Asasarput Kommunalbestyrelsimi ilaasortaq, Justus Hansen (D)

Siullermik apeqqutigisannut qujanarujussuaq.

Ulloq 26. maaji 2023 “Siggartaassuit” pillugit allaffeqarfitsinnut apeqquteqaateqarputit. Sanarfinermut Avatangiisinullu Ingerlatsiviup apeqqutit tiguaa, imaattoq:

”Siggartaassuit appikkaangata kommunimi innuttaasut tamarmiullutik tusaasarneraat ilisimaneqanngilaq, tamannalu innuttaasunut ataasiakkaanut toqqissisimanartuunngilaq.

1. Siggartaassuit appikkaangata kommunimi innuttaasunit tamanit tusaaneqarsinnaanersoq ingerlatsivimmit ilisimaneqarnerluni?
2. Taamaanngippat, tamanna pisinnaanngortinniarlugu suliniuteqartoqarnerluni?
3. Siggartaassuit upalungaarsimasut pillugit appisinneqartarpat imaluunniit innuttaasunik mianersoqqusinissaq pillugu?
4. Siggartaassuit pioreersut ikippallaarpat, amerlineqartariaqarpat?
5. Siggartaassuit pioreersut innuttaasut ilaasa kalerrisaarisoqarnera tusaanngitsoortarsimappassuk nipikippallaarsimappat?
6. Kommuneqarfik Sermersuup tungaaniit eqqarsaatersuutigineqarnerluni SMS aqqutigalugu kalerrisaarisoqarsinnaanissaa, soorlu DK-mi maannakkut taamaattartut?
7. Pingasunngornerit tamaasa nal. 12 siggartaassuit appittarnerannut aamma SMS-ertarnissaq misilittaatigineqarsinnaanerluni?”

Asasara Justus Hansen,

Siggartaassuit pillugit apeqquteqaatigisannut qujanaq.

Innuttaasut ulorianartorsiuutaasinnaasumik peqqissutsikkulluunniit ajoqutaasinnaasumik pisoqartillugu eqqorneqarnissamut ernumanartumiippata, Nunatsinni Politiit pisussaapput innuttaasut kalerrisaassallugit. Tamanna assigiinngitsutigut pisinnaavoq. Politiit tusarliussassaqaraangamik internetikkut attaveqatigiittarfiit imaluunniit allaganngorlugu tusarliussassanngorluguluunniit tusagassiutit amerlasuutigut aqqutigisarpaat. Periarfissaq allaq tassaasinnaavoq, Nunatsinni Politiit kommunimi upalungaarsimasunik siggartaassuarmik appinnissamik piumaffiginnissinnaanerat. Nunatsinni Politiit kalerrisaarisarnerup pitsanngorsarneqarnissaanut siggartaassuit aamma/imaluunniit allatut innuttaasunik kalerrisaarisarnissamut kissaataat maannakkorpiaq ilisimanngilarput. Kalerrisaarisarnermi assersuutitut taaneqarsinnaavoq, Danmarkimi illoqarfinni 1.000-init ikinnerusunik innuttaasulinni siggartaammik atuisoqarneq ajormat. Tassungalu taarsiullugu soorlu internetikkut attaveqatigiittarfiit, biilit nipiliuusersukkat, mobilikkut kalerrisaarisarneq (PUSH aqqutigalugu nalunaaruteqarneq) kiisalu radio TV-lu, TV2 aamma DR (soorlu nunatsinni KNR) aqqutigalugit upalungaarsimasuniit innuttaasunut nalunaaruteqartoqassatillugu paasissutissiisoqartartoq.

Illoqarfinni siggartaassuit atorlugit innuttaasunik kalerrisaarisarneq kommunimi upalungaarsimasut susassaqarfiisa avataaniippoq, tamatumalu kingunerisaanik upalungaarsimanermut immikkoortumut pilersaarutissamut atatillugu siunnersuutigineqarpoq, Nuummi, Tasiilami Paamiunilu siggartaassuarnik atuinerup atorunnaarsinneqarnissaa imaluunniit Nunatsinni Politiinut tunniunneqarnissaa, taannalu 2023-mi juunip naanerani Upalungaarsimanermut ataatsimiititaliarsuarmut saqqummiunneqassaaq.

Matuma kinguliini takusinnaavat, apeqqutitit ataasiakkaarlugit akineqarnerat.

Immikkoortumut siullermut tunngatillugu: ”Siggartaassuit appikkaangata kommunimi innuttaasunit tamanit tusaaneqarsinnaanersoq ingerlatsivimmit ilisimaneqarnerluni?”

Ingerlatsivimmiit eqqumaffigineqarpoq, kommunimi sumiiffiit ilaani siggartaatit innuttaasut ilaaniit tusaaneqarsinnaaneq ajortut. Assersuutigalugu Nuummi sumiiffiit ilaani, pingaartumik Nuussuarmi Qinngutsinnilu, immikkoortut ilaani siggartaassuaq tusaaneqarsinnaaneq ajorpoq. Taamatuttaaq sumiiffiit ilaani sila apeqqutaatillugu siggartaassuit tusaajuminaassinnaasarnerat ajornartorsiutaavoq.

Immikkoortumut tullermut tunngatillugu: ”Taamaanngippat, tamanna pisinnaanngortinniarlugu suliniuteqartoqarnerluni?”

Siggartaassuit tamanit tusaaneqarsinnaanngornissaanut pitsanngorsaanissamut amerlilerinissamik taarsersuinissamilluunniit ingerlatsivimmi maannamuugallartoq pilersaaruteqartoqanngilaq.

Immikkoortumut pingajuannut tunngatillugu: ”Siggartaassuit upalungaarsimasut pillugit appisinneqartarpat imaluunniit innuttaasunik mianersoqqusinissaq pillugu?”

Illoqarfinni siggartaassuaqarnerup pingaarnertut siunertaraa, Nunatta Politiivisa pisariaqartutut nalilerpassuk innuttaasunut kalerrisaaruteqarnissaq. Taamaalilluni ullumikkut Nunatsinni Politiit taakkuupput kommunimi upalungaarsimasut aqqutigalugit siggartaassuit appisitsisinnaasut. Siggartaassuaqarneq qatserisartunik aggersaanissamut siornatigut atorneqartarpoq, ikuallattoortoqartillugu kalerrisaarutaatillugu. Illoqarfinni ullumikkut tamanna atorneqanngilaq, qatserisartut pagereqalernikuummata. Nunaqarfinnili ikuallattoqartillugu siggartaassuit atorlugit qatserisartut aggersarneqartarput. Taakku ukiuni aggertuni atorunnaarneqarnissaat naatsorsuutigineqarpoq, qatserisartullu pagerit atorlugit aggersarneqartalissallutik. Oqaluttuarisaaneq isigalugu Nuummi, Tasiilami Paamiunilu kommunimi upalungaarsimasut siggartaassuarnut tunngasunik ingerlatsisuusarput, naak taakkuninnga tooqqaannartumik atuisuunngikkaluarlutik. Kommunimi upalungaarsimasut Nunatsinni Politiit kissaateqarnerisigut siggartaassuit pigiinnarnikuuaat, politiit innuttaasunut kalerrisaarinermi atorsinnaajumallugit.

Immikkoortunut 4,5,6 7-imullu tunngatillugu: ”Siggartaassuit pioreersut ikippallaarpat, amerlineqartariaqarpat? Siggartaassuit pioreersut innuttaasut ilaasa kalerrisaarisoqarnera tusaanngitsoortarsimappassuk nipikippallaarsimappat? Kommuneqarfik Sermersuup tungaaniit eqqarsaatersuutigineqarnerluni SMS aqqutigalugu kalerrisaarisoqarsinnaanissaa, soorlu DK-mi maannakkut taamaattartut? Pingasunngornerit tamaasa nal. 12 siggartaassuit appittarnerannut aamma SMS-ertarnissaq misilittaatigineqarsinnaanerluni?”

Assersuutigalugu siggartaassuit tusaaneqarsinnaanissaat annertusarniarlugu amerlilerinissaq taarsersuinissarluunniit ingerlatsivimmi maannamuugallartoq pilersaarutaanngilaq. Soorlu eqqaaneqareersoq siggartaassuit kalerrisaarutitut Nunatsinni politiinit ullumikkut atorneqartarput. Pisariaqarpat siggartaassuarnik allannguinissaq aamma/imaluunniit allatut periarfissanik ilasinissaq soorlu mobilikkut kalerrisaarinissaq (PUSH aqqutigalugu nalunaaruteqarneq) pissappata nuna tamakkerlugu upalungaarsimasut suleqatigalugit pissaaq.

Inussiarnersumik inuulluaqqusillunga

Søren Sohn Krog Pedersen

Sanarfinermut Avatangiisinullu Ingerlatsivimmi pisortaq