Qamutit motoorillit kingaannerit peernerisigut, Kommuneqarfik Sermersuup ullaakkut angallanneq eqaannerusumik ingerlalersinniarpaa.
Nuup Nuussuullu akornanni sullorsuarmi ujaqqanik nakkaasoqarsinnaanerata, sapaatip akunnerani kingullermi sullorsuaq matusariaqalersissimavaa. Tamanna illoqarfimmi biilinik angallattunut ajornartorsiortitsisimavoq. Sullorsuaq matummalli Kommuneqarfik Sermersooq angallannermut aaqqiissutissanik nassaarniarsimavoq.
”Sullorsuup matuneraniilli ullaat tamaasa angallannerup ingerlanera nakkutigisimavarput, takusinnaavarpullu angalattut nammineerlutik pissutsinut nalimmassakannereersimasut. Ilaatigut angallateruttorfiup avataatigut ingerlasalernermikkut ilaatigullu angallannermi angalaqatinut sissuernerulernermikkut”, Kommuneqarfik Sermersuumi ingerlatsinermi pisortaq Frank Rasmussen oqarpoq. Angallannerup allanngortiternissaanut periarfissat killeqarput, sapaatilli akunnerata kingullerup ingerlanerani Sanarfinermut Avatangiisunullu Ingerlatsivimmi sulisut paasisimavaat, angallatit arriinnerit soorlu nivaartarsuit usisaassuillu peqqutigalugit angallannermi siuleriiaannerit pilersartut.
Angallatit arriinnerusut siuleriinnernik pilersitsisarput. Angallatillu aqqusinermit qimagutereeraluartut siuleriinnerit ataannartarlutik.
”Tallimanngormat Nuummi suliffeqarfiit nivaatarsuarnik (gummiged) usisaassuarnillu (dumper) peqartut tamaasa allaffigaagut, qinnuigalugillu sulinertik pilersaarusiortassagaat, ullaakkut 7.30 aamma 8.30 ualikkullu 15.45 aamma 17.00 akornani aqqusinikkut angalanaveersaartussanngorlugit,” Frank Rasmussen oqarpoq.
Ulluni tulliuttuni Kommuneqarfik Sermersuup nalilersussavaa, aaqqiissutigineqartoq kissaatigineqartutut kinguneqarnersoq suliffeqarfiillu innersuussummik malinninnersut.
”Oqaloqatigiinneq peqqusinermit piumaneruarput, taamaammallu siullermik peqqussutinik allannguinissamik siunniuteqarsimanata, angallannerulli pitsanngorsaavigineqarnissaanut tamanna pisariaqalissanersoq nakkutigissavarput,” ingerlatsinermut avatangiisinullu ingerlatsivimmi pisortaq oqarpoq.