Saliinerujussuaq aallartippoq

Maannamut Tiilerilaami aamma Kuummiini eqqakkat 800 tonsit katersorneqareerput

Qanittumi suliniutinut siunnersorti Ivan Falck Petersen, ingerlatsinermut aqutsisoq Ulrich Gaffuri kiisalu Sanarfinermut Avatangiisinullu Immikkoortortaqarfimmiit Anitta Kofoed eqqakkanik passussisarneq aammalu illut aserfallassimangaarmata najugarineqarsinnaajunnaarsimasut isaterneqaratarsinnaasut takuniarlugit Kuummiiniipput.

Ivan Falck Petersen: – Kommunip nunaqarfiini pisortat saligaatsuutitsinissaat pitsaanerusoq kiisalu eqqakkanik passussinerat anguniarlugit, 2016-imi saligaatsuutitsinissamut suliniuteqarneq annertooq Sanarfinermut Avatangiisinullu Ingerlatsivimmit aallartinneqarpoq.

Suliaq suliffeqarfiup 60 Grader Northip Kommuneqarfik Sermersooq suleqatigalugu akisussaaffigaa.

Saliinermut siulittaasoq, Emil Lyberth: – Ingerlalluarpoq. Ukioq kingulleq aggustip qaammataaniilli aallartippugut maannalu angusaqangaatsiareerluta. Aasat tamaasa suliartortarpugut ukioraangallu aatsaat Kujataanut angerlartarluta. Kujataani savat nerisassaannik savaatilinnit tamanut aggiussisarneq akisussaaffigaarput.

Suliffeqarfik sisamanik umiarsuaateqarpoq, pingasullu Tunumiipput.

– Umiarsuit marluk Tiilerilaap aamma Kuummiit akornanni angalasarput eqqakkanillu Tasiilamukaassisarlutik. Umiarsuit ataasinngornermiit sapaat ilanngullugu ingerlasarput tamatigullu eqqakkanik 50 tonsit missaanniittunik usisarlutik. Tamatuma kingorna eqqakkat Nuummi ikuallaavimmut nassiunneqartarput.

– Ulloq manna tikillugu eqqakkat 800 tonsit missaanniittut katersoreerpavut. Tiilerilaami suliat suliarisavut pillugit nersualaarneqartaqaagut, soorunami tamanna nuannaarutigeqaarput. Taamaattumiguna sulinerput ingerlatiinnaripput. Najukkami sulisut kisiisa atorpavut.

Eqqakkat tamaasa katersorneqareeraangata Nuummullu nassiunneqareeraangata, Tiilerilaami Kuummiinilu eqqaavissuup nunataa manissarneqartarpoq, taamaalilluni tamaani eqqaavissuaqarsimanera takuneqarsinnaanani.

Eqqakkat nassiunneqartigatik immikkoortiterneqartarput, poortorneqarlutik taamaalillutillu Nuummut nassiunneqanngikkunik atoqqitassanngortinneqartarput.