit taakkua aallaavigalugit allaffissornermit piukkunnaatilinnik innersuunneqarnerat suliarineqartarpoq.

Qulaani pissutsit taaneqartut saniatigut kommunimit ilisimatitsissutigineqassaaq kommunip aamma NCD-p akornanni isumaqatigiissutigineqarmat killiffiit pillugit politikerinut ilisimatitsinerit aamma tullissaanik ilisimatitsissutinik nutaanik saqqummiussineq Aningaasaqarnermut Inuussutissarsiornermullu Ataatsimiititamut juunip 27.-ianni 2019 pissasoq

Inussiarnersumik inuulluaqqusillunga, Lars Møller-Sørensen, Kommuneqarfimmi pisortaq