Innuttaasunut

Piujuartitsinermik tunngaveqartumik takornariaqarneq pillugu Nuuk siuttunngorniarpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Piujuartitsisumik tunngaveqartumik takornariaqarneq pillugu Nuup siuttunngortinniarneranik anguniagaqarneq pimoorunneqartorujussuuvoq, maannalu illoqarfik annertuumik alloriaateqarpoq EarthCheck, nunarsuarmi tamatuminnga ilisimasaqarnerpaajusoq suleqatigalugu

Nunatsinni illoqarfiit pingaarnersaanni piujuartitsisumik tunngaveqartumik takornariaqarneq pillugu ornitassani pingaarnersanngornissaq pimoorulluinnarlugu suliniuteqarpoq. Taamaattumik Nuup ataqqineqarluartoq EarthCheck suleqatigilerpaa, taannalu illoqarfiup anguniagaanik naammassinninnissamut ikiuutissaaq.

”Takornarissat piujuartitsinermik tunngaveqartumik pingaartitsisut tikisikkusoqaagut, taamaattumillu  takornariaqarnerup nukittorsarnissaanut pinngortitap asseqanngitsup paarilluarnissaa pingaaruteqarluinnarpoq. Immitsinnut tikeraartussallu eqqarsaatigalugit”, EarthCheck-mik suleqateqalernissaminik qilanaartoq borgmester Charlotte Ludvigsen oqarpoq.

Nuuk EarthCheckip piujuartitsisumik tunngaveqartumik takornariaqarneq pillugu suliaanut appakaappoq, tassuunalu illoqarfik sakkussanik aallertussaavoq aningaasaqarneq, avatangiisit, kulturi inunnillu attaveqarneq pillugit pitsanngorsaanissaminut, tamakkulu tamarmik tamakkiisumik isiginninnerup saniatigut ingerlanneqassapput.

Suleqatigiilerneq aamma Kommuneqarfik Sermersuumi Ineriartortitsinermut Piujuartitsinermullu Immikkoortortaqarfimmit nuannaarutigineqarpoq. ”Nunatsinni siullersaalluni EarthCheck-imit akuerisatut orninneqartartussanngornissaq aamma Nuup qanoq nittarsaanneqarnissaanut pingaaruteqassaaq. Aamma Nuuk ornitassatut inooriaatsimik pingaartitsiffiusutut, tikeraarfissatsialattut, suliffeqarfissatsialattut, inuuffigiuminartutut ilaqutariilerfissaqqissutullu erseqqissaatigissavarput, kommunimi suliamik ingerlatsisoq Salik Hard oqarpoq.