IBA isumaqatigiissut Rubin pillugu Qeqertarsuatsiaanut tunngasoq

Asasarput Kommunalbestyrelsimut ilaasortaq, Peter Davidsen.

Siullermik apeqqutigisannut qujanarujussuaq.

Ulloq juunip 18-ianni 2022 allaffeqarfimmut apeqquteqaammik “IBA isumaqatigiissut Rubin pillugu Qeqertarsuatsiaanut tunngasoq” pillugu  nassiussivutit.

Apeqqutit imaattoq Suliffeqarfimmut Kiffartuussivimmit tiguneqarpoq:

Siullermik juni 2014, Kommuneqarfik Sermersooq, Naalakkersuisut kiisalu aatsitassarsioqatigiit True North Gems rubininik piiaanissamik isumaqatigiissuteqarput aamma IBA isumaqatigiissut atsiorneqarpoq.

Qulequttat uku isumaqatigiissummiipput:

a) 10. Sulisoqarnermut- (HR) suliffeqarfimmillu ineriartortitsinerit.

b) 11. Inuussutissarsiornikkut ineriartortitsineq.

c) 12. Isumaginninnikkut kulturikkut atugarissaarneq

Annertunerusumik paasisaqarfigerusuppakka qanoq Kommuneqarfik Sermersuumiit isumaqatigiissummut malitseqartitsinissaq suliniutineqarsimanersoq?

Aappaattut paaserusuppara True North Gems matummat Greenland Ruby-lu ingerlatilerlugu IBA isumaqatigiissut nutarterneqarsimanersoq aamma isumaqatigiissutip atuutsinneqarnissaanut arlaatigut allannguuteqartoqarsimassappat paaserusuppara?

Nutaamik IBA isumaqatigiissusiortoqarsimappat perusuppara.

IBA isumaqatigiissut tunngavigalugu piffimmi innuttaasunut iluaqutigineqarnissaa siunertaralugu paasiniaavunga aamma isumaqatigiissutip Qeqertarsuatsiaanut inuussutissarsiornikkut kulturikkullu aningaasatigut iluaqutaanissaa qulakkeerneqartariaqarmat isumaqatigiissut pappiaraannaassanngippat.

Minnerunngitsumillu tusarniaanermi neqitarineqarnikuuvoq Qeqertarsuatsiaanut iluaqutaanissaa aningaasarsiornikkut kulturikkut allatigullu iluaqutaassammat.

Minnerunngitsumillu aatsitassarsiorneq piffimmut pineqartumut iluaqutaanissaa Kommuneqarfik sermersuup atsioqataasutut qulakkeerniartussaammagu isumaqatigiissut tunngavigalugu malitseqartitsinissaq.”

Asasara Peter Davidsen

Qeqertarsuatsiaani Rubin pillugu IBA isumaqatigiissut pillugu apeqqutinnut qujanaq, matumuuna akissuteqarfigineqartumut.

Allaffeqarfiup malitseqartitsinera
Allaffeqarfik suliffeqarfimmut LNS-imut ukiumut ataasia saaffiginnittarpoq (IBA’mik ingerlatsilersimasumut). Saaffiginnissutip imarisarpaa suliffeqarfiup aningaasaateqarfinnut kulturilerinermut tunngasunut il.il. akilinngitsuugai tamakkiisut.

IBA-mi immikkoortut killiffii
Kommune ukiumut ataasiarluni nalunaarusiamik killiffissiuinermik tigusaqartarpoq. Suliassaqarfiit ilaannut tunngasuni suliffeqarfik isumaqatigiissutaasimasunik naammassinnittarpoq.

Assersuutigalugu immikkoortoq 10-mut tunngasunik. Tassani suliffeqarfik 337-nik sulisoqarsimalluni maannakkut 60-inik sulisoqarpoq, taakkunannga 95%-ii kalaaliupput. Sulisut ilaat Qeqertarsuatsiaaneersut suliartortitaapput, kisiannili taakkua ilaat piffissap ilaani kommunip iluani allamut nuussimapput.

Pitsaaqutaasut sinneri immikkoortoq 12-imi taaneqarput. assersuutigalugu suliffeqarfik imaaliortartoq:

• piniartut aalisartullu Qeqertarsuatsiaarmiut niueqatigisarpaat
• ilinniartitaanikkut ilinniartut/lærlingit pillugit pisussaaffivut malinneqarput, taakkunanngalu ilinniartut/lærlingit tallimat ilinniakkaminnik naammassinnipput
• piiaaffimmit piiakkat suliarineqanngitsut ujaqqallu erlinnartuutit silinikut najukkami innuttaasunut, ilusilersuisartunut eqqumiitsuliortunullu tuniniartarpaat.

Suliassaqarfinnut allanut tunngatillugu suliffeqarfiup isumaqatigiissut malinngilaa.

