Allagartap nipilersornermik ilinniarfiup aqqutaa takutissavaa

Ukiuni kingullerni Sermersuumi Nipilersornermik ilinniarfik kommunimi innuttaasunut nipilersornermik ilinniartitsinermik neqerooruteqartarsimavoq. Massakkullu illut nipilersornermik ilinniarfiup inissisimaffiisa saavini igalaavinilu allagartarsualiisoqarpoq. Taamaalillunilu Nipilersornermik Ilinniarfik illoqarfimmi Kommuneqarfik Sermersuumi ersarinnerulissaaq, ilinniartullu ajornannginnerusumik ilinniariarfissartik nanisinnaalissavaat.

Sermersuumi Nipilersornermik Ilinniarfik sunngiffimmi sammisassaqartitsinermi neqeroorutinut ilaavoq, innuttaasunut 21-t tikillugit ukiulinnut, inuusuttullu erinarsoqatigiit Qupannavaat aamma Nuuk Byorkesterit inersimasunut neqeroorutaasoq akisussaaffigalugit. Nipilersornermik ilinniarfiup neqeroorutigaa, erinarsoqatigiinni, nipilersuusiornermi, nipilersoqatigiinnermi nipilersuutinillu assigiinngitsunik atuinissamut soorlu saxofoni, guitari, cello, ukulele, qarlortaat tumerparpaallu atornissaannik ilinniartitsineq.

Ilinniartitsineq holdikkuutaaraluni aamma ataasiakkaaraluni ingerlanneqartarpoq, ilinniartullu nipilersuut ilinniagartik aallulluareeraangamikku nipilersoqatigiinniinnissaminnik neqeroorfigineqartarput.

Niplersornermik Ilinniarfik Kommuneqarfik Sermersuumi tamarmi ukkatarineqarpoq, Kulusumi, Tasiilami Paamiunilu immikkoortoqarluni. Kikkut tamarmik nipilersornermik ilinniarfimmut tikilluaqquneqarput, ilinniartitsinerlu akeqanngilaq.