Tasiilami Inuusuttut Kulturikkut Illussaat nutaaq Igdlo pingasunngornermi aggustip ulluisa tallimaanni persuarsiornerpalaartumik nappaanersiorneqarpoq. Taamaasillunilu Igdlo inuusuttunut tunniunneqarnissaa ungasigunnaarluni.
Nappaanersiornermi pisarneq malillugu oqalugiartoqarpoq, ilaatigut Igdlomi pisortaq Lars Rasmussen kiisalu Tasiilami kommunimi sulisunut immikkoortumi pisortaq Hjørdis Viberg oqalugiartuullutik. Immikkoortortami pisortaq oqalugiaammini ilaatigut ima oqarpoq,
”Inuusuttut siunnissaraagut, taamaammat inuusuttut ingerlalluarnissaat anguniarlugu Kommuneqarfik Sermersuumiit sinaakkutinik pitsaasunik pilersitsinissarput pingaartittuarparput.” Nangillunilu;
”Tasiilami inuusuttut nutaanik pilersitsisinnaasut amerlasuut pigaagut, illutaassarlu nutaanik suleqatigiiffiusumik pilersitsiffiusinnaallunilu ilikkagaqarfiusinnaanissaa periarfissaajumaarpoq, ilissiivorlu illumi ilusilersuillusilu immersuisussat, taamaammat malinnaanissannut kiisalu illu atulerpat pulaarnissannut qilanaarpunga.” Hjørdis Viberg oqarpoq.
Oqalugiartoqareermat pølsituuttoqarlunilu imeruersaatinik sassaalliisoqarpoq.
Tasiilami Inuusuttut Kulturikkut Illussaat inuusuttut soqutigisaat sammerusutaallu salliunneqarlutik ingerlanneqartussaavoq. Inuusuttullu sammerusutaat assigiinngitsupilussuupput, tunumiut qaanniortariaasaat malillugu qaanniornerniit nipilersornerit qitinnerillu nutaaliaasut ilaatigut sammineqartartussaallutik.
Inuusuttut Kulturikkut Illussaat Igdlo
”Igdlo nutaaq atorneqalernissaminut piareerpat periarfissanik amerlanerusunik pilersitsisussaavoq, sanaluttarfittaassaq tunumiusut qaanniornissamik periarfissiissaaq. Inillu angisuut tunumiut kulturikkut kingornussassaat immikkuullarissoq itisiliiffiginerullugit sammineqarsinnaannissaanik kiisalu eqqumiitsuliornerit nutaajunerusut misileraaffigineqarnissaannik ingerlataqarsinnaanermut periarfissiiumaarput. Ullumikkut inuusuttut illorigallagaat ataasiinnarmik ineqarpoq, taamaammat inuusuttut kulturikkut illugiligassaat periarfissarpassuarnik tunisisussaavoq, tamannalu inuusuttut innuttaasullu sinnerlugit nuannaarutigaara.” Tasiilami Inuusuttut Kulturikkut Illuanni Igdlomi pisortaq Lars Rasmussen taama oqarpoq.
Init taaneqartut saniatigut Igdlo nipilersortarfeqarumaarpoq, tassani inuusuttut nipilersuusiaminnik immiussisinnaallutillu katiterisinnaanissaminnik periarfissaqarumaarput, kiisalu inersuaqassalluni cafétalimmik.
Igdlo init quleriaat pingasunut agguarneqarluni sanaajuvoq, isikkivigissorsuulluni, tallittarfik, kangerluk illoqarfillu isikkivigisussaallugit.
FAKTABOKS
Igdlo 181 kvadratmeterinik angissuseqassaaq, taassuma saniatigut 100 kvadratmeterinik angissusilimmik aneersuaartarfeqassalluni. Pilersaarut malillugu Igdlo juullertinnagu inerlugu inuusuttunut atorneqarsinnaanngorlugu tunniunneqartussaavoq. Piffissaq tamakkerlugu sulisussat pingasut kiisalu ullup ilaannaa sulisussaq ataaseq sulisorineqassapput.