Aninagasaqarnermut Inuussutissarsiornermullu Ataatsimiititap septembarip 26-ianni 2019 aalajangerpaa, kommunimut pilersaarummut tapiliussatut siunnersuut 4A7-2 Mitsimmavik tamanut tusarniaassutigineqassasoq.
Siunertaa
Mitsimmavimmi sanaartornissamut qinnuteqaat tunngavigalugu immikkoortoq pillugu kommunimut pilersaarummut tapiliussassatut siunnersuusiortoqarpoq.
Siunnersuut naapertorlugu immikkoortut marluusut 4A7 aamma 4C7 katinneqarput, taamaalillutik immikkoortut A-nut nuunneqarlutik; 4A7. Immikkoortup ilaa immikkuualuttunut arfinilinnut agguarneqassaaq, taakkulu tamarmik immikkut assigiinngitsunik sanaartorfigineqassapput, matumani ilaatigut meeqqerivik, illut uiguleriit, illut ataasiakkaat illullu quleriillit, kiisalu minnerunngitsumik sissaq sinerlugu aqqusineeraq immikkoortullu allat kikkut tamat ornissinnaasaat ilanngullugit.
Taamaalilluni inissiaqarfimmut Qinngutsinni Siorarsiorfimmilu illoqarfiup ineriartortinnissaanut periusissiamut ataqatigiilluinnartumik uummaarissumik soqutiginartumillu najoqqutassaqarnissaq pilersinneqassaaq.
Tamanut oqallisissiaq
Pilersaarutitut siunnersuut piffissami 9. oktobarimiit 4. decembari 2019-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput decembari 4-at 2019 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani takuneqarsinnaavoq
Kommunimut pilersaarummut tapiliussaq Nunatta atuagaateqarfiani atuarneqarsinnaavoq, kommunip saaffiginnittarfiani pissarsiarineqarsinnaalluni, kommunip nittartagaani aaneqarsinnaalluni www.sermersooq.gl imaluunniit Sanarfinermut Avatangiisinullu ingerlatsivimmut uunga sianerluni 36 74 34 saaffiginninnikkut pissarsiarineqarsinnaalluni.