Perorsaasut akissarsiaat pillugit eqqunngitsunik paasissutissiinerit pissutaallutik sakkortuumik oqallittoqarpoq.
Tusagassiorfiit ilaasa sapaatip akunnerata naaneerani allaaseraat, perorsaasut tikisitat Kommuneqarfik Sermersuumilu sulisut nunaqavissunit akissarsiaqqortunerusut, taamalu allaaserisaqarnerup kinguneranik inuit attaveqartarfiisigut inuit kamallutik allaaserisaqartarput.
Akissarsiat assigiinngitsuuneri eqqortuunngilaq. Tamanna perorsaasut kattuffiannit, NPK-imit aamma Kommuneqarfik Sermersuumit naqissuserneqassaaq.
“Sumi inunngorsimaneq aallaavigalugu akissarsiaqartarnerup atorunnaarsinneqarnera kattuffitta 1991-imi siullersaallutik atulersippaat. Tassa ukiuni 26-ni asssigiimmik akissarsiaqartitsisarpugut, taamaattumik ilugersunarpoq ilaasortatta soqutigisaannik eqquutsitsinngittutut pisuutinneqarnerput”, Perorsaasut Kattuffiata siulittaasua, Naussúnguaq Bisgaard oqarpoq.
Kommuneqarfik Sermersuumi Meeqqanut Atuarfeqarnemullu ingerlatsiviup pisortaata, Helene Broberg Berthelsenip eqqunngitsunik paasissutissiisoqarsimanera ilugersunartutut aamma tiguaa. Taanna isumaqarpoq eqqunngitsunik paasissutissiinerit paaqqinnittarfinni sulisut sulinerinut akornutaasinnaasoq.
“Meerartatta piutsaasumi paaqqinnittarfiittarnissaat pillugu sulisussarsiortarnerput aaqqiissuteqarfiginiarsaraarput, taamaattumik assigiinngitsunik akissarsiaqartitsisoqartarneeranik oqalunnermi perorsaasut inuusuttut pikkorissullu sulersussuseqarunnaarsinneqarput. Taamaattumik eqqunngitsunik siammarterisunut paaseqqunarpoq tamassuma kingunipilorisinnaasaat eqqarsaatigeqqullugit”, Helene Broberg Berthelsen oqarpoq.
Inuit attaveqaataasigut allattut ilaat aamma allapput, ilisimallugu tikisitat inissaqartinneqarlutik Kommuneqarfik Sermersuumi sulisorineqalersartut.
Tamanna eqqunngitsoq, Perorsaasut Kattuffianit aamma Kommuneqarfik Sermersuumit naqissuserneqassaaaq.
“Meeraaqqerivinni meeqqerivinnilu 0-miit 6-nut ukiulinnut paaqqinnittarfinni perorsaasut 57-it inissaqartinneqarnissaat ukiuni kingullerni marlunni isumagivarput. Inissisiaq ataasiinnavik Danmarkimiit tikisitamut innersuunneqarluni”, Helene Broberg Berthelsen oqarpoq.
Nuummi paaqqinnittarfinni perorsaasut 104-t ullumikkut atorfeqarput. Taakkunannga sisamaannaat Kalaallit Nunaanni inunngortuunatik.