Innuttaasunut

Kissaatigisaq – Ilaqutariit nukittuut Paamiunut uterteqqikkusunneqarput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Pingasunngornermi  juunip ulluisa 12-anni Paamiuni innuttaasunik ataatsimiititsisoqarpoq. Aningaasaqarnermut Inuussutissarsiornermullu Ataatsimiititaq Paamiunut innuttaasunik ataatsimiititsiartorsimavoq.

Paamiuni suliffissaaleqisut amerlisimapput, inuillu amerliartortut Paamiuniit nuuttalersimapput. Tamanna pillugu Aningaasaqarnermut Inuussutissarsiornermullu Ataatsimiititap innuttaasut isumaat tusarusussimavaa.

Inuit 40-t missaanniittut katersortarfimmut Taqqissuummut takkussimapput, susoqarneranillu alapernaasertut arlallit alakkaassimallutik. Kommunalbestyrelsimut ilaasortat aammalu Aningaasaqarnermut Inuussutissarsiornermullu Ataatsimiititami ilaasortat, Henrik Rachlev, Thiiooq Knudsen aamma Harald Bianco ataatsimiititsinermi najuupput. Aamma immikkoortortami aqutsisoq Heidi Jeremiassen taavalu Suliffeqarnermut Isumaginninnermullu pisortaq Isak Kleist Nielsen innuttaasunik ataatsimiititsinermi najuuttut ilagaat.

Isummersuuterpassuit

Innuttaasut suleqatigiikkuutaanut pingasunut avinneqarput, tamarmillu immikkut sammisaqartinneqarlutik.

Qulequttat pingasut tassaapput, Paamiuni utoqqaat pitsaanerusumik qanoq sullinneqarsinnaalissanersut. Suliffissaaleqineq ajornartorsiutillu allat pissutigalugit inuit allamut nuuttarput. Qulequttami kingullermi sammineqarpoq, siunissaq qanoq ilusilersorneqassanersoq.

Isumaqatigiissutigineqarpoq illoqarfik uummaarinnerulersinneqartariaqartoq. Innuttaasut kissaatigaat ilaqutariit Paamiunut uteqqittariaqartut. Innuttaasut ilaata qinikkanut nassuiaatigaa periarfissarpassuaqartoq, periarfissallu qanoq atorluarneqassanersut paasiniaannartariaqartoq.

Efterskole, naluttarfik utoqqaallu illersuisuat kissaatigineqartut eqqaaneqartut ilagiinnarpaat.

Siunissami suliffissarpassuit qulakkeerneqassappata innuttaasullu amerlanerit illoqarfimmut nuttalissappata, illoqarfik qanoq iliuuseqarfigineqarsinnaanersut isummersuuterpassuarnik saqqummiussuisoqarpoq. Paamiut ilisarnaataa nattoralik takornarialerinermi periarfissatsialaavoq, isertuunneqanngilarlu, aamma takornarialerinerup aallartisarneqartariaqarnera. Aamma inuusuttut ilinniarnerminnik naammassereeraangata illoqarfimmut uteqqinnissaannut tunngavissaqarluartariaqarpoq, taamaattumik amerlasuut aamma kissaatigaat pitsaasunik inissaqartitsisoqartariaqartoq.

Tusaaniarusuppatsigit

 Akunnerit aappaata affaa qaangiummat ataatsimiinneq naggaserneqartariaqalerpoq. Suleqatigiikkuutaat tamarmik kissaatigisatik oqaatigerusutatillu saqqummiuppaat. Thiiooq Knudsenip innuttaasunut neriorsuutigaa, kommunalbestyrelsimut ilaasortat pingasuinnaallutik najuukkaluartut, kommunalbestyrelsimut ilaasortat 19-iupput, kissaatigineqartunut tusaaniarusuttut. Innuttaasut nuannaarput, kissaatigigaluarlugu Paamiut siunissaat pillugu sivisunerusumik oqallittoqarnissaa.