Nuuk millisillugu assilisaliaq rådhusimi atulerneqarpoq
Kommuneqarfik Sermersuup aqagu tallimanngorpat, Nuummik 3D-mik illoqarfiusaliaq nutaaq saqqummersissavaa. Illoqarfiusami illoqarfiit pingaarnersaata avataani pinngortitaq ilanngullugu suliarineqarsimavoq.
“3D-mik illoqarfiusaliaq arlalitsigut sulinermi atortussatut takorloorneqarsinnaavoq. Illoqarfiusaq illoqarfiup ineriartortinneqarneranut pilersaarutit pioreersut takkukkumaartullu eqqartorneqarnerannik nukitsorsaataassaaq. Illoqarfiup qanoq innera aallaavigalugu, allannguutissat qanoq tulluussarsinnaaneri paasiuminarnerulissaaq,” Kommuneqarfik Sermersuumi pilersaarusiornermi pisortaq, Bilo Høegh Stigsen oqarpoq.
Nuuk illoqarfittut ukiuni kingullerni 50-ni sukkasuumik ineriartorsimavoq, illoqarfillu tulleriiaartumik allilerneqartarsimavoq. Illoqarfiup ineriartorneranik oqaluttuaq tamanna, Bilo Høegh Stigsen naapertorlugu, illoqarfik sooq qanorlu taamak isikkoqalersimaneranik paasisitsiniaanermi ilaalissaaq.
“Ineriartorneq sukkasooq tamanna illoqarfimmi illuliortarnermilu takuneqarsinnaavoq. Illoqarfik Nuutoqqami, illoqarfiup immikkoortortaani pisoqaanersaasumi ukiuni uuntritilikkaani najugaqarfigineqarsimasumi tunngavilerneqarsimavoq.”
“Nuuk piffissap sivikitsup ingerlanerani inoqarfeerannguaasinnarluni illoqarfiit pingaarnersarilersimavaat. Ineriartorneq sukkasooq tamanna illoqarfimmi illuliortarnermilu takuneqarsinnaavoq. Illoqarfik Nuutoqqami, illoqarfiup immikkoortortaani pisoqaanersaasumi ukiuni uuntritilikkaani najugaqarfigineqarsimasumi tunngavilerneqarsimavoq. Nuuk aamma 1200-kkunnili Inuit piniariarfinnaarisimavaat, piniagassaqarluarnera kangerlummilu inissisimanera atorluarumallugu.”
Illoqarfiusaq arlalinnik siunertaqassaaq. “Siunissami illoqarfiit pingaarnersaata ineriartornerani suleriaatsit pitsaasut angorusullugit illoqarfiusaq suliaritissimavarput, Nuullu oqaluttuassartaata pissanganartup oqaluttuarineqarnerani sakkussaqarumalluta,” Justus Hansen (D), Sanarfinermut Avatangiisinullu Ataatsimiititami siulittaasoq oqarpoq.
Kommunip ilanngullugu pilersaarutigaa Kommuneqarfik Sermersuumi illoqarfiit sinneri illoqarfiusaliarineqarnissaat.