Laura Taunâjik Uitsatikitseq ·
Laura Taunâjik Uitsatikitseq
Asasara Kommunalbestyrelsimi ilaasortaq, Laura Táunâjik Uitsatikitseq (S)
Siullermik apeqqutigisannut qujanarujussuaq.
2024-mi februaarip tallimaani allaffeqarfimmut apeqquteqaateqarputit NUIKI Kuummiit 2024-mut tunngasoq.
Suliffeqarnermut Isumaginninnermullu Ingerlatsiviup apeqquteqaatit tiguaa imaattoq:
”
Ukiuni marluusuni NUIKI Kuummiini ingerlanneqarsimavoq. Inuusuttut unittoornikut imaluunniit ingerlariaqqinngitsoornikut NUIKI aqqutigalugu atuaqqinnissaminnut karakteriminnut qaffassarfittut ingerlattarpaat. Atuartut hold ataatsit 15-nik amlerlassusilerneqarput, taakkunani ukiup siuliini tamangajarluinnarmik naammassinnillutik.
Maanna hold-ni ingerlasuni ikinnerugaluarlutik ilaqarput pimoorussilluinnartunik. Tamanna inuusuttunut periarfissaq annertuujuvoq ilinnialernissamut alloriartitsisuulluni. Tasiilaq-mi Majoriaq inissaqartitsiniarnikkut tigusinnaasai killeqangaatsiartuupput, taamaattumik nunaqarfigisaq qimannagu atuaqqissinnaaneq inuusuttunut iluatikkunnartorujussuuvoq.
Apeqqut/tit:
- Aasamut August 2024 NUIKI Kuummiini ingerlanneqaqqissava?
- Ingerlanneqaqqinnianngippat suna tunngaviua?
- Allamik taarsiullugu NUIKI pilersaarutinik ingerlasoqarpa?
”
The administration's answer ·
The administration's answer
Asasara Laura Táunâjik Uitsatikitseq
NUIKI Kuummiit 2024 pillugu allaffeqarfimmut apeqqutinnut qujanaq.
Kommunalbestyrelsimi ilaasortap Laura Táunâjik Uitsatikitseq apeqquteqaataa NUIKI Kuummiit 2024 pillugu, apeqqut nassiunneqartoq innersuussutigalugu tulliuttut paasissutissiissutigisinnaavakka:
- Aasamut NUIKI Kuummiini ingerlanneqaqqissava?
Ingerlatsivimmit akissut:
NUIKI-mik ingerlatsineq, Namminersorlutik Oqartussanit neqeroorutigineqartarpoq kommunini ataasiakkaani ingerlatsiviit ass. Suliffissaqarneq saaffigineqarnerisigut. Ukiuni kingullerni pingasuni Kommuneqarfik Sermersooq kommunimi nunaqarfinni NUIKI-mik ingerlatsisoqarnissaanut neqeroorutinik akuersisarsimavoq, Qeqertarsuatsiaani ataasiarluni aamma Kuummiini marloriarluni ingerlatsisoqarluni. Suliniuteqartoqarnissaanut pisariaqartitsineq naliliinermi aallaavigineqartarpoq, nunaqarfimmi pineqartumi inuusuttunik arlalinnik ilinniakkamik imaluunniit suliffimmik suli aallartitsisimanngitsunik najugaqartoqartillugu. Suliffeqarnermut Isumaginninnermullu Ingerlatsivimmit nalilerneqarpoq, Kuummiini ukiumi matumani NUIKI-mik suliniummik nutaamik ingerlatsisoqarnissaa naapertuutinngitsoq.
- Ingerlanneqaqqinnianngippat suna tunngaviua?
Ingerlatsivimmit akissut:
Suliffeqarnermut Isumaginninnermullu Ingerlatsivimmit naliliisoqarpoq Majoriaq Tasiilaq, Tasiilami eqqaanilu aqqutissiuussinermut akisussaasuusumit maanna pisariaqartinneqartoq, Kuummiini ukiut siuliini marlunni NUIKI-mik ingerlatsisimanerup kingumut qiviarneqarnissaa.
Pingaarnertut pineqarpoq inuusuttut katillugit 30-t aqqutissiuunneqarnerat, taakkua NUIKI-mik ingerlatsisimapput taakkualu aammaarluni ukioq manna aqqutissiuunneqarnerannut nukinnik ukkassinermillu atuisoqaqqissaaq. Inuusuttut taakkua ilinniagaqalernissamut ingerlariaqqinnissaannut imaluunniit Kuummiini, Tasiilami suliffeqalernissaannut Majoriamit aqqutissiuunneqassapput, imaluunniit suliniutinik allanik neqeroorfigineqarlutik, tamannalu Kuummiini suli qulakkeerneqarsimanngilaq. NUIKI-mik suliniut sunniuteqassappat sinaakkutissatut piumasaqaatit pisariaqartut taakkuupput.
- NUIKI-mik ingerlatsinerup saniatigut pilersaarutinik allaanerusunik peqarpa?
Ingerlatsivimmit akissut:
Ingerlatsivimmit ingerlaavartumik eqqarsaatigineqartarpoq NUIKI-mik suliniummik aallartitsisoqaqqissanersoq, Kuummiini aamma nunaqarfinni allani. Ukioq manna aggusti aallarnerfigalugu Majoriaq Tasiilaq, modul-ikkaanik atuartitsinermik neqerooruteqassaaq, MA-mik – FA piunnaarlugu, atuartitsineq taamaattoq atuartunut nunaqarfinneersunut neqeroorutissatut naapertuuttutut nalilerneqarpoq. Taamaattumik atuartut kajumissaarneqassapput, ilinniagaqarnermut aaqqissuussamut ingerlaqqinnissaminnut karakterinik amigaateqarsimagunik Majoriaq Tasiilamut qinnuteqaqqullugit, tassani aamma ukioq kaajallallugu atualertussanik isaatitsisoqartassaaq.
Kuummiini nunaqarfimmi inuusuttut amerlangaatsiartut Tasiilamukartussaanerat pissutigalugu Kuummiinit inuusuttunut kollegiami inissat “aalajangersimasumik atugassiissutigineqassapput”, taamaaliornikkut Kuummiinit atuartut qulit tikillugit Majoriaq Tasiilaq, MA-mi atualersinnaasutut akuerineqarsinnaassapput.
Inussianersumik inuulluaqqusillunga
Ejnar Grønvold
Suliffeqarnermut Isumaginninnermullu Ingerlatsivimmi pisortaq