• Aningaasaateqarfimmut kulturilerinermut tunngasumut akiliuteqarneq ajorpoq (immikkoortoq 12). Tamatumunnga utoqqatsissutaasarluni ataavartumik amigartooruteqartarneq.
• Qeqertarsuatsiaani atuartitsineq ajorput. Tassunga utoqqatsissutaavoq Covid-19. (Immikkoortoq 11)

Sooq suli amigaateqartoqarpa?
Kommunimi allaffeqarfiup Namminersorlutik Oqartussat oqallitigisarpai suliffeqarfiup pisussaaffimminik attassinissaa peqatigitillugulu suliffeqarfiup ingerlatsinikkut amigartoorutigisartagaasa akornanni oqimaaqatigiissitsisoqarnissaa pillugu. Oqimaaqatigiissitsinermi pineqarput suliffeqarfik akileraarutinut 40 mio. kr.-nik akiliisarmat, kalaallinillu amerlanerusunik sulisoqarluni, kisiannili ukiumiit ukiumut amigartooruteqartarluni. Suliffeqarfik siullermik akuersissummik piginnittoq (True North) ullumikkut akiliisinnaajunnaarnikuuvoq, aammalu LNS taamatut pissagaluarpat annaasaqaataassaaq. Aamma malugeqquneqarpoq, aatsitassarsiornerit allat, piiaaffiullu angissusia eqqarsaatigalugit, rubinisiorfik IBA-minni annertoorujussuarnik pisussaaffeqarmat.

Siunissaq eqqarsaatigalugu ingerlanissaa
2022-mi upernaakkut kommunip inuussutissarsiornermut immikkoortortaa, Namminersorlutik Oqartussat aamma LNS IBA pillugu killiffissiuillutik ataatsimeeqatigiipput. Suliffeqarfiup amigaateqartoqarnera akuersaarpaa. Ataatsimiinnermi isumaqatigiissutigineqarpoq isumaqatigiissummi toqqammavigineqartoq pillugu sulissuteqarnissaq aallartinneqassasoq, kommune eqqarsaatigalugu kommunalbestyrelsimut saqqummiunneqartussamik.

Partiit pingasuusut isumaqatigiissutigaat allannguutit tamarmik ataatsikkut pisariaqanngitsut, annertuujunatillu ingasaassinerussanngitsut. Taarsiullugu ineriartorneq eqqarsaatigilluagaasariaqarpoq, immikkuutitaarluni aammalu isumaqatigiissummi maannakkut atuuttumi suut tamakkiisumik aaqqiiffigineqarsimanngitsut matuneqarnissaat ukkatarineqassasoq, aammalu kommunimut, Namminersorlutik Oqartussanut aammalu Greenland Ruby-mut ataatsimut nalinga annertusineqassasoq. Aalajangiunneqarput makkua:

• Ukiumut 2-3-riarluni ataatsimiittoqartassaaq. Ataatsimiinnissaq siulleq septembari 2022-mi ingerlanneqassagunarpoq.
• Ataatsimiinnermut siullermut Greenland Ruby allannguutissatut siunnersuuteqassaaq.
  • Tamatumani pineqassallutik isumaginninnikkut kulturikkullu atugarisat misissornissaat pitsanngorsaatissatullu siunnersuutit.
  • Taava aamma aningaasaateqarfinnut Isumaginninnermut Kultureqarnermut suliniuteqarnermut siunertalinnut erseqqissumik paasisaqarnissamut siunnersuutit, aammalu aningaasaliissutinut qanoq ililluni qinnuteqaateqartoqartarnersoq aammalu qanoq agguaassisoqartarnersoq.
  • Suliniutit nutaat suleqatigiissutigisassat sumiiffimmi najugalinnut iluaqutaasussat.
• Kommuneqarfik Sermersooq ataatsimiinnermut siunnersuuteqassaaq, nunaqarfik sinnerlugu kina ataqatigiissaarisuussanersoq.

Allannguutit
Kommunimi allaffissornikkut allannguutit qitiutinneqarput, qulakkeerniarlugu:

• Tapiissuteqarnissamut isumaqatigiissutit akilerneqarnissaat
• Aningaasaateqarfimmi atuineq pillugu aalajangigassanut Qeqertarsuatsiaani innuttaasut akuutinneqarnissaat

Politikerinik ilisimatitsineq peqataatitsinerlu
Suliffeqarfiup, Namminersorlutik Oqartussat kommunillu akornanni Isumaqatigiissummi annertuunik allannguuteqartoqassappat, tamanna politikkikkut akuersissutigineqassaaq.

Annikitsunik allannguuteqartoqassappat allaffeqarfik ilisimatitsiumaarpoq.

Inussiarnersumik inuulluaqqusillunga

Marie Fleischer
Kommuneqarfik Sermersuumut Vicekommunaldirektøri