Nuuk Imiup eqqaani immikkoortoq imaaruppoq. Sapaatiummat containeri kingulleq nuunneqarpoq.
Sapaatiummat ualikkut 20-fods-containeri kingulleq 40-fods-containerilu kingulleq Nuuk Imiup eqqaaniittut (Qeqertat) kivillugit nuunneqarput. Lastbilinik aqutsisoq Nuka Junge Dalager nuannaarutaasumik containerimik kingullermik nuussisuuvoq.
Immikkoortumik imaajaaneq aggustip qulinganiit aallartippoq, containerillu Qinngutsinni containereqarfittaamut nuunneqarput.
”Containerinik nussuineq assut malinnaaffigineqarsimavoq. Qaammatit pingasut ingerlaneranni immikkoortoq imaarniarsimavarput, tamannalu iluatsippoq. Sulinerup ingerlanerani sukujuit naatsorsuutaasimanngitsut nassaarineqartarsimapput, soorlu containerit ilaanni qummoroortaaterpassuit nassaarisimagivut,” oqaluttuarpoq Kommuneqarfik Sermersuumi Nunaminertanut Sanaartornermullu Oqartussaqarfimmi immikkoortortami aqutsisoq Vilhelm Lynge Hard.
Immikkoortumi katillugit atuisuvittut 330-t nalunaarsorsimapput. Tamatuma saniatigut arlaqartut atuisuupput nalunaarsorsimanatik.
”Containerit arlallit nalunaarsorneqarsimannginneri pissutigalugit nukippassuit aningaasallu atorlugit Container ID aqqutigalugu containerit tamarmik, sapinngisamik, nalunaarsorneqarput, containerillu tamarmik piginnittui ujartorneqarlutik, oqarpoq Vilhelm Lynge Hard.
Kommuneqarfik Sermersooq maannakkut Qasigiannguani umiatsianik inissiivik imaarlugu suliaraa. Tamatuma kingorna naluttarfiup Maliup eqqaani piiaaneq aallartissaaq. Kommuneqarfik Sermersuumit, inuussutissarsiornermut inissianullu inissaqartitsinissaq pillugu, immikkoortut pingasut imaarneqarput.