Ataatsimiititap Århusimi atuarfiit periuuserissut qimerlooraat

Qanoq ilillugu ullup ingerlanerani meeqqat inuusuttullu aalanerunissaat qularnaarneqarsinnaava? Qanorlu ililluta inuusuttut sapinngisamik amerlanerpaat ilinniakkamut ingerlariarteqqissinnaavagut? Tassaapput Kommuneqarfik Sermersuup Meeqqanut Atuarfeqarnermullu Ataatsimiititaa sapaatip akunnerani kingullermi paasisassarsiorluni Aarhusimut angalanerani ataatsimiititap apeqqutaasa ilaat.

Tassani ataatsimiititap ilaatigut atuarfiit assigiinngitsorujussuit pingasut pulaarpai, tamarmik immikkut atuartuutimik ilikkagassatigut angusaannik kivitsinikkut iluatsilluartut aammalu ullup atuarfiusup ingerlanerani atuartut timiminnik naammattumik aalatitsinissaannik qulakkeerisumik.

”Atuarfiit nutaaliornissamik eqqarsarsimanerat ajasoornartuuvoq. Atuartut ilikkagaqarnissamut avatangiiserisaanni aalanissaq ilanngunneqareersimavoq, aamma atuarfiup ilusilersugaanera eqqarsaatigilluangaavoq.”, Meeqqanut Atuarfeqarnermullu Ataatsimiititami siulittaasoq Nivi Olsen oqaluttuarpoq.

Kommuneqarfik Sermersooq nammineerluni Nuup illoqarfiata qeqqani nutaamik atuarfiliortussaavoq taassumalu 2021mi naammassineqarnissaa ilimagineqarpoq.

”Atuarfiit, meeqqeriviit, klubbit sunngiffimmilu neqeroorutit pitsaasumik oqaloqatigereerpavut tamarmillu amerlasuunik isumassarsiatsialannik tunniussaqarput, suliaqarnissatsinnut naammattumik angerlarnitsinni tunngavissaqalerluta”, oqarpoq Nivi Olsen.