Nuummi Eqqumiitsulianik Saqqummersitsivimmi pinngortitaq qitiutillugu

Ulloq 9. januaarimiit 23. februaarip tungaanut Nuummi Eqqumiitsulianik Saqqummersitsivimmi NATURE // Home & Workplace saqqummersinneqarnerat alakkarsinnaavat. Soorlu taaguutaani oqariartuutigineqartoq, saqqummersitsinermi pinngortitaq pingaarnerpaatut sammineqarpoq, qalipakkani, qiperukkani atortulersuutinilu assigiinngitsuni qitiutinneqarluni.

Saqqummersitsinermi eqqumiitsuliortut 12-it tamarmik nunani avannarlerneersuupput, ilaatigut tassaalluni Nuummioq Inuk Silis Høegh. Eqqumiitsuliortut ilaat pinngortitami najugaqarput, tamarmillu assigiissutigisaat tassaavoq pinngortitaq annertuumik isumassarsiorfigisaramikku. Eqqumiitsuliortut pinngortitap tikikkuminarnera, pinngortitami najugartik kiisalu pinngortitap eqqumiitsuliornermut sunniutai saqqummersitsinerminni takutippaat.

Januaarip 9-ani 2020-mi nal. 17.00 nakkutilliisoq Lisbeth Eugenie Christensen aamma Johannes Larsen katersugaasiviani aqutsisoq Jeppe Priess Gersbøll-ilu saqqummiussisoralugit saqqummersitsineq ammassaaq.