Asasara Kommunalbestyrelsimi ilaasortaq, Laura Táunâjik Uitsatikitseq (S)

Siullermik apeqqutigisannut qujanarujussuaq.

Ulloq 6. februaari 2026 allaffissornermut apeqquteqaammik nassiussivutit, inissianik pilersitsineq aqqutigalugu nunaqarfinnik ineriartortitsinermut tunngasoq pillugu.

Pisortaqatigiit Allatseqarfianit apeqqutitit tiguavut, imaattut:

”2026-mut aningaasanut inatsimmut oqaaseqaatini ilanngunneqarpoq isorliunerusuni sanaartornermi suliniutinut aningaasanik immikkoortitsisoqassasoq. Katillugit 5 mio. kr.-nit immikkoortinneqarput. Kisianni aningaasaliissutit qanoq atorneqassanersut innuttaasunit paasineqarumavoq. Soqutiginartorujussuuvoq paasissallugu aaqqiissutitut iluseq qanoq ittoq sulinermi aallaavigineqassanersoq. Aningaasaliissutit pingaarnersiorneqarnerat aamma agguataarneqarnerat eqqarsaatigalugu piffissaliuussinerup itinerusumik nassuiarneqarnissaa kissaatigineqarpoq.

Maanna ukiuni 17-ini kommunerujussuarmi peqataavugut Kalaallit Nunaata Kangiani sanaartukkatigut annermik ineriartortitsisoqanngitsoq. Oqaatsit kusanartut imaqanngitsut naammatsiffigineqarput, maannami ukiuni arlaqalersuni susoqarneq ajornera malunnarpoq. Nunaqarfiit inuerukkiartorput aamma illorpassuarnik najugaqarfigineqanngitsunik aserfallattunillu peqarpoq. Tamakkua innuttaasunit akissaqarfigineqanngitsumik akilerlugit tuniniarneqartarput. Pisisartut tassaapput pisoorsuit avataaneersut.

Akileraarutitigut isertitat amerlanerit illoqarfiit pingaarnersaanik ineriartortitsinermut atorneqarput. Kommunerujussuarmi allat naatsorsuutigisaminnik nipangiussiinnarput. Arlalinnik apeqqutissaqarnarpoq akissutissaqanngitsunik. “Kaagip” ilamininnguanik annikitsunnguanik naakkinnissutitut tunniunneqartartut eqqaassanngikkaanni. Allamilluunniit oqartoqassagaluarpat kommunerujussuaq nunaqarfinnut agguataarinissamut ataatsimoorussamik siunertaqartussaavoq.  Pissutsit piviusut allarluinnaapput.

1. Sanaartornermik ineriartortitsinermut 5 mio.kr.-it immikkoortinneqarsimasunut atornissaannut iluseq qanoq ittoq atorneqassava?
2. Kikkut qinnuteqarsinnaappat aamma suleriaaseq qanoq ittoq atorneqassava?
3. Aningaasat immikkoortinneqarsimasut illuutinik piusunik iluarsartuussinermut atorneqarsinnaappat?

Asasara Laura

2025-mut aamma 2026-mut missingersuutini ukiuni marlunni 5 mio. kr.-it Ittoqqortoormiini aamma nunaqarfinni inissiat pitsanngorsarnissaannut illuartinneqarput, katillugit 10 mio. kr.-it

Missingersuutinit aningaasaliissutit taakkua Iserit A/S-imut ikineqassapput, tamatuma kingorna inissiani attartortittakkani piusuni, Iserit-imit pigineqartuni, iluarsartuussinernut pitsanngorsaanermik pisariaqartitsisoqarneranik naliliiffigineqarsimasuni, aningaasaliissutit pisariaqartunut atorneqassapput.

Tassa Ittoqqortoormiini aamma nunaqarfinni illunik nutaanik sanaartornissaq imaluunniit sanaartugassanik suliniutinik ineriartortitsisoqassasoq pineqanngilaq.

Iserit-ip inissiaatai attartortittakkat aserfallatsaaliineqarnerat amigaateqarsimassappat, najugaqartut Iserit-imut attaveqassapput aamma nalunaarutigineqassaaq, aserfallatsaaliineq amigaataasoq suunersoq, suliassarlu 5 mio.kr.-it iluanni pingaarnersiorneqartussanut ilanngunneqarsinnaanersoq paasiniarneqassaaq. Tassa Kommuneqarfik Sermersuumi tamarmi Iserit-ip inissianut attartortittakkanut tamanut periusianut assingusoq atorneqassaaq. Allaanerussutaaginnarpoq ukiut marluk iluanni Ittoqqortoormiinut aamma nunaqarfinnut immikkut suliniuteqarnermut 10 mio.kr.-inik immikkut aningaasaliissuteqarneq.

Innuttaasut najugaqartut namminneq inigisaminnik iluarsartuussinissamut atorniarnermik/-tapiiffigineqarnissamik kissaateqartut (BSU-mik illuutillit imaluunniit Nammineq illulianut), taakkua Ineqarnermut, Attaveqaasersuutinut Isorliunerusunullu Naalakkersuisoqarfik attaveqarfigissavaat, Naalakkersuisoqarfik tassaammat siunertanut taakkununnga aningaasaliissuteqartussaq.

Ilisimatitsissutigineqassaaq 2025-mi Iserit-ip aningaasaliissutai 5 mio. kr.-iusut iluarsaassinernut atorneqartussaammata soorlu tabelimi ersersinneqartoq:

Aningaasaliissutit atorneqarput sumi pisariaqartitsinermik annerpaamik naliliisoqarnera aallaavigalugu, aamma Illoqarfimmi/Nunaqarfimmi sorlermi innuttaasut amerlassusiat aallaavigineqanngilaq.

Kommunit 2008-mi kattussuunneqarnerisa kingorna kommunerujussuarmi inissialiornermik ineriartortitsineq pillugu illit oqaaseqaatinnut atasumik oqaatigineqassaaq, soorunami politikikkut pingaarnersiuineq aallaavigalugu inissialiortitsineq taanna qanoq pissanersoq aalajangersarneqarmata.

Kommunit kattussuunneqarnerisa kingorna politikikkut pingaarnersiukkat qanoq issimanerat pillugit inerniliussaqarnianngilanga, kisianni inissianik sanaartorneq politikikkut qularnanngitsumik ima pingaarnersiorneqarsimagunarpoq, piffissami pineqartumi inissianik kissaateqarnerup annerpaaffiani aamma innuttaasut amerliartornerpaaffiini siulliunneqarmata.

Ataani tabelimi takuneqarsinnaavoq ulloq 31.12.2025 Iserit A/S-imut utaqqisut allattorsimaffiat:

Taakkununnga ilanngullugu kommunit kattussuunneqarnerisa kingorna piffissami innuttaasut ineriartornerannut tamakkiisumik takussutissaq, 2008 – 2026:

Aammattaaq siusinnerusukkut Kommunalbestyrelsiusimasup 2025-mut missingersuummi sanaartornermik aningaasaliissutit katinnerannik qanoq pingaarnersiuineranik ersersitsiniarlunga misilippara, sanaartornermut aningaasaliissutit atorneqarsinnaasut aamma ulloq 31.12.2024 politikikkut pingaarnersiorneqartut innuttaasunut ataasiakkaanut agguataarnerat – Nuummut, Nuup avataani illoqarfinnut kiisalu Nunaqarfinnut – aallaavigalugu.

Naatsorsuinermi suut atorneqarsimanersut ersersinneqanngillat kisianni piffissami 2025-2028 atorneqarsinnaasutut politikikkut pingaarnersiorneqartut qanoq aningaasartaqarnersut ersersinneqarput. Taamaattumik soorunami unammillernartoq tassaavoq, aningaasaliissutit taakkua suliniutinut atorneqarfissaattut naatsorsuussanut qanoq sukkatigisumik piviusunngortinneqarnerat.

Sanaartornermut aningaasaliissutit pingaarnersiukkanut tabeli 2025-2028-mut attuuttoq, ilanngullugit, aningaasaliissutit ulloq 31.12.2024 atorneqanngitsut sanaartornermi aningaasaateqarfimmiittut.

Tabelip ersersippaa, sanaartornermut suliniutit/aningaasaqarneq illoqarfinni aamma nunaqarfinni innuttaasunut ataasiakkaanut agguataarneqarpat, taava Kommunalbestyrelsimit aningaasat amerlanerit Nuup avataani illoqarfinnut aamma nunaqarfinnut pingaarnersiorlugit agguaanneqarsimasut – allaammi aningaasat kisitsisitaat qaffasinnerujussuaq Nuup avataani atorneqarput.

Taamaaliorpunga kommunerujussuaq tamakkerluni Kommunalbestyrelsimit annertuumik ukkarineqarnera ersersinniaannarlugu.

Inussiarnersumik inuulluaqqusillunga

Ole Jakobsen

Kommunaldirektøri