Prinsip Kalaallit Nunaat annertuumik uummateqarfigaa

Kunngikkormiutut Ataqqinaatilik Prins Henrik unnuaq toqukkut qimaguppoq. Tamatumani Nuummi rådhusimi erfalasut qiteqqusimatinneqarput.

Kommuneqarfik Sermersuumi borgmesterip Asii Chemnitz Narupip dronningi aappaalu arlaleriarluni tikilluaqqusarnikuuai. Taassumalu Prins Henrik inussiarnersutut, kialaartutut, angutitullu eqqumiitsuliornermik inuunermillu nuannarisalittut – minnerunngitsumillu Kalaallit Nunaannik annertuumik soqutiginnittumik eqqaamavaa.

”Prinsimut qaaqqusisuuneq nuannaertuaannarsimavoq,” Asii Chemnitz Narup oqarpoq. ”Angutaasimavoq ilisimasalik pissuserissaartorlu, imminut persuarsiutiginngitsoq, inuillu naapitani tamaasa nalimitut isigalugit oqaluussinnaasarsimavai. Misigiuaannarpara prinsip Kalaallit Nunaat annertuumik uummateqarfigigaa, tamaanilu tikilluaqqusaasutut killilersugaannginnerusutullu misigisarsimasoq. Isumaqarpunga Kunngikkormiutut Ataqqinaatilik Prins Henrik naggammik angalalluarnissaanik kissaatissagipput, 2009-mi kalaallisut, danskisut franskisullu taallanik saqqummersitaanit kusanartumik ilusilersugaasimasumit, taalliaanit Akunnerit siarngi-nit, nammineq oqaasii atorlugit.”

Sianerput kasuttarpoq
ulloq naaffeqanngilaq
ukiup takernga,
sianigisaassuseq nuanniik,
anniaatit atuupput,
taqqakka aamaarput –

Ulloq, aqagussaq, ippassaq,
nalunaaquttap issarneriniipput
uannit puigugaallutik,
nipaaffiit taartut
qupperneq kingulleq qupperpaat

Ullumi ullup qeqqaniit, Kommuneqarfik Sermersuumi illoqarfinni tamani sullissivinni, misiginneqataalluni allaffissanik ilisisoqassaaq. Innuttaasut prinsimut naggammik ilassinninnissaminnut tallimanngorpat ullup qeqqata tungaanut periarfissinneqassapput, taassumalu kingorna allaffissat kunngikkormiunut nassiunneqassapput, Kommuneqarfik Sermersuup pisortatigoortumik misignneqataalluni allataanut ilaatillugit.