Innuttaasunut

Randi V. Evaldsen – Juullimi Eqqaamasanni Nuannernerpaaq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.


Kommueqarfik Sermersuup juullimi ammartagaa juullernissaata tungaanut ingerlavoq. Kommunalbestyrelsimi ilaasortat apersornikuuagut ukiup ingerlanerani suliaminni suut nuannarinersaasimaneraat aamma inuunerminni juullimi eqqaamasaminni suna nuannernersaanersoq.

Uanga ukioq manna kommunalbestyrelsemi suliarisimasatsinni nuannaarutiginersaanikuuara, Nuummi ilinniartut kollegiaqarnikkut aaqqiivigineqarnissaat. Ukiorpassuarnimi tamanna ajornartorsiutaasimasoq nalunngilarput. Sinerissamit tikittut inissaqartinniarlugit, ilinniartut Nuummeersut tunulliunneqartarnikuupput, assullu nuannaarutigaara kollegiassaqartittuarnissaat kommunalbestyrelsemi isumaqatigiissutigisimagatsigu.

Ilanngullugu eqqaarusuppara meeqqat atuarfiani atuartut angajulliit, inuiaqatigiinni sulisinneqartalernissaannik suliniummik aallartitsisussanngoratta. Tassanimi inuusuttuunerminniilli ilakkartassammassuk aningaasat orpinniit asuli tigoriaannaannginneri.

Meeraalluta juullimi iteqatigiittarnerput, juullimi eqqaamasanni ilaatigut nuannernerpaatut taarusuppara. Juulliaqqami iterluni pissanganeq qilanaarnerlu nuanneqartaqigamik. Suli ilaqutariiulluta iteqatigiittarpugut, pingaartutut isigigatsigu ileqqut ingerlateqqinnissaat meerartatsinnut.

Alla eqqaamasama nuannernerpaartaraat aatannut tunngavoq, ilaqutariinni qitiujuaannarsimavoq, ernutaasugugullu tamatta asaqigamitigut puigunaattaqaaq. Juulliaqqami kingulerartorluni tassa kisiat aataap eqqaanut inginniapallalluni, tassami aataap eqqaani issiagaanni eqquinissamut periarfissat marloriaatinngirtaramik.

Uannut juulli ilaqutariinnut tunngatittarpara, tamannalu ileqqoq nuannareqaara, ukioq kaajallallugu ulapinnikuulluni qilanaarnartaqaaq juullisiornissaq, ilaquttakka tassani eqqissiivillunga ilagisinnaasarakkit.


Kommuneqarfik Sermersuup juullimi unammisitsinerani #julenuuk-mut peqataanissat eqqaamajuk. Hashtag #julenuuk atorlugu Facebookimut Instagramimulluunniit assimik ikkussiguit unammisitsinermut peqataassaatit.