Sermersuumi missingersuusiornermi isumaqatigiissut

Tallimanngornermi ulloq 25. oktobari Kommuneqarfik Sermersuumi kommunalbestyrelsimi amerlanerussuteqartut tassaasut Suleqatigiissitsisut partiat, Demokraatit aamma IA, 2020-mut missingersuutit isumaqatigiissutigivaat.

Kommunimit akileraarutit aappaagu allannguuteqassanngillat. Ingerlatsinermut missingersuutit 1,7 milliarder koruuniussapput, sanaartornermut missingersuutit 296 millioner koruuniullutik, missingersuutitigullu 80 millioner koruuninik sinneqartooruteqarnissaq partiinit isumaqatigiissuteqarniartunit kissaatigineqarpoq, siunissami aamma kommunip ineriartortinneqarnissaanut aningaasassaqartoqarsinnaaqqullugu. Partiinit isumaqatigiisuteqartunit kommunimi allaffissornermut aningaasartuutit qaffannginnissaat aamma pingaartinneqarpoq. Taamaattumik akissarsiatigut qaffaasoqarnissaa missingersuutinut ilanngunneqanngilaq.

Ineriartorneq ikorfartorlugu 

Kommuneqarfik Sermersooq ukiuni makkunani oqaluttuarisaanermi aatsaat taamak nutserfigineqartigaaq. Taamak nutsertoqartiginera missingersuutinut malunniuppoq. Kommunip missingersuutaasa 15 procentiat sanaartornermut immikkoortinneqarput. Aningaasat taakku ilaatigut Nuummi aamma Tasiilami inissialiornermut nutaamillu attaveqaatilersuinissamut atorneqassapput. Aammattaaq sanaartorfissagissaanermut missingersuutit 25 procentinik qaffanneqarput, Nuummi nunaminertat piumaneqarnerat annertooq malinnaaffigiumallugu.

Meeqqat qitiutillugit

Meeqqanut tunngasuni suliassarpassuit aamma missingersuutini annertuumik sunniuteqarput.  Partiit isumaqatigiissuteqartut aallaqqaammulli isumaqatigiissutigivaat, meeqqat atugarliortut sullinneqarnerat ajorseriaateqartinneqassanngitsoq, akerlianilli meeqqanut tunngasunut aningaasat amerlineqassapput.

Assersuutigalugu, ukiuni arfineq pingasuni tulliuttuni 12,5 millioner koruunit suliniummut Tasiilami Suleqatigiippugut immikkoortinneqarput, tassani Tasiilami suliniutit aamma pitsaaliuinermik iliuuseqarnerit aqqutigalugit inuiaqatigiinnik inerisaasoqarlunilu aaqqissuussisoqarpoq.

Illoqarfiit pitsaanerusut

Kommuneqarfik Sermersooq ukiuni kingullerni kommunimi innuttaasunut immikkoortunik sukisaarsarfissanik pilersitsinissi sulissutigivaa. Tamanna ilaatigut sineriak sinerlugu aqqutissaliornermik, illoqarfiup qeqqani biilerfiunngitsunik amerlanerusunik, kiisalu Nuummi Nuussuup Mannguani nutaamik sammisassaqartitsivimmik pilersitsinermik kinguneqarpoq.

Immikkoortut sukisaarsarfiusinnaasut annertusarneqarnissaannut ukiuni tulliuttuni tallimani ukiumut 5 millioner koruunit immikkoortinneqarput.  Aamma umiatsiaqqaarani tikinneqarsinnaasunik Nuup qanittuani illuaraliortoqassaaq. Illuaqqat atuarfinnit, paaqqinnittarfinnit utoqqarnillu atorneqarsinnaasunngorlugit sullivinnik nakkutilliisoqarfiup piumasaqaatai naapertorlugit sanaartorneqassapput.

Kalaallit Nunaata Kangia nunaqarfiilu

Partiit isumaqatigiissuteqartut ukiuni tulliuttuni tallimani 25 millioner koruunit Kalaallit Nunaata Kangiani internetsip pitsanngorsarneqarnissaanut aamma 70 millioner koruunit kommunip nunaqarfinnut immikkoortunut pilersaarutip naammassineqarnissaanut atugassat immikkoortippaat. 

Partiit isumaqatigiissuteqartut isumaqatigiissutaat uani atuarsinnaavat