Inuussutissarsiornermik ineriartortitsinissamut periarfissat pitsaanerpaat

Kommuneqarfik Sermersuup, Kalaallit Airportsip aamma Greenland Venturip najukkami suliffeqarfiit sisamanngornermi ualikkut Grønlandsbankip nerisarfiani ”soraajutigaluni ataatsimiinneq”-mut qaaqquai. Nuummi mittarfittaassaq inuussutissarsiornermut qanoq periarfissiissanersoq, suliffeqarfiillu ineriartortitsinermut qanoq peqataatinneqarsinnaanersut ualikkut ataatsimiinnermi sammineqarpoq.

”Pisariaqartitassi tunniussinnaanissaat pikkoriffiginerulissavarput. Taamaammat namminersorlutik inuussutissarsiuteqartut ineriartortitsinissaata qanoq patajaallisarneqarsinnaanera pillugu oqaloqatigiinnerup pitsanngorsarneqarnissaanut iliuuseqassaanga,” borgmester Charlotte Ludvigsen Nuummi suliffeqarfinnit peqataasorpassuarnut tikilluaqqusilluni taama oqaaseqarpoq.

Nangipporlu, ”Aningaasat akileraarutigisartakkasi sullissinitsinnut tunngaviliisuupput. Taamaammat siunissami innuttaasutsinnut sullissisinnaajumalluta inuussutissarsiornermik ineriartortitsinissamut periarfissanik pitsaanerpaanik qulakkeerinninnissarput pingaaruteqarpoq. Taamaattumik innuttaasutsinnut suliffeqarfitsinnut iluaqutaasussamik inuussutissarsiornermut akuersaarnerusariaqarpugut.”

”Mittarfiup allilerneqarnissaa periarfissarpassuarnik pilersitsissagami illoqarfitsinnik alliartortitsinissamut ineriartortitsinissamullu kivitsisooqataassaaq, periarfissanillu atorluaanissarput piareersimaffigisariaqarparput.”

Borgmesteri tikilluaqqusereermat Karin Pedersen Vækstfondenip – ineriartortitsinissamut aningaasaateqarfiup – aamma Greenland Venturip inuussutissarsiuteqarnermik ingerlataqartunut aningaasanik atukkiinissaannik periarfissat pillugit saqqummiivoq. Kommunaldirektøri Lars Møller-Sørensen suliniutit maannakkut ingerlasut pillugit paasissutissiivoq Kalaallit Airportsimilu Sanaartornermut pisortaanerup tullia Aviaaja Karlshøj Knudesen mittarfiliornerup killiffia pillugu saqqummiivoq.

Saqqummiisoqareermat peqataasut saqqummiisunik ilassinninnissaminnut aamma sammisat takorluukkallu assigiinngitsut saqqummiunneqartut pillugit oqaloqatigiinnissamut periarfissaqartinneqarput.

”Soraajutigaluni ataatsimiinneq” Kommuneqarfik Sermersuup inuussutissarsiornermillu ingerlataqartut tamanut iluaqutaasussamik suleqatigiinnissaat pitsanngorsaaviginiarlugu ataatsimiisitsinerit suliniuteqarnerillu pilersaarutaasut arlaqartut siullersaraat.