Meeqqerivinni meeqqat immikkut pisariaqartitsisut pillugit periusissiat

” Meeqqat suussuserneqarsimasumik (ersinngitsumik) innarluuteqartut meeqqerivinni qanoq periusissiaqarpat?
Meeqqat immikkut pisariaqartitallit sooq meeqqerivinni sulisut amigarnerani angerlartinneqartarpat?
Tapersersortimik pissarsisimanngitsut qanoq meeqqerivinniinnissaannut qulakkeerinnittoqartarpa?”

Asasarput Dorthe-Marie Mogensen-Fontain

Siullermik, Meeqqerivinni meeqqat immikkut pisariaqartitsisut pillugit apeqqutinnut qujanaq.

Meeqqat suussuserneqarsimasumik (ersinngitsumik) innarluuteqartut meeqqerivinni qanoq periusissiaqarpat?

Ulluunerani paaqqinnittarfiit pingaarnertut siunertaraat peqataatitsiffiusumik ataatsimoorfeqarnissaq, meeqqat tamarmik inuttut suliatigullu ineriartornissaannik periarfissiisumik. Peqataatitsiffiusumik pilersitsinissamut pingaarnerpaavoq suliatigut ilinniarsimasunik sulisoqarnissaq. Taamaattumik ingerlatsivimmiit sulisut ilinniarsimanngitsut ilinniartinneqarnissaannik kommunalbestyrelsip pingaartitaa ingerlatsivimmit siunnerfilimmik sulissutigineqarpoq, meeqqerivinni sulisut ilinniarsimanngitsut ilinniaqqinnissaannik periarfissinnissaat qulakkeerniarlugu. Ilanngullugu sulissutigineqarpoq sulisussarsiortarneq aammalu sulisunik attassiinnarnissaq ilaatigut meeqqerivinni atorfinnut sulinermut atatillugu inissaqartitsineq pingaartillugu.

Meeqqerivinni sulisut amerlassusissaat immikkut eqqumaffigineqarpoq, tassunga atatillugu patajaannerusumik ingerlatsinissamut aammalu perorsaanikkut nukittorsaanissamut periaaseq atorlugu sulisoqarluni.

Taamatut iliuuseqarnissamik meeqqat immikkut pisariaqartitsisut eqqortumik suliniuteqarfiginissaat qulakkeerniarlugu siusissukkut misissorneqartarnissaat pingaaruteqarluinnarpoq. Meeqqerivinniit MISI qanimut suleqatigineqarpoq meeqqat pitsaanerpaamik atugassaqartinneqarnissaat pilersinniarlugu.

Peqatigitillugu meeqqerivinni tamani meeqqanut immikkut pisariaqartitsisunut tunngatillugu ressourcepædagog ataqatigiissaarisutut inissisimanissaanut sinaakkutiliortoqarpoq.

Tamatumunnga ilanngullugu immikkut suliassaqarfimmut tunngatillugu ingerlatsivimmit periusissialiortoqarpoq, pingaarnertut atuarfeqarfinnut sammisumik, kisianni aamma atualersimanngitsunut immikkoortortaqarfik akuutillugu aammalu meeqqat immikkut iliuuseqarfigineqarnissamik pisariaqartitsisut siusissukkut suliniuteqarfiginissaannut sammisumik.

Meeqqat immikkut pisariaqartitallit sooq meeqqerivinni sulisut amigarnerani angerlartinneqartarpat?
Meeqqat immikkut pisariaqartitsisut sulisut amigarnerat pissutigalugu angerlartinneqartarnerat ingerlatsivimmiit ilisimaneqanngilaq. Meeqqeriviit illersorneqarsinnaasumik ingerlatitaanissaat pillugu malittarisassanik malinnittussaatitaapput, tamanna isumaqarpoq, pinartumik sulisussaaleqisoqartillugu meeqqerivimmi meeqqat amerlassusaannik appartitsinissaq pisariaqalersinnaasarpoq. Tamanna immikkut pisariaqartitsineq aallaavigalugu pineq ajorpoq, kisiannili angajoqqaat piffissami ajornartoorfiusumi meeqqaminnik angerlarsimaqateqarsinnaanerat ilaatinneqartarpoq.

Sulisut amerlassusaasa pitsanngorsaaffigineqarnissaat pillugu ingerlatsivimmit peqataanikkut sulissutigineqarpoq aammalu meeqqerivinni sulinermi avatangiisit pitsaanerulersinneqarnissaat pillugu qulakkeeriniartoqarluni. Ilaatigut sulisut ilorrisimaarnissaat pitsanngorsaaffiginiarlugu napparsimallunilu sulinngitsoortarnerit ikilisaaffiginiarlugit suliniutinik aallartitsisoqarpoq, tamakkulu ungasinnerusoq eqqarsaatigalugu meeqqanik angerlartitsinissamik pisariaqartitsinermik minnerpaaffianiititsissutaassapput. Tassunga atatillugu aamma sulisut akornanni uippakajaarnermik eqqugaasut aammalu eqqarsartaatsikkut peqqissuseq pillugu sulissunneqarnissaat immikkut ukkatarineqarpoq.

Tapersersortimik pissarsisimanngitsut qanoq meeqqerivinniinnissaannut qulakkeerinnittoqartarpa?
Ingerlatsivimmiit aaqqiissutissat arlaqartut tapersersorneqarput ilaatigut meeqqat immikkut tapersersorneqarnissamik pisariaqartitsisut, sulili ikorfartortimik sulisoqalersimanngitsut, meeqqerivimmeeqataaginnarsinnaanera qulakkeerniarlugu. Periarfissat ilagisinnaavaat, meeraq inissanik arlalinnik inissaqartitaasinnaappat akuerineqarsinnaasoq, tamannalu meeqqerivimmi sulisut ilallugit ikorfartuutaasussanik pissaqalersitsiffiussaaq. Ulluinnarni sulinermi meeqqat paarineqartut maannakkorpiaq pisariaqartitaat sulisut naleqqussaaffigisarpaat aammalu ulloq taanna takkuttut aallaavigalugit agguataartarlutik.

Meeqqerivimmi perorsaanermut ilaalluinnarpoq, meeqqat ataatsimoornermik imminnullu mianereqatigiinnissaannik ilikkartinnissaat. Peqataatitsineq meeqqamut ataatsimut tunngasuuginnanngilaq, kisiannili inuit assigiinngitsunik pisariaqartitsinerannik paasinnilersitsinissamik tunngasuulluni. Aamma taamaappoq meeraq niuminik napinikoq issiavimmik kaassuartakkamik pisariaqartitsilerpat, tamarmik pinngikkaluarlutik, pingaaruteqarpoq ilikkassallugu, meeqqat ilaat immikkut paarisariaqartut ukioqataasa periarfissaasa assinginik pissarsitinniarlugit.

Kommunimi meeqqat tamarmik atugaannik pitsanngorsaateqarneq ingerlatsivimmit ataavartumik sulissutigineqarpoq.

Inussiarnersumik inuulluaqqusillunga

Lone Nukaaraq Møller

Meeqqanut Atuarfeqarnermullu Ingerlatsivimmi pisortaq