NAIP-ip illuutaata aningaasaliiffiginera

Haluu Kommuneqarfik Sermersooq

Matumuuna tusagassiutitsigut saqqummertoq pillugu aammalu allakkat ilangussat pillugit paasisaqarusuppunga, N.A.I.P.-p illuutaa pillugu aningaasaliiniarnermi periuseq atorneqartoq tamakkiisumik paasisaqarfigerusuppara, maannamullu aningaasalerniarneqarneranut illuatungiliuttuniit eqqaasaqattaagarput illu nammineq pigisoq aammalu siulersuisoqartoq akuleruffigisinnaanginnattigu minnerpaanguakkulluunniit, taamaakkaluartoq amerlanerussuteqartut akuerisaat aningaasalerneqarnissaa.

Paaserusunnarsivoq N.A.I.P-p siulersuisuisa akuerisimangikkaat suna inatsit tungavigalugu Kommunemiit aningaasaliiniarneq tungaviuva?

Suliamut tungasumik tamakkiisumik misissuisoqartariaqarpoq, taamaammat suliarineqarneranut tungasut tamakkiisut takorusuppakka.

Aammalu Sag-eq tamakkiisoq Kommunalbestyrelse-mut qaqeqqinneqartariaqarpoq.

Kakkiullugit ilanguppakka N.A.I.P-miit paasissutissat.

Asasara Kommunalbestyrelsimut ilaasortaq, Ane Egede Mathæussen (S).

Siullermik apeqqutigisannut qujanarujussuaq.
Ulloq 25. apriili 2019-imi NAIP-ip illuutaata aningaasaliiffigineqarnissaa pillugu allaffeqarfimmut apeqquteqaateqarputit.

Apeqqutit NAIP tusagassiuutinut nalunaarutaa kakkiunneqarsimasoq tusagassiuutitigullu eqqartorneqarnera tunuliaqutigalu apeqqutigivat. NAIP-ip illuutaa pillugu tassungalu atatillugu aningaasaliiffigineqartarneranut kommunip inatsisitigut tunngavia pillugu erseqqissaaffigitinnissat tamakkiisumillu paasisaqarnissat kissaatigivat.

Pisup ingerlarnganik Sanarfinermut Avatangiisinullu Ingerlatsivimmit matumuuna ima paasissutissiissutigineqassaaq:

Kommunalbestyrelsip 2018-imi juunip ulluisa tallimaanni ileqquusumik ataatsimiinnerminni Asii Chemnitz Narupip (IA) isaterineq, sanaartorfigiuminarsaaneq aamma kajumissutsiminnik isiginnaartitsisartut illussaata nutaap sanaartornissaanut politikkikkut siunnersuutaa kommunalbestyrelsimit akuersissutigineqarpoq taannalu Sanarfinermut Avatangiisinullu Ataatsimiititamut oqaluuserisassanngorlugu ingerlateqqinneqarluni.

2019-imut missingersuutit periarfissatut siunnersuusiorluni missingersuutinut suliaqarnermi “Nuummi Nuutoqqap aamma Tasersuup (Aqqaluks Plads) uummarissarneqarnerat” qulequtaralugu 2018-imi juunip ulluisa tallimaanni Kommunalbestyrelsip akuersissuteqarnera tunngavigalugu, Sanarfinermut Avatangiisinullu Ingerlatsivik suliaqassaaq.

Aningaasaqarnermut Inuussutissarsiornermullu Ataatsimiititami missingersuutit pillugit eqqartueqatigiinnermi kiisalu Kommunalbestyrelsip ataatsimiinnissaata tungaanut immikkut sammisaqarnermut atatillugu, kommunip illut piginngisaanik iluarsartuussinissamut kommunip aningaasaliissutai atorneqartassanngitsut kommunimit pisinnaatitaaffiunngitsoq allaffeqarfimmit erseqqissaatigineqarpoq, aammalu kommunip aningaasaliissutai atorlugit illu iluarsartuunneqassappat illup NAIP-mit piginera Kommuneqarfik Sermersuumut tunniussineq pisariaqartoq.

Tamanna tunngavigalugu suliamut 2019-imi 3 mio. koruuninik aamma 2020-mi 4,5 mio. koruuninik periarfissatut siunnersuuteqarnikkut immikkoortitsinissaq siullermik Aningaasaqarnermut Inuussutissarsiornermullu Ataatsimiititamit kingornalu Kommunalbestyrelsimit akuersissutigineqarpoq.

Illup iluarsartuunnissaanut periarfissat pillugit peqatigiiffimmik oqaloqatigiilernissaq anguniarlugu NAIP-miit aallartitaqartoqarluni 2019-imi januaarip ulluisa 29-anni Sanarfinermut Avatangiisinullu Ingerlatsivik ataatsimeeqateqarpoq. Ataatsimeeqateqarnermi iluarsiissutissatut siunnersuutaasinnaasut pingasut qaqilerneqarput:

1. NAIP nammineq aningaasaatini atorlugit illumik iluarsartuussisinnaavoq.
2. NAIP-p illu tuniniarsinnaavaa illoqarfimmilu allamik attartorfissarsiorluni.
3. NAIP-p illu Kommuneqarfik Sermersuumut tuniniarsinnaavaa/tunniussinnaavaa peqatigiiffiullu taamaalilluni aki naammaginartoq qaammammut akiliut eqqarsaatigalugu illumi init atortarsinnaavai.

NAIP-p illumik Kommuneqarfik Sermersuumut tunniussineranut piumasaqaatissatut siunnersuut kiisalu illumi ininik NAIP-p atuinissaanut tunngasut NAIP-mi siulersuisut eqqartuinissamut tunngavissaqarniassagamik suliarineqassasut ataatsimiinnermi aalajangiunneqarpoq. Ataatsimiinneq malitseqartinniarlugu illup Kommuneqarfik Sermersuumut tunniunneqarnissaanut periarfissaasinnaaneranut piumasaqaatit isumaqatigiissutissatut siunnersuummiitinneqarnissai pillugit Eqqartuussissuserisut Malling & Hansen Damm Sanarfinermut Avatangiisinullu Ingerlatsivimmit sulisinneqarput, kiisalu illup tamatuma kingorna tamakkiisumik ilaannakortumilluunniit NAIP-mit atorneqarnissaanut piumasaqaatit ilanngullugit siunnersuusioqqullugit.

Eqqartuussissuserisunit siunnersuutigineqartoq siullermik 15. apriili 2019-imi ingerlatsivimmit tiguneqarpoq, kingornalu 24. apriili 2019-imi Eqqartussissuserisunit inaarutaasumik siunnersuutaasoq tiguneqarluni.

Tiguneqareermata ulloq taanna isumaqatigiissutissatut siunnersuut Sanarfinermut Avatangiisinullu Ingerlatsivimmit NAIP-mi siulersuisunut nassiunneqarpoq.

Isumaqatigiissummi inatsisitigut atasinnaanera naammaginartumillu iluarsiissuteqarsinnaanera takutinneqarpoq, ilaatigut Kommuneqarfik Sermersuumit tiguneqarsinnaalluni taamaalillunilu iluarsartuunneqarsinnaalluni kiisalu illumi NAIP-p init atugai pillugit piumasaqaataasut takuneqarsinnaallutik.

Tamaasa takuneqarsinnaaniassammata ulloq 24. apriili 2019-imi siulersuisunut allagara kiisalu ulloq taanna isumaqatigiissutissatut siunnersuut ilanngunneqarpoq.

Ulloq 8. maaji 2019-imi NAIP-imit mailikkut ingerlatsivimmut isumaqatigiissutissatut siunnersuummut qutsaveqarluni allappoq, taamaattoq isumaqatigiissutissatut siunnersuutip akinnginnarani politikkikkut oqaluuserineqarnera utaqqimaarniarlugu.

Inussiarnersumik inuulluaqqusillunga,

Hans Henrik Winther Johannsen Sanarfinermut Avatangiisinullu Ingerlatsivimmi pisortaq