Sermersuumi Meeqqanut Ilaqutariinnullu pisortaq nutaaq

Isumaginninnermut tunngasunut Naalakkersuisuusimasoq Martha Lund Olsen siunissami Kommuneqarfik Sermersuumi meeqqat atugarissaannginnerusut pillugit suliniarnermi siuttunngussaaq.

Kommuneqarfik Sermersooq Meeqqanut Ilaqutariinnullu Ingerlatsivimmi pisortamik atorfinitsitsivoq. Tassaavorlu Isumaginninnermut tunngasunut Naalakkersuisuusimasoq Martha Lund Olsen, siunissami Kommuneqarfik Sermersuup meeqqanut inuusuttunullu atugarissaannginnerusunut sullissinerani aqutsisuulersussaq. Martha Lund Olsen Ilisimatusarfimmi inunnik isumaginnittunngorniarfimmi ilinniartitsisutut atorfeqarsimavoq.

Atorfinitsitsinissamut ataatsimiititaliami ilaasortat isumaqatigiissut nalilerpaat atorfimmut piukkunnarnerpaajusoq.

”Marthap suliaminut piginnaaneqarluartuunera, ilisimasaqarluartuunera inuiaqatigiinnilu atugarissaannginnerusunik sullissinermi uummateqarluarluni pikkorilluinnartuunera ilisarisimajuaannarpara. Ukiuni kingullerni politikkikkut akerleriittarsimavugut, taamaakkaluartorli peqataarusussuseqartuarnera usorsisimaarutigiuaannarpara. Nuannaarutigeqaara Martha Lund Olsenip ilaqutariit meeqqallu atugarissaannginnerusut pillugit suliassaqarfik uagut peqatigaluta kivitseqataaffigerusummagu, annertuumillu ineriartortitsinissamut pilersaarutip atuutsikkiartuaarnissaa siuttuuffigerusummagu”, borgmester Asii Chemnitz Narup oqarpoq.

Meeqqanut Ilaqutariinnullu Ingerlatsivik apriilimi pilersinneqarpoq, taamanikkut Meeqqanut, Ilaqutariinnut Atuarfeqarnermullu Ingerlatsivik marlunngorlugu avinneqarmat. Avinneqarnissaanut siunertaavoq meeqqanut atugarissaannginnersunut atuarfeqarfimmullu tunngasunik suliniutit aqulluarneqarnerunissaat.

Pisortanngortussaq  decembarip aallaqqaataani atorfinissaaq, sulilernissanilu qilanaaralugu.

”Kommuneqarfik Sermersuumik nakkutilliinermi nalunaarusiami saqqummeqqammersumi takuneqarsinnaavoq isumaginninnermut tunngasunik suliaqarnermi allaffissornikkut aqutsineq pitsanngorsaaviginiartariaqartoq. Taamaattumik kommunimi meeqqat atugarissaannginnerpaat isumagineqarnissaat pillugu ingerlatsivimmi sulisut kajumissaarnissaannut aqqutissiuunnissaannullu qilanaarpunga” Martha Lund Olsen oqarpoq.

Martha Lund Olsen ullumikkut Inatsisartunut Kommuneqarfik Sermersuumilu Kommunalbestyrelsimut ilaasortaavoq. Meeqqanut Ilaqutariinnullu Ingerlatsivimmi pisortatut atorfininnerminut atatillugu ilaasortaaffigisaminit marluusunit tunuassaaq.