Katersuigaasiviup iluarsartuunneranut inuusuttut peqataatinneqassapput

Malunngormat ullaakkut Melissa Vilumsen katersugaasivimmi ilinniartoq suliartorami tupaallannaqisumut iserpoq. Katersugaavik tamavimmi, Tasiilami oqaluffitoqqamiittoq, unnuap ingerlanerani aserorteriffigitingaatsiarsimavoq.

”Alianarluinnarpoq paasiuminaalluinnarlunilu” Lars Rasmussen katersugaasivimmi aqutsisup pisup nalaani Nuummut ataatsimeersuariarsimasup, pisumut taamak oqaaseqarpoq.

”Katersugaaviup iserfigineqarsimanera Tunumilu kulturikkut kingornussanik aserorteringaatsiartoqarsimanera paasiuminaalluinnarpoq. Sumiiffiup immikkuullarissumik oqaluttuarisaanera saqqummersitallu taarserneqarsinnaanngitsut katersugaasivimmi saqqummersitaatigineqarput” katersugaasiviup aqutsisua nangippoq

Katersugaasivimmi aserorneqarsimasut assersorneqaqqammerput aaqqissuussinissarlu annertoqisoq tullinnguuppoq pingaarnertullu aserorterneqarsimasut qanoq annertutiginersut misissornissaat. 

”Katersugaatigineqartut amerlanerpaat assigineqanngillat qajannartuullutillu. Massakkut katersugaatit allamut nuussorneqarput Tasiilamulli uteruma aatsaat inaarutaasumik qanoq innersut nalilersorluarsinnaanerussavakka” katersugaasivimmi aqutsisoq naqissusiivoq.

Katersugaasivimmi iluarsartuussinermi Destination Eastgreenland aamma RF Electronics ikiuupput. Katersugaasiviup atoqqissinnaalernissaanut suliniuteqarneq najugaqartunit tapersersorneqarluarpoq.

”Alianaqisumik pisoqarnerata nalaani iluatsiffinnik isiginiartariaqarpugut. Pisumit nukittunerulluta, ullutsinnilu kulturikkut ingerlatitseqqiisutullu naleqqunnerusutut inissisimalernissaq kissaatigaarput. Tamanna najukkami innuttaasut qanimut suleqatigalugit pissaaq. Inuussuttut kulturikkut illorsuaat suleqatigalugu illoqarfimmi inuusuttut peqataatissavavut. Inuusuttut oqaluttuaataat najukkaminnilu oqaluttuassaat pillugit ingerlatitseqqinnissaannut suliniuteqarnermut peqataatinneqassapput. Najukkami innuttaasut tapersersuinerat nalunnginnatsigu neriulluaqaagut” katersugaasivimmi aqutsisoq naggasiivoq.

Kommunimiit katersugaasivimmi pisoq pimoorunneqarpoq katersugaasiviullu atuleqqinnissaanut aalajangiissutigineqartariaqartut aalajangiissutigineqarput. Decembarilli aallaqqaataata tungaanut saqqummersitat alakkarneqarnissaannut matoqqagallarnissaa naatsorsuutigineqarpoq, assinilli saqqummersitanik katersugaasivik nalinginnaasumik ammasassaaq.