Pisortani sulisuunngitsutut meeraq inuusuttorluunniit iluarusulluni inuunngitsoq ilisimagukku akuliuttussaatitaavutit. Taamaaliorsinnaavutit mailimik nassitsinikkut, tassani meeraq inuusuttorluunniit pillugu ernumassutitit allaaserissavatit, oqarasuaatikkut namminerluunniit takkullutit attaveqarfigisinnaavatsigut. Pisuni tamani kinaassutsivit isertuunnissaanut periarfissaqarputit.
Nalunaarutit Kommuneqarfik Sermersuumi Nalunaaruteqarnermi Sulisumut mailikkut uunga nassiutissavat meeqqavut@sermersooq.gl.
Nalunaarutit Kommuneqarfik Sermersuumi Nalunaaruteqartarnermi Sulisumut oqarasuaatikkut nalunaarutigisinnaavat, taannalu ulluinnarni tamani ammasarpoq nal. 8-miit nal. 16-imut oqarasuaat 36 60 60
Kinaassutsit isertuussinnaavat. Qanoq iliussanerlutit iserfissaq ataaniittoq toorlugu takujuk.
Kinaaneq isertuullugu nalunaaruteqarneq, qanoq iliussaanga?
Nalunaarutivit tiguneranit kingusinnerpaamik sapaatip akunnera ataaseq qaangiuppat tamanna pillugu uppernarsaammik tigusaqassaatit. Kommuneqarfik Sermersuumi Nalunaaruteqartarnermi Sulisumit nalunaarummik nassitsisimaninnik uppernarsaammik kingusinnerpaamik sapaatip akunnera ataaseq qaangiuppat tigusaqanngikkuit, uunga attaveqarfigisinnaavatsigut tlf: 36 60 60
Kommuneqarfik Sermersuumi Nalunaaruteqartarnermi Sulisup nalunaarutit tamaasa tiguneqarnerisa kingorna tiimit 24-t iluanni nalilersortarpai. Nukinginnartumik iliuuseqartoqassanersoq nalilersuinermi siullermi paasiniarneqassaaq. Tamanna pisarpoq ingerlaannartumik iliuuseqartoqanngippat meeraq inuusuttorluunniit annertuumik ajoquseriaannaasoq nalilerutsigu. Tulliullugu isumaginninnermik suliaqarnermi misissuineq aallartinneqassanersoq isummerfigisarparput. Isumaginninnermik suliaqarnermi misissuineq meeqqamut inuusuttumulluunniit pissutsit sukumiinerusumik misissorneqarnerannik kinguneqartarpoq. Tamanna pisarpoq atuarfimmit, paaqqinnittarfimmit allamiilluunniit oqaaseqaammik piniarnikkut aammalu meeqqap inuusuttulluunniit angajoqqaallu oqaloqatiginerisigut. Meeqqamut inuusuttumulluunniit ilaqutariinnullu ikiuinermik aallartitsisoqarneranik isumaginninnermik suliaqarnermi misissuineq kinguneqarsinnaavoq.
Meerartik pillugu nalunaarummik takkuttoqarsimatillugu, angajoqqaat Kommuneqarfik Sermersuumit ilisimatinneqartarput. Suliaq nakuusinermik meeqqamilluunniit atornerluinermik imaqartillugu angajoqqaat ilisimatinneqarneq ajorput, suliaq politiinit misissorneqassammat.
Suliassanik ingerlatsisutut meeraq pillugu isumakuluuteqarnermik nalunaaruteqaruit nalunaarutit isumaginninnermik suliaqarnermik misissuisoqarnissaanik kinguneqassanersoq paasitinneqarsinnaavutit. Inatsisartut inatsisaat nr. 20, 26. juni 2017-imeersoq malillugu isumaginninnermik suliaqarnermi misissuinerusinnaasoq nalunaarutip tigunerata kingorna kingusinnerpaamik qaammatit marluk qaangiuppata naammassereerneqassaaq. Misissuinerusinnaasoq naammassereerpat Inatsisartut inatsisaat nr. 20, 26. juni 2017-imeersoq malillugu ikiuinermik aallartitsisoqarsimanersoq kiisalu tamanna naleqquttutut nalilerutsigu ikuinerit suut pineqarnersut aamma paasitinneqarsinnaavutit. Paasissutissat taakku pissarsiarigukkit nipangiussimasussaatitaavutit.