Peqatigiiffiliornissannik eqqaasaateqaruit imaluunniit peqatigiiffiit silarsuaanni qangali suleqataareeruit januaarip ulluisa 26 nalunaaqutaq 16.00 USK-p kantiinaanut paasissutissiinissamut ataatsimiigiarnissannut tikilluaqqusaavutit. Ataatsimiinnermi Kommuneqarfik Sermersuumi peqatigiiffinnut tapiissutinut maleruagassaat nutaat pillugit paasissutissiisoqassaaq.
Kikkut tapiiffigineqarsinnaanersut kikkut qinnuteqarsinnaanersut aningaasallu sumut atorneqarsinnaanersut pillugit paasissutissiissutit sukumiinerusut tusarsinnaavatit.
”Suliniutit arlallit nutaat peqatigiiffiit ajornannginnerusumik ineriartortinneqarnissaannut iluaqutaasussaapput. Kommunalbestyrelse ilaatigut peqatigiiffinnut pilersinneqaqqammersunut, peqatigiiffinnut sapiiserluni timersortartut, peqatigiiffinnullu aasaanerani meeqqanut susassaqartitsiniarnernut aningaasaliiffigineqarnissamut qinnuteqarfissamik immikkut ittumik aningaasanik immikkoortitsinissaq aalajangiuppaat” Kommuneqarfik Sermersuumi Peqqinneq Sunngiffimmilu Immikkoortortaqarfimmi pisortaq Akannguaq Lennert oqaluttuarpoq.
Ataatsimiinneq akunnernik marlussunnik sivisussuseqarnissaa pilersaarutigineqarpoq. Kaffeqassaaq teeqarluni paarnat isseqassaaq naatitaqarlunilu.