Naya Sophia Pedersen Lyberth ·
Naya Sophia Pedersen Lyberth
Asasara Kommunalbestyrelsimut ilaasortaq, Naya Pedersen Lyberth (IA)
Siullermik apeqqutigisannut qujanarujussuaq.
Ulloq 14. marsi 2024 nikerartumik suliffiit aamma innuttaasut piginnaasakillisimasut pillugit allaffeqarfimmut apeqquteqaateqarputit.
Suliffeqarnermut Isumaginninnermullu Ingerlatsiviup apeqqutit tulliuttut imaattut pissarsiarai:
“-Innarluutilinnik killilimmik sulisitsisinnaanermut suliffeqarfiit qanoq amerlatigippat/kikkuuppat?
-Innarluutilittut nalunaarsorsimasut qanoq sulisinneqarpat?
-Suliffeqarfimmi qanoq tapersersorneqarpat, ilitsersorneqartarpat?
Innarluutilittatta sulisinneqarnerat qanoq annertutiginersoq paaserusuppara, inuiaqatigiinni kikkut tamarmik atorfissaqartinneqarmata. Suliffeqarfiit ataasiakkaat innarluutilinnik killilimmik sulisitserusuttut Kommunitsinni qassiuppat/sorliuppat? Aamma taakku sulisitsinissaminnut qanoq piareersimatigippat? Innarluutillit sulilernerminni tapersersorneqartarnerat qanoq pisarnersoq, innarluutillit suliffimmik paarsiinnarsinnaatinniarlugit.
Sulisinnaasortatta ikiliartornerannut una tunngaveqarpoq?.”
The administration's answer ·
The administration's answer
Asasara Naya Pedersen Lyberth
Nikerartumik suliffiit aamma innuttaasut piginnaasakillisimasut pillugit allaffeqarfimmut apeqqutinnut qujanaq. Taakku pillugit imatut ilisimatitsisinnaavugut:
- Inunnik innarluutilinnik nikerartumik sulisitsisinnaasut suliffeqarfiit qanoq amerlatigippat/kikkuuppat?
Sulisinnaassuseq ataavartumik annertuumillu annikillisimagaangat nikerartumik suliffimmut atorfinitsitaasoqarsinnaavoq. Nikerartumik sulisutut aaqqiissummut tunngatillugu sulisitsisoq sulisup tunngaviusumik akissarsiaanut 50%-inik utertitsisarpoq.
Kommuneqarfik Sermersooq maannakkuugallartoq inunnik 32-nik nikerartumik sulisoqarpoq.
Taamaalilluni nikerartumik suliffillit agguataarnerat imaappoq:
- Ittoqqortoormiit: 0
- Tasiilaq: 3
- Tusass: 1
- Meeqqat Iluat: 1
- Qatserisartoqarfik: 1
- Paamiut: 3
- Oqartussaaffeqarfimmi immikkoortortaqarfik: 1
- Iserit A/S: 1
- Paamiumi timersortarfik: 1
- Nuuk: 26
- Suliffeqarnermut Isumaginninnermullu Ingerlatsivik: 2
- Ippiarsuk: 1
- Namminersorlutik Oqartussat: 4
- Pinngortitaleriffik: 1
- Pisiffik: 3
- SANA: 4
- Grønlandsrevisionskontor: 1
- Brøndum A/S: 1
- The Element: 1
- EMJ-Atcon Atcon Sulisa ApS: 1
- Centrum Grill: 1
- Nuummi Kigutileriffik: 2
- Royal Greenland: 1
- Kalaallit Nunaanni Konpap: 1
- Greenlandic Seafood: 1
- Nilak A/S: 1
- Innarluutilittut nalunaarsorsimasut sunik suliassinneqartarpat?
Nikerartumik suliffeqarnermi nalinginnaasumi sulisoq suliffeqarfimmi atorfeqareerluni napparsimalersimasarpoq / piginnaasakillisimasarpoq. Taamaalilluni sulisoq ilisimaneqartoq sungiussisimasorlu suliassanik siornatigutut suliarinnittarpoq, kisiannili assersuutigalugu sulinerup sivisussusaanut tunngatillugu nikerartumik atugassaqartinneqarluni. Suliffeqarfik sulisup suliffimmi piginnaasaasa attatiinnarnissaanut periarfissinneqartarpoq, saniatigullu sulisup suliffimmut atanera attanneqarsinnaalluni.
Inuit innarluutillit pillugit peqqussutip atorunnaarsinneqarneratigut aamma inuit innarluutillit pillugit inatsisip 2020-meersup atuutilersinneqarneratigut inunnik innarluutilinnik nalunaarsuilluni suliaqarneq unitsinneqarpoq.
- Suliffeqarfimmi qanoq tapersersorneqarpat, ilitsersorneqartarpat?
Nalinginnaasumik Suliffissarsiuussisarfik suliffeqarfimmit saaffigineqartarpoq, tassani sulisoq, piginnaasakillisimasoq – assersuutigalugu napparsimaneq pillugu kingunerluuteqarsimasoq- pillugu nikerartumik sulinissamut isumaqatigiissuteqarnissaq siunertaralugu. Taamaattumik sulisoq nikerartumik sulilernerup nalaani suliffimminik sungiussisimareertarpoq taamalu Majoriamit tapiissutit ataavartumik illuatungeriinnit pingasunit isumaqatigiissutaasarput.
Majoriaq nikerartumik sulinissamut innersuussisuutillugu, Majoriaq sulisup ilitsersorneqarnissaanut kaammattuisuussaaq aqqutissiuussillunilu.
Inussiarnersumik inuulluaqqusilluta
Ejner Grønvold
Suliffeqarnermut Isumaginninnermullu Ingerlatsivimmi pisortaq