Illumik sanaartornissamik qinnuteqaat

Asasara Kommunalbestyrelsimut ilaasortaq, Laura Táunâjik Uitsatikitseq (S)
Siullermik apeqqutigisannut qujanarujussuaq.
Ulloq 30. aggusti 2022 Kuummiini ”Immikkoordaajinni” pillugu allaffeqarfitsinnut apeqquteqaateqarputit.

Apeqqutit imaattoq Suliffeqarfimmut Kiffartuussivimmit tiguneqarpoq:
” Inissaaleqineq annertusiartortillugu innuttaasut namminneq sanasinnaasaminnik illussamik ujartuinerat annertusiartuinnarsimavoq, tamanna atuuppoq illoqarfinni Nuup avataaniittunik nunaqarfinnillu ineqarniarnikkut pisariaqartitsisunik. Taamaasilluni periarfissaq nammineq sanaqateqarnikkut illussamik akilersorsinnaasamik periarfissamik ujaasisarneq ujartorneqalersoq malunnarpoq. 20-20-60 periarfissaq innuttaasunit soqutigineqarnera malunnartumik annerusumik nittarsaanneqarnanilu paasissutissanik siammarterisoqanngilaq. Uggornarpoq inissaaleqineq annertooq akiorniarnerani periarfissat tamakku ammasumik saqqumilaartinneqanngimmata.
Tamakku pillugit uku apeqqutigerusuppakka:

• Innuttaasut illussamik sananissamut qinnuteqarniarunik immersugassaq sumut aasinnaavaat?
• Nittartakkakkut immersuiffissaq kisiat ingerlanneqarsimappat, ulluinnarni nittartakkakkut periarfissaqanngitsut qanoq isillutik immersuiffissaq pissarsiarisinnaavaat?
• Paasissutissat maleruagassallu innuttaasunut paasinartunngortinniarlugit qanoq eqaallisaanissaq aaqqissuussiffigineqarnikuua?
• Ilanngullugu qinnuteqaatissap link-nngorlugu akissuteqaammi ilanngunneqarsinnaanerpa?”

Suliffeqarfimmut Kiffartuussivik ima akissuteqarpoq:

Asasara Laura Táunâjik Uitsatikitseq

Illumik sanaartornissamik qinnuteqaateqartarneq pillugu apeqquteqaatinnut qujanaq.

Illuliornissamut taarsigassarsinissamut neriorsuummik qinnuteqartarnermut atatillugu kommunip pingaarnertut inatsit una malittarpaa; lluliortiternernut aningaasalersuineq pillugu Inatsisartut inatsisaat nr. 39, 23. november 2017-imeersoq

Ukunanngali allannguuteqarnikuunera maluginiaqquneqarpoq:

a) Inissianik aningaasalersuisarneq pillugu Inatsisartut inatsisaata allanngortinneqarnera pillugu Inatsisartut inatsisaat nr. 36, 28. november 2019-imeersoq (Inissialiortiternermut tapiissutitalimmik illulianik iluarsaassinermut, pitsanngorsaanermut alliliinermullu taarsigassarsititsisarneq tapiissuteqartarnerlu).

b) Illuliortiternernut aningaasalersuineq pillugu Inatsisartut inatsisaat pillugu Namminersorlutik Oqartussat (INATSIT) nalunaarutaat nr. 5, 7. februar 2020-imeersoq (2017-imeersoq 2019-imeersorlu ataatsimoortillugit allanneqarput), matumaniit LBK 2020-mik taaneqartassaaq.

Illuliortiternernut aningaasalersuineq pillugu Inatsisartut inatsisaata allanngortinneqarnissaa pillugu Inatsisartut inatsisaat nr. 19, 30. november 2020-meersoq (Nutaanik inissialiornissamut taarsigassarsiarititat taamaallaat inunnut taarsigassarsiaritinneqartassapput aammalu inuit inissiamut ataatsimut taamaallaat taarsigassarsisinnaallutik)

Taakkununnga ilanngunneqassapput:

Tapiissutitalimmik illulianik iluarsaassinermut, pitsanngorsaanermut alliliinermullu tapiisarneq pillugu Namminersorlutik Oqartussat nalunaarutaat nr. 42, 11. november 2020-meersoq

Innuttaasutut illuliornissamut taarsigassarsinissamut neriorsuummik qinnuteqaateqarusukkaanni, qinnuteqarnissamut immersugassaqanngilaq, inatsilli malillugu piumasaqaatinik arlalinnik peqarpoq. Taakkua tassaapput:
1) Iluarsaassinissamut, pitsanngorsaanissamut allilerinissamulluunniit kissaatigineqartumut nassuiaat.
2) Inissiaq pillugu nassuiaat, tassunga ilanngullugit pisoqaassusaa, angisussaa qanorlu pitsaassuseqarnera.
3) Suliassami aningaasartuutinut tamarmiusunut missingersuusiaq.
4) Sulineq pineqartoq nunaminertamik tunineqarnissamik pisariaqartitsippat kommunalbestyrelsimiit nunaminertamik immikkoortitsineq imaluunniit nunaminertamik tunineqarneq.
5) Nammineq aningaasalersuisinnaanermut uppernarsaat.
6) Qinnuteqartup cpr.normua aamma najugaqarnermut allagartaq.
7) Inissiamut piginnittuuneq pillugu uppernarsaat.
8) Qinnuteqartup pisortanut akiitsoqarnera pillugu Akiliisitsiniarnermut oqartussaniit nalunaarut.

Qulaani taaneqartut qinnuteqaammut ilanngunneqassapput, mailikkut imaluunniit allakkatigut nassiunneqarsinnaasumut.

Ilanngullugu eqqumaffigineqassaaq, nutarterinissamut taarsigassarsinissaq anguniaraanni piumasaqaatit makkua naammassineqassammata:

• Inissiaq inissiamik piginnittumut, taassuma aappaanut imaluunniit meeqqanut inersimanngitsunut inissiatut atorneqassasoq.
• Inissiaq piffissami qinnuteqarfiusumi ukiunik 20-inik pisoqaanerussasoq.
• Inissiaq ikuallattoornissamut illullu ajoqusersinnaaneranut sillimmaserneqarsimassaaq aamma sillimmasiinermi akiliutissatigut kinguaattoortoqarsimanani.
• Inuulluarniutitut taaneqarsinnaasunut iluarsaassinernut imaluunniit pitsanngorsaanernut taarsigassarsisitsisoqarsinnaanngilaq.

Soraarnerussutisilialittut taarsigassarsiniaraanni piumasaqaatit makkua naammassineqassapput:

• Iluarsaassinerup aningaasalersornissaanut aningaaserivimmi imaluunniit illuummik qularnaveeqqusiilluni taarsigassarsisitsisarfimmi nalinginnaasumik piumasaqaatit malillugit taarsigassarsinissamut itigartitaasimaneq.
• Inissiaq ikuallattoornissamut aamma illup ajoqusersinnaaneranut sillimmaserneqarsimanissaa aamma sillimmasiinermi akiliutissani kinguaattoortoqarsimannginnissaa.
• Inissiami piginneqataasup aappaasup iluarsaassinermut aamma taarsigassarsinissamut akuersisimanissaa.

Aamma LBK 2020-mi §29-mi ima allassimasoqarpoq “25.000 kr.-it sinnerlugit pisortanut akiitsunik akilerneqartussanik akiliisimanngitsumut qinnuteqartumut taarsigassarsisitsinissamut kommunalbestyrelsi neriorsuuteqarsinnaanngilaq.” aammalu § 30-mi, ima “Taarsigassarsinissamik qinnuteqaat kommunalbestyrelsimit akuerineqarpat taarsigassarsinissamut neriorsuut tunniunneqassaaq, tassanilu taarsigassarsiat annertussuserigallagassaat aammalu taarsigassarsinermi piumasaqaatit allassimassallutik.”

Taamatuttaaq LBK 2020-mi § 7-imi ima allassimasoqarpoq “Maniitsumi, Aasianni aamma Tasiilami kommunalbestyrelsi aningaasartuutit tamarmiusut 35 %-ii tikillugit taarsigassarsisitsisinnaavoq, taamaattorli § 4, imm. 2 naapertorlugu annerpaamik naatsorsorneqartut, tassa 770.000 kr.-inik annerpaamik taarsigassarsisitsisoqarluni.” aammalu § 8-mi ima allassimavoq “Illoqarfinni nunaqarfinnilu §§ 6 aamma 7-imi taaneqanngitsuni kommunalbestyrelsi aningaasartuutit tamarmiusut 40 %-ii tikillugit taarsigassarsisitsisinnaavoq, taamaattorli § 4, imm. 2 naapertorlugu annerpaamik naatsorsorneqartut, tassa 880.000 kr.-inik annerpaamik taarsigassarsisitsisoqarluni.”

Naggataatigullu LBK 2020-mi § 9-mi ima allassimasoqarpoq “§§ 5-8 naapertorlugu taarsigassarsisitsineq taamaallaat pisinnaavoq sanaartornermi aningaasartuutit tamarmiusut sinneri taarsigassarsisup nammineq aningaalersorpagit.”, tamanna §§27 aamma 28 naapertorlugit qinnuteqaammut ilanngullugu uppernarsarneqassaaq.

Taarsigassarsiniariaatsit assigiinngitsut pillugit paasissutissat, piumasaqaatit, qinnuteqarnermi piumasarisat, allallu tamarmik immikkut Sullissivik-mik allaaserineqarnikuupput. Aamma illit nammineq kommunerisavit allaffiata immikkoortortaanut, taarsigassarsiniarnissammut paasissutissanik pissarsiniarlutit, qinnuteqarnissannullu ikiorneqarsinnaanerit pillugu saaffiginnissinnaavutit.

Sullissivimmi piumasaqaatit ersarissumik allassimapput. Taamaattorli Inatsisartut inatsisiliortuusarneri kiisalu Naalakkersuisut, inatsimmi piginnaatitsissutit naapertorlugit nalunaarutinik suliarinnillutillu saqqummiussisuusarnerat erseqqissarneqassaaq. Kommunip taarsigassarsititsinermi malittarisassat taakku malitassarai.

Sullissivimmi illuliortiternernut aningaasalersuineq pillugu malittarisassanut linki:
https://www.sullissivik.gl/Emner/B_Bolig_og_flytning/Boligfinansiering/Renoveringslaan_efter_boligfinansieringsloven_nyt_design?sc_lang=kl-GL

Inussiarnersumik inuulluaqqusillunga

Ole Jakobsen

Kommunaldirektøri
Kommuneqarfik Sermersooq