Tasiilami qimarnguimmi arnat ingerlariaqqinnissaannut ikiorserneqartarput

Qimarnguik 2016-imi ammarneqarmalli Tasiilami nunaqarfiinilu arnanit atorluarneqartarpoq. Qimarnguik "Naaqqavi" inunnut arfineq-pingasunut inissaqarpoq, tassanilu ilaqutariinni nakuusertarnerup akiorniarneqarnissaa aammalu arnanut meeqqanullu ikorfartuinerit suliarineqartussaapput.

”Qimarnguimmi inoqartuaannarpoq. Qujanartumilli aamma ilaqutariit ilaasa ikiorserneqarnissartik ilassilluartarpaat, pitsaanngitsumillu pissusilersuutigisartakkaminnit aniguinissartik iluatsittarlugu, ilaqutariinnut sullissivimmi ningiuusoq Elise Uupi Kuitse oqarpoq.

”Qanittukkut arnaq ataaseq meeqqanilu sivisuumik maani najugaqarput. Meeqqani ilaliullugit uini qimassimavai. Qimarnguimmi arnaq ikiorneqarpoq, oqaloqatigineqartarnissaanik neqeroorfigineqarpoq, siunissarlu pillugu oqaloqatigineqarluni. Arnap uini imerunnaanngippat uterfigeqqinnissaa nakerisimanngilaa. Uisoq imigassamik atornerluinerminit katsorsartinnissaanik neqeroorfigineqarsimavoq, qujanartumillu akuersaarsimavoq. Ilaqutariit maanna ataatsimooqqilersimapput, ilaqutariinnillu ilatsittumik ingerlariaqqittoqaraangat nuannertaqaaq.

”Arnarpassuit angerlarsimaffimmi persuttarneqartartut amerlaqaat, tamannalu meeqqanut tuttarpoq. Qimarnguimmi toqqissisimaneq, isumannaatsumiinneq ikiorsiinerlu neqeroorutigisinnaavarput. Ilaqutariinnut siunnersortimik Qimarnguimmut atasumik sulisoqarpugut, taassumalu arnat oqaloqatigisarpai ilaatigullu nutaamik inooriaaseqalernissaannut aqqutissiuuttarlugit”, Elise Uupi Kuitse oqarpoq.

Borgmester Asii Chemnitz Narup: ”Arnat nakuuserfigineqartartut ikiorserneqarnissaminnik ujartuisarnerat sapiitsuliorluinnarneruvoq. Namminneq kisimik ikiorserneqarnissartik piinnarnagu meeqqamik ingerlalluanngitsumik aappariinnerup nassatarisaanik misillertartut ikiorneqarnissaat eqqarsaatigalugu.  Arlaanik iluatsittoqartillugu nuannertuaannarpoq. Arnat meeqqallu illersussavagut, pitsaanerusumillu siunissaqarneranik ikiorlugit. Naaggaarnissaq pingaaruteqarpoq ingerlariaqqillunilu, kisimiilluni imaluunniit ataatsimoorluni”, Asii Chemnitz Narup oqarpoq.