Borgmesterip tullersortaata aappaa, Harald Bianco, Tasiilami ikiorsiisarnermut aaqqiissutit assigiinngitsut ulluni makkunani alakkallattaavai.
Ippassaq alakkaanermi Amarngivat siulliulluni pulaarneqarpoq. Tassani naartusut kiisalu angajoqqaat ajornartorsiuteqartut pingasut tikillugit ukiulinnik meerallik ullut tamaasa ikiorneqartarput. Harald Bianco Amarngivarmi katsorsaasumiit, Ina Kilime Mikaelsenimit illumi takornariartinneqarpoq. Ulluinnarni qanoq ingerlasoqartarnersoq suulli unammillernartut naammattoorneqartarnersut eqqartorneqarlutik.
Allaakasaqattaarnerit Inuusuttut Kulturikkut Illussaannut Igdlomut ingerlaqqippoq, tassani sanaartorneq sumut killinnersoq sanaartukkanik suliassinneqartartumiit oqaluttuarineqarpoq. Inuusuttut illussaanni susoqartassani inuusuttut nammineerlutik aalajangertussaavaat. Igdlo quleriinnik pingasunik initaqarpoq umiarsualivimmut, kangerlummut illoqarfimmullu isikkiveqarluni.
Aamma qimarnguvik “Naqqaavi” bormesterip tullersortaata aappaata pulaarpaa. Ilaqatariinnut siunnersorti Mariette Uitsatikitseq illumi angallassisuuvoq. Qimarnguvimmi arnanut meeqqanullu qanoq ikiorsiisoqartarnersoq kiisalu qanoq suleriuseqartoqartarnersoq eqqartorneqarluni.
Qimarnguvik 2016-imi ammarpoq, arnanut arfineq-pingasunut inissaqarluni, ilaqutariinni persuttaasarneq akiorniarlugu kiisalu arnarnik meeqqanillu ikorfartuinissaq qimarnguviup suliassaraa.
Anaanap-meeqqat illua aamma Harald Biancomiit alakkarneqarpoq, tassani pisortaq Nielsine Petersen naapippaa. Pulaarnermi illumi ulluinnarni qanoq ingerlasoqartarnersoq oqaluttuarineqarpoq.