Nammineq illuutimik nutarsaanissamut qinnuteqarnissamut periarfissat suunerinik ujartuineq

Nammineq illuutimik nutarsaanissamut qinnuteqarnissamut periarfissat suunnerinik ujartuineq.

Piginnittoq peqquteqartumik suliunnaarsimappat / napparsimalersimappat / innarluuteqalersimappalluunniit illup nutarsarnissaanut pisariaqartitat Kommunep iluani qinnutigineqarsinnaappata qinnuteqarnissaq sumut saaffiginnissutigineqassava, sumilu immersuissava?

Qulaani taaneqartut pillugit innuttaasut kommunetta iluani pisariaqartitsisut saaffissaaleqisut naammattuugassaasarput. Isertitaat annikippallaarneri peqqutigalugit Bank-mut atorsinnaaneq killeqarluinnarsimavoq. Taamaattumik kiassaatit igalaalluunniit taarserneqarnissaannut sumut qinnuteqartoqarsinnaanersoq Kommunetta iluani periarfissaqarnersoq ujartorpara. Taamaattoqarsimappallu qanoq tamanna pisarnersoq itinerusumik paasisaqarfigerusullugu.

Asasara kommunalbestyrelsimi ilaasortaq, Laura Táunâjik Uitsatikitseq (S).

Siullermik apeqqutigisannut qujanarujussuaq.

Ulloq 10. oktoberi 2021 ” Nammineq illuutimik nutarsaanissamut qinnuteqarnissamut periarfissat suunnerinik ujartuineq. ” pillugit allaffeqarfitsinnut apeqquteqaateqarputit.

Illuliortiternernut aningaasalersuineq pillugu Inatsisartut inatsisaat nr. 39, 23. november 2017-imeersoq iluarsaassinermi taarsigassarsinerneq pensionisialinnullu taarsigassarsititsinermik ilaqartoq kommunit aqutaraat.

Nutarterinissamut taarsigassarsiissutissat

Inissiat pioreersut iluarsaannerinut, pitsanngorsarnerinut allilerneqarnerinullu tassani aningaasartuutit tamarmiusut 40 %-ii tikillugit Kommune taarsigassarsisitsisinnaavoq, taamaattorli anmerlanerpaamik 300.000 kr.-nik. Sinneruttut 60 %-ii illit nammineq akilersinnaasariaqarpatit.

Taarsigassarsiniaraanni makkua naammasseqqaarneqassapput:

·         Inissiaq inissiamik piginnittumut, taassuma aappaanut imaluunniit meeqqanut
inersimanngitsunut inissiatut atorneqassasoq

·         Inissiaq qinnuteqarnerup nalaani ukiut 20-t sinnerlugit pisoqaassuseqarpat

·         Inissiaq ikuallattoornissamut aamma illup ajoqusersinnaaneranut sillimmaserneqarsimanissaa aamma sillimmasiinermi akiliutissani kinguaattoortoqarsimannginnissaa

·         Iluarsaassinernut pitsanngorsaanernullu inuulluarniutaassanngitsut, assersuutigalugu spabad

Qinnuteqaat kommunimut nassiunneqsasaaq, makkuninngalu imaqarluni:

1. Iluarsartuussinissamut, pitsanngorsaanissamut allilerinissamullu kissaatigineqartumut nassuiaat
2. Illu pillugu nassuiaat, matumani pisoqaassusaa, angissussaa qanorlu pitsaassuseqarnera ilanngullugit
3. Suliassamut tamakkiisumik aningaasartuutissat pillugit missingersuusiaq*
4. Kommunimiit nunaminertamik atuinissamut akuersissut imaluunniit nunaminertamik atuinissamut inniminniineq, suliassat pineqartut suliarinissaannut nunaminertamik atuinissamut akuersissuteqarneq pisariaqassappat
5. Illit nammineq ilaannakortumik aningaasalersuisinnaanerit uppernarsarneqarsinnaappat
6. Qinnuteqartup inuup normua, najugaqarnermullu uppernarsaataa
7. Illumik piginnittuunermut uppernarsaat
8. Illit qinnuteqartutut pisortanut akiitsoqannginnerit, akilerneqanngitsunik pillugu Akiliisitsiniartarnermut oqartussat uppernarsaataat

Pensionisialinnut taarsigassarsiissutissat

Pensionisialinnut imaluunniit siusinaartumik pensionisialinnut, nutarterinissamut taarsigassarsititsinernut sanilliullugu piumasaqaataanngilaq, inissiaq aalajangersimasumik pisoqaassuseqarlunilu angissuseqassasoq.

Taamaattorli iluarsartuussinissamut taarsigassarsiniarnissamut qinnuteqaateqartoqarsinnaavoq – imaappoq, pitsanngorsaatinut imaluunniit allilerinerit pinnagit.

Inissianik pioreersumik iluarsartuussinermut kommune 300.000 koruunit tikillugit taarsigassarsisitsisinnaavoq. Inissiaq pensionisiaqartumit najorneqassaaq, pensionisiaqartullu aappaqaruni aappanilu marluullutik illu pigissavaat.

Taarsigassarsiniaraanni makkua piumasaqaataapput:

·         Iluarsartuussisitsinissamut aningaasalersuinissamut nalinginnaasumik piumasaqaataasuni, aningaaserivimmit imaluunniit realkreditinstitutsimit taarsigassarsitinneqarnissamut itigartitaasimaguit.

·         Inissiaq ikuallattoornissamut aamma illup ajoqusersinnaaneranut sillimmaserneqarsimanissaa aamma sillimmasiinermi akiliutissanik kinguaattoortoqarsimannginnissaa.

·         Aapparisap piginneqataasup (aappaqarsimaguni) iluarsartuussinissaq taarsigassarsinissarlu akuersaarsimassagaa

Qinnuteqaat kommunimut nassiunneqsasaaq, makkuninngalu imaqarluni:

1. Iluarsartuussinissamut, pitsanngorsaanissamut allilerinissamullu kissaatigineqartumut nassuiaat.
2. Illu pillugu nassuiaat, matumani pisoqaassusaa, angissussaa qanorlu pitsaassuseqarnera ilanngullugit
3. Suliassamut tamakkiisumik aningaasartuutissat pillugit missingersuusiaq*.
4. Kommunimiit nunaminertamik atuinissamut akuersissut imaluunniit nunaminertamik atuinissamut inniminniineq, suliassat pineqartut suliarinissaannut nunaminertamik atuinissamut akuersissuteqarneq pisariaqassappat
5. Illit nammineq ilaannakortumik aningaasalersuisinnaanerit uppernarsarneqarsinnaappat
6. Qinnuteqartup inuup normua, najugaqarnermullu uppernarsaataa
7. Illumik piginnittuunermut uppernarsaat
8. Illit qinnuteqartutut pisortanut akiitsoqannginnerit, akilerneqanngitsut pillugit Akiliisitsiniartarnermut oqartussat uppernarsaataat

Boligstøtte aqqutigalugu inissiat iluarsartuunnissaannut, pitsanngorsarnissaannut allilernissaannullu tapiissutit

Januaarip aallaqqaataani 2020-miit illuliortiternermut aningaasalersuineq pillugu inatsit nutaaq atuutilerpoq. Una inatsit naapertorlugu innuttaasut namminneq inigisaminnik iluarsartuussinissamut, pitsanngorsaanissamut imaluunniit allilerinissamut kommunimit tapiffigineqarnissamik qinnuteqaateqarnissaminnut periarfissaqarput.

Kommune amerlanerpaamik 150.000 kr.-nik tapiissuteqarsinnaavoq.

Tapiissutinik pissarsiniaraanni makkua naammassineqassapput:

• Inissiaq tapiiffigineqarnissamik qinnuteqarfiusoq, inunnit, ukiuni marlunni kingullerni inaarutaasumik akileraarusersuiffiusumi ukiumut inoqutigiinni 300.000 kr.-it ataalugit isertitaqarsimasunit pigineqassaaq.

• Isertitatut killigititat 4.000 kr.-it qaffanneqartassapput meeqqamut angajoqqaaminni najugalimmut ataatsimut 18-it inorlugit ukiulinnut, inuit allattorsimaffiat naapertorlugu najukkami nalunaarsorsimasumut. Tamannali meeqqanut amerlanerpaamik arfinilinnut atuuppoq. Isertitatut killigititat amerlanerpaamik 24.000 koruunimik qaffanneqarsinnaapput.

• Tapiissuteqarfigineqassaguit pisariaqarpoq, inissiaq pineqartoq maannakkut piginnittui taarsigassarsisoralugit Namminersorlutik Oqartussanit taarsigassarsititsiffiusoq, imaluunniit taarsigassarsititsiffiusimasoq.

 Qinnuteqaat kommunimut nassiunneqsasaaq, makkuninngalu imaqarluni:

1. Iluarsartuussinissamut, pitsanngorsaanissamut allilerinissamullu kissaatigineqartumut nassuiaat.
2. Illu pillugu nassuiaat, tassunga ilanngullugit B-nr., pisoqaassusaa, angisussaa, qanorlu pitsaassuseqarnersoq
3. Suliarinerani aningaasartuutit tamakkerlugit missiliuusisaq imaluunniit neqeroorut § 7 naapertorlugu.
4. Suliassamut nunaminertamik atugassinneqartariaqarpat, kommunalbestyrelsimit nunaminertamik inniminniissut imaluunniit nunaminertamik atuagassiissut.
5. Nammineq aningaasalersuisinnaanermut uppernarsaat
6. Qinnuteqartup najukkamut uppernarsaataa, illoqatigiillu kikkuunersut
7. Qinnuteqartumut ukiut kingulliit marluk akileraarfiusut pillugit ukiumoortumik nalunaarusiat, illoqatigiilu kikkuuneri
8. Qinnuteqartup qaammatit pingasut kingulliit akissarsianut allagartai, illoqatigiinnilu kikkuunersut
9. Sillimmatitut atuuttup uppernarsaataa

Taarsigassarsiat maannakkut killiffiat

Ukiuni kingullerni marlussunni sanaartornerujussuup kingunerisaanik, pisortat taarsigassarsititsinissaanut aningaasaliissutit ukiunut missingersuusiorfusunut 2021 – 2024-mut tamakkerlutik atorneqareerput. Erseqqissumik oqaatigalugu, aningaasaliissuteqartoqanngippat pisortat taarsigassarsititsisarnerannut qinnuteqaatinik kommune suliaqarunnaarpoq, tamannalu siusinnerpaamik 2025-imi pisinnaavoq.

Qanoq amerlatigisunik aningaasaliissuteqartoqassanersoq suli ilisimanngilarput, taakkua missingersuutini, politikkikkut akuersissutigineqartuni, takuneqartussaammata.

Nutarterinissamut taarsigassarsiniarnerit aammalu pensionisiallit taarsigassarsiniarnerisa suliareqqittalernissaannut aningaasanik nassaaqqinniarluni ingerlatsivik sulissuteqarpoq. 

BSU-mit illunut tapiissuteqartarneq ingerlatiinnarneqarpoq, siunertamut tassunga aningaasaliissutit sanaartornermut kontumi immikkoortumi inissisimammata. Maannakkut sanaartugassanut kontumiittut 2.000.000 koruuniupput.

 Inussiarnersumik inuulluaqqusilluta

 Alex Nørskov, Sanarfinermut Avatangiisinullu Ingerlatsivimmi Pisortaagallartoq