Sapaatip akunnerini 30-mi 31-milu Inuusuttut Kulturikkut Illuata graffiti sammivaa

Graffiti atorlugu eqqumiitsuliortoq Mathias Stenbakken workshopimillu ingerlatsisoq Camilla Flebo peqatigalugit atuarfiup silataata graffitimik kusassarnissaa Tasiilami Alivarpi isumaqatigiissuteqarfigaat. Tasiilami meeqqat, inuusuttut ilaqutariillu aasaanerani sammisassaqarnissaat siunertaraat, aammattaaq graffiti eqqumiitsuliatut kusassaatitullu ilisaritinnissaa siunertaalluni.

Graffiti eqqumiitsuliatut ilisaritikkusupparput, neriulluta siunissami illoqarfimmi piffiit assigiinngitsut aamma kusassarsinnaajumaarlutigit. Graffiti eqqumiitsuliatut ilisaritipparput, kisianni aamma sammisassamik inuusuttunut soqutiginarsinnaasumik pilersitsivugut, peqataasullu tamarmik tulluusimaarutigisinnaasaannik”, Inuusuttut Kulturikkut Illuanni aqutsisoq, Mia Skifte Lynge, nassuiaavoq.

Graffitip samminera Katersortarfimmi aallarnerneqarpoq, ilaqutariit tamarmik tikilluaqqusaallutik. Mathias aamma Camilla savami karrylimmik sassaallerput, unnullu graffitimut tunngasumik filmeeqqamik isiginnaarnermik, nuannisaarnermik titartaanermillu atorneqarpoq. Unnuup ingerlanerani Mathias aamma Camilla meeqqanut inuusuttunullu tunissutinik agguaapput.

Tallimanngornermi ullup qeqqanut atuarfimmi naapipput, peqataasullu formningertarfimmi titartaapput. Meeqqat kalaallit nunaanni uumasut isumassarsiorfigaat. Qisummut pladimut aamma qalipaapput, tassani ”puisi” qulequtaralugu, meeqqallu namminneq puisimik qalipaallutik. Qalipagaq Inuusuttut Kulturikkut Illuannut tunissutaavoq.

Mathias Stenbakkenimut Tasiilamut graffitileriartorneq immikkut pingaaruteqarpoq: ”Tasiilami meeraanikuuvunga, tamaanilu graffiti ilinnialerlugu. Massakkut tamaaniinnera assut immikkuullarippoq, tassami meeraallunga ikinngutigisakka, ilinniartitsisorinikuusakkalu naapippakka, taavalu tamaani meeqqat graffitilereqatigineri assut nuannaarutigalugu. Neriuppunga graffitilerineq ingerlateqqillugu tunniukkiga, aamma graffitilerinerup misilittaaffiginerulissagaat neriuutigaara.”

Titartakkat tamarmik katersorneqarput, Mathiasillu tigusiffigalugit ataatsimut titartarpai, taakkualu atuarfiup isaariaata saniani iikkamut qalipallugit.
Atuarfiup aneertarfiani aamma titartakkanit tigulaaraluni Mathias qalipaavoq, tassani inuusuttut titartagaa atorlugu Sassuma Arnaa qalipappaa.

Meeqqat inuuusuttullu tissaluttaammik qalipaaneq misilippaat, pingaarnertulli graffitilerinermi aqqusaagaassat malinnaavigaat; titartakkanik piareersaaneq, ataatsimoortiterineq, graffitimik qalipaanermi allornerit arlallit. Graffitimik qalipaaneq akunnattumik aallarteriarluni kusanartupilussuarmik naammassivoq.

Meeqqanut inuusuttunullu sammisani, suliallu ineriartortinnerani peqataalluartunut qujarusuppugut, suleqatigalusi assut nuanneqaaq.

Inuusuttut Kulturikkut Illuata Mathias aamma Camilla suleqatigiilluarnermut qutsavigerusuppai, ilanngullugillu Sermeq Puljen suliap piviusunngortinnissaanut aningaasaliisoq qutsavigerusuppaat. Tasiilami Alivarpi, suliamut tapersersuilluarnermut, atuarfiup atorneranut, iikkanillu qalipatassatsinnik periarfissiineranut qutsavigineqarpoq.
Tasiilami Pilersuisoq katersortarfimmi nerisitsinermut nerisassanik tunniussineranut annertuumik qutsavigineqassaaq, RF Elektronik meeqqanut pinngussanik tunniussisoq, aamma STARK Tasiilaq pujoralannut illersuutinik tunniussisoq aamma qutsavigineqarput.

Peqataasut tamarmik pinngussanik tunineqarput pinngussallu sinneri Tasiilami Prinsesse Margrethep Børnehjemmianut pajugutigineqarput.