Qeqertarsuatsiaani kommuunip illuutai nutaat

Kapisilinni Qeqertarsuatsiaanilu Nunaqarfimmi Aqutsisut illunik nutaanik takornariartitsipput.

Kommuneqarfik Sermersuumi ineriartorneq nunaqarfinni aamma ingerlavoq. Tamanna igammik Qeqertarsuatsiaani innuttaasut ukiup kingulliup ingerlanerani malugisinnaasimavaat. Borgmester Asii Chemnitz Narupip Qeqertarsuatsiaat tikeraarpaa, nunaqarfimmi aqutsisut naapinniarlugit illullu nutaat alakkarterlugit.

“00’ukkunnili kommunit kattussuunneqanngikkallarmatali Qeqertarsuatsiaani innuttaasut minihalimik kissaateqartarsimapput. Nuup Kommunia arlaleriarluni taamani Namminersornerullutik Oqartussanut aningaasaliiissutissanik qinnuteqartarsimavoq iluatsinngitsumik. Maanna nunaqarfimmi aqutsisut suleqatigalugit aaqqiissutissamik nassaarsimavugut, tamannalu tanngassimaarutissaavoq, innuttaasummi sumiiffissat ukiorpassuit amingaatigisimasatik maanna atorsinnaalersimavaat,” borgmester Asii Chemnitz Narup oqarpoq.

Minihalimik innuttaasut kissaateqarnerat, katersortarfiup, atuarfimmut atasup siorna decembarimi allineqarneratigut aaqqiivigineqarpoq. Qeqertarsuatsiaarmiunut inissaaleqiffiunani maanna katersortarfimmi aaqqissuussinernik ingerlatsisoqarsinnaalerpoq. Inip isuanut atasumik allamik ineeraqarpoq, nipilersortunut sungiusartarfiusumik inersuarmullu ammaanneqarsinnaasumik. Sungiusartarfiup qulaani nukkassartarfeqarpoq, nukkassaatinik arpaffinnillu atortulersorsimasumik.

Qeqertarsuatsiaani Kommuneqarfik Sermersuup immikkoortortaqarfia aamma allilerneqarsimavoq. Illup ilassuta 30. juni naammassisoq ilaatigut ataatsimittarfittaqarpoq avammut immap tungaanut isikkivilimmik. Nunaqafimmi aamma nutaaqqinnaamik illumik sanasoqarsimavoq. Tassami upernaap ingerlanerani, Qeqertarsuatsiaat kujammut isuani kommuni atortuminut garagemik sanasimavoq.

Kommunip nunaqarfimmi sanaartukkani suli naammassinngilai. Ukioq manna kingusinnerusukkut kingusinnerpaamillu aappaagu arsaaffiup suliaqqinneqarnera naammassineqarsimassaaq.

Qeqertarsuatsiaani takornariartitsineq

Nunaqarfimmi aqutsisut siulittaasuata Manassinnguak Noahsenip borgmester Asii Chemnitz Narup, nunaqarfimmi takornariartillugu ulloq naggaserpaa. Pulaarneqartut ilagaat ujaqqerivik, Qeqertarsuatsiaat kujataani rubinisiorfiup pilersinneqarneranut atatillugu aallartinneqarsimasoq.

Sannavik alla pulaarneqartoq tassaavoq Amitsialak. Taanna amminik mersorfiuvoq Nuummi Kittat ataani ingerlanneqartoq. Qeqertarsuatsiaat ilaatigut ilisarnaatigivaa pooqattak Fiskenæstaskemik taaneqartartoq, kinguaariiaat arlallit ingerlanerini sananeqartarsimasoq.

Bormgester Asii Chemnitz Narupip Qeqertarsuatsiaani tikeraarnini, utoqqaat illuanni naggaserpaa. Tassani utoqqaat arfineq marluk angerlarsimaffeqarput taakkulu ilagaat Lydie Motzfeldt. Taanna 85-nik ukioqarpoq, taassumalu borgmesteri inimut, ilaquttaminik inuusuttuunerminillu assilialersorsimasaminut pulaartippaa.

Kapisilinni Qeqertarsuatsiaanilu nunaqarfimmi aqutsisut tulliani Kapisilinni ataatsimiissapput septembarip ingerlanerani.