Kommunimut pilersaarummut tapiliussat 3A6-1 inaarutaasumik akuersissutigineqarnerat, Qaartiterutissaasivik aamma pisortat toqqorsiviat

Kommunimut pilersaarummut tapiliussaq 3A6-1 matumuuna Kommuneqarfik Sermersuumi Kommunalbestyrelsip 2017-imi septembariip ulluisa 5-ni ataatsimiinnerani akuersissutigineqarpoq.

KOMMUNIMUT PILERSAARUMMUT TAPILIUSSAQ 3A6-1

Siunertaa
Kommunip pilersaarutaanut tapiliussamut aallaavigalugu inissiat assigiinngitsunik angissusillit assigiinngitsuniillu pigineqartut pilersinneqarsinnaapput.

Nunaminertap kujasinnerusortaani illut inissianik mikinernik imaqassapput, pingaarnertut ilinniartunut ilaqutariinnullu isertitakinnerusunut naatsorsuussaassallutik, nunaminertap avannarpasissortaani illut ilaqutariinnit ataatsinit marlunnillu najugarineqartussat sanaartorneqassapput, taakkua naatsorsuutigineqarput nammineq pigineqarnissaat. Immikkoortortat marluk akornanni piginneqatigiilluni inissiat sanaartorneqassapput. Piginnittut assigiinngitsut piuneranni naatsorsuutigineqarpoq ineqartut assigiinngiiaarnerannut ilapittuutaanissaat, tamanna ingerlatsivimmit pitsaasutut nalilerneqarpoq kommunimillu ineriartortitseqqinnissamut pilersaarummut naapertuulluni.

Nunaminertami paaqqinnittarfimmit meeqqat ukioqqortussusiinut agguataarnagit inissiiviusartussamik pilersitsisoqarsinnaavoq, najugaqarfillu aqqusineeqqamik ataqatigiissinneqassaaq taamatullu silami eqqissisimaarfiusinnaasut ataatsimoorussat, taakkununnga ilanngullugit skatertarfik, illoqarfimmut tamarmut iluaqutaasussaq, naatsorsuutigineqarluni meeqqanit inuusuttuaqqanillu kajumigineqarluni tamanit orninneqartarsinnaassasoq.

Inatsisitigut atuutsitsineq
Kommunimut pilersaarummut tapiliussaq inaarutaasumik akuersissutigineqarnikoq tamanut saqqummiunneqareerpat, inatsisinut imalunniit kommunimut pilersaarummut tapiliussami aalajangersakkanut akerliusumik sanaartotoqarsinnaassanngilaq, Pilersaarusiornermut inatsit § 30 takiik.

Naammagittaalliornissamut ilitsersuut

Kommunalbestyrelsip aalajangiinera pillugu naammagittaalliuteqarusukkaanni, tamanna Naalakkersuisunut saaffiginnissutigineqassaaq:

Naalakkersuisut, Ineqarnermut Naalakkersuisoqarfik, Postboks 909, 3900 Nuuk.

Naammagittaalliut saqqummiussap uuma saqqummiunneqarneraniit sapaatit akunneri arfineq pingasut qaangiutsinnagit tunniunneqareersimassaaq.

Pilersaarut uani takuneqarsinnaavoq
Kommunimut pilersaarummut tapiliussaq Nunatta atuagaateqarfiani atuarneqarsinnaavoq, kommunip saaffiginnittarfiani pissarsiarineqarsinnaalluni, kommunip nittartagaani aaneqarsinnaalluni www.sermersooq.gl imaluuniit Sanarfinermut Avatangiisinullu ingerlatsivimmut uunga sianerluni 36 74 34 saaffiginninnikkut pissarsiarineqarsinnaalluni